Col tel lo Sangreu Puai
1Ciafangin Bawipa in Moses hnen ah, 2“Israel mite songai a te hmasaber minung i tu seh sumhnam i tu seh kaimah hnenah a tumce in dah tuu-ih. Amahte khiah kaimah ai i.”ti in ruai i.
3Ciafangin Moses in Israel mite hnen ah, “Mi cengfa ai ning umhmun Izip ramin tunnia ah suak khiah hih tuu-ih. Bawipa huthawm thawnin ning suah i. Col tel sangreu ei tuh lo i si. 4Abib hla tunnia ah suak i si. 5Cen Bawipa in cawhnawi le khoiti luang hmun Khanaan le Hit le Amor le Hiv le Jebus te ram khiah ning pe tuhin ning paate hnenah kam hnak ramah Bawipa in ning kawih fangin he puai khiah he hla songah bawn tuh i si. 6Ni sarih song col telh lo sangreu ei tuh i si. Ni sarih nia fangin Bawipa hnenah puai bawn tuh i si. 7Ni sarih song col tel lo sangreu ei tuh i si. Ning lakah col telh hnak sangreu um ma seh. Cen ning umhmun ah khai col um ma seh. 8Cia nia ah na fapa hnenah, ‘Izip in i suak fangin Bawipa in kaimah ca in hetih bangin bawn manin he puai bawn ing.’ti in rel tuh i si. 9Bawipa thukham khiah na ka songah um thai in he puai khiah na kut vumah hnikhnaih hnak bangin le na mit panih laklawh ah hihhnak khan bang i tu seh. Ziangmanti fangin a huthawm thawn Bawipa in Izip ramin na suah zo i. 10He puai khiah kum khat hnua kum khat a cu khim fangin ul tuh i si.
11Cen Bawipa in ning hnenah le ning paate hnen ah ning pe tuhin kamhnak Khanaan ramah Bawipa in ning kawih fangin, 12Ning sumhnam songai a te hmasaber khiah Bawipa ca in a tumce ih dah tuh i si. A pa hmuah Bawipa ai i. 13Lak fa a te hmasaber khiah tuu fa thawn tlanh tuh i si. Tlanh hlah leisikhaw a hawng ek tuh lio i si. Cen ning fapa songai a te hmasaber khiah tlanh tuh i si. 14Ciamanin ning fate in a cu khim fangin, ‘He khiah zai ca i?’ti in ning zawt fangin, ‘Mi cengfa ai kin umhmun Izip ramin Bawipa huthawm thawn kin suah i. 15Pharaoh in kin suak siang lo fangin Bawipa in minung song ai le sumhnam songai a te hmasaber khiah rek i. Ciamanin a te hmasaber sumhnam hmuah Bawipa hnenah hlu ai a te hmasaber i fapa khiah tlanh ing.’ ti in rel tu. 16He puai khiah na kut vumah hnikhnaih hnak bangin le na mit panih laklawh ah khi bang in dah tu. Ziangmanti fang in Bawipa in huthawm thawnin Izip ramin kin suah i.”ti in rel i.
17Cen Pharaoh in Israel mite khiah hlat fangin Pathian in amahte khiah Filistin te ramin nong sawn napui ai cia ramin kawih lo i. Ziangmanti fangin Pathian in, “Israel mite in a raal te hmu fangin a thin thleng in Izip ramah let leh mawh ngai.”ti in ti i. 18Ciamanin Pathian in amahte khiah Ti San lam sawn in kawih i. Israel mite khiah Izip ramin suak fangin raaltawng tuhin pai cia i. 19Moses in Joseph ruh khiah phur i. Ziangmanti fangin Joseph in, “Pathian in ning fan tuh rori i. Ciafangin i ruhte he ram in phur tuh i si.”ti in thukam ruai awng i. 20Ciamanin anite khai Sukkhot in feh ai nelrawn hiang ai Etham ah caam i. 21Ciafangin Bawipa khai amahte khiah konghoi tuhin sun fangin amahte hmai ah meiro pui in vak ai amahte khiah sun le zan vak thill thai in zan fangin amahte var tuhin meipual pui in vak i. 22Pathian in sun fangin meiro pui le zan fangin meipual pui khiah amahte hmai in lang sah loin dah hlen i.