1Lawithing thawn awlta sa ai a saulam dong nga le a kaulam dong nga, a sqaure i; cen a saanglam dong thum i. 2A ningli ah ki pakhat ten dah ai cia kite khiah a awlta thawn hmunkhat ai sahnak i. Cen dar thawn khut i. 3Cen awlta ca in hleng le kawpia le bel le fork le meiko kawihhnak pakan khum bawn ai hete khiah dar thawn bawn i. 4Cia awlta ca in dar tlep pakhat bawn ai awlta hnia ah dah ai cia dar tlep khiah awlta hrek saang i. 5Cia dar tlep ningli ah a kual pali khiah thingpum rolh hmun tuhin bawn i. 6Ciafangin lawithing pum bawn ai dar thawn khut i. 7Cia thingpum te khiah awlta phurhnak tuhin awlta khatlam le khatlamah ai dar kual songah rolh i. Thingtlep thawn awlta khiah a song kualawng in bawn i.
8Cen dar bel pui khai a ke kawmin tawkdun hmun tabernacle dawngkham ah tai tu nupui napertute dar thawn bawnhnak hlalang thawn bawn i. 9Ciafangin a hlanglam ah tualvan bawn i. Cen a tualvan ah tarhnak ponte khai thiam pha ngai thawn takhnak i ai dong zakhat sau i. 10Cen cia ponte ca in khuam kul um ai a munhmun tuh dar thawn bawnhnak khai kul um i. A khuam ai tarhmun le a rite khiah ngun thawn bawnhnak i. 11Cen a saklam ah tarhnak ponte khiah dong zakhat sau ai khuam kul le a munhmun tuh dar thawn bawnhnak kul khai um i. A khuam ai tarhmun le a rite khiah ngun thawn bawnhnak i. 12Cen nitla hmun lam ah tarhnak ponte khiah dong sawmnga sau ai khuam sawmkhat le a mun hmun tuh dar thawn bawnhnak sawmkhat um i. A khuam ai tar hmun le a rite khiah ngun thawn bawnhnak i. 13Cen nisuak hmun ah tarhnak pon khiah dong sawmnga i. 14Cen dawngkham a khat lamah tarhnak pon khiah dong hlainga sau ai khuam pathum le a munhmun khai pathum um i. 15Cen tualvan dawngkham khat lam ai tarhnak khai a bang vek i. Ciamanin helam le khialam ai tarhnak pon khiah dong hlainga i ai a khuam khai pathum cen a munhmun khai pathum um i. 16Tualvan a hiang cingkim ai tarhnak pon khiah thiam pha ngai thawn takhnak i. 17Khuam songai a munhmun kua khai dar ai bawnhnak i. Cen khuam vumai tarhmun le a rite khai ngun thawn bawnhnak i. Khuam a lu lamtu ngun ai bawnhnak i. Cen tualvan ai khuamte a veksenin ngun thawn bawnhnak ri nai i. 18Cen tualvan kawl dawngkham berhnak pon khai mepian le a num le a san pon le thiam pha rauh thawn takhnak i. Cia pon khiah a tarhnak pon bangin dong kul sau ai a sang lam khai dong nga i. 19Cen khuam pali khai dar thawn bawnhnak a munhmun kua pali kawm in um i. Cen a tarhmun khai ngun thawn bawnhnak i ai a khuam a lu lam khai a ri kawmin ngun thawn bawnhnak i. 20Cen tabernacle vumai thil tarhmun le a hiang cingkim ai a tualvan khai dar thawn bawnhnak i.
21Tettikhanhnak tabernacle sahnak ai hmanghnak thilrite khiah Moses in Levite khiah lai songah khum ruai bangin Aaron fapa phungki Ithamar in hetih bangin khum i. 22Bawipa in Moses ruaihnak bangin Judahte phun songai Hur fapa Uri fapa Bezaleel in a veksenin bawn liang i. 23Cen amah thawn lungto vumah zuksuai thiam le pungcan suai thiamtu le mepian le a num le a san pon le thiam pha rauh ri thawn thiamtak thiamtu pa Dan phun songai Ahisamak fapa Aholiab khai um ve i.
24Cen cia cianghlim hmun ca ai hmanghnak a hluhnak sui khiah talan kul hluankua le temple shekel bangin shekel zasarih le sawmthum i. 25Cen Pawlpui songai pum siarhnak mite ai khonhnak ngun khai talan zakhat le temple shekel bangin shekel thawngkhat le zasarih le sawm sarih le panga i. 26Cia khiah mi pakhat ah bekah pakhat ten khon i (bekah pakhat khiah temple shekel in shekel hrek i). Pum siarhnak songah a teltute khiah kum kul le kum kul tan vum mite i ai thawng zaruk le thawng thum le zanga le sawmnga i. 27Cen ngun talan zakhat songin temple ai a munhmun kua le khaandanhnak pon paar bawn i. A munhmun kua pakhat khiah talan pakhat ten in bawn manin kua zakhat khiah talan zakhat thawn bawn i. 28Cen thawng khat le za sarih le sawmnga talan thawn khuam vumai tarhmun tuh bawn ai khuam lu lam khai nawih ai ri bawt sah i. 29Cen a hluhnak darte tu talan sawm sarih le shekel thawng nih le zali i. 30Ciate thawn tawkdun hmun tabernacle dawngkham ca ai munhmun kuate le dar awlta le cia awlta vumai dar lungthu le awlta ca ai hmang tuhhnak bel hmuahhmuah le 31Tualvan cingkim ai mun hmun tuh kua le tualvan kawl dawngkham a ke te le tualvan cingkim ai thil tarhmunte bawn i.