1Ciafangin amah in temple dawngkham hnen ah i kawih leh thio i. Temple dawngkham hnia in nisuah hmunlam ah ti pakhat luang i. Ziangmanti fangin temple hmailam khiah nisuah hmunlam hoi i. Cia ti khiah temple kiahhan lam awlta hlanglam in luang i. 2Ciafangin amah in saklam kawl dawngkham songin i suah ai, nisuah hmunlam hoi tu kawldawngkham pualam ah i fehpui i. Ciafangin a kiahhan lam in ti luang i.
3Ciafangin cia pa khai a kut ah thil tehhnak karihza thawn nisuah hmunlam ah suak ai dong thawngkhat tek ai ti khiah i tan pui i. Cia ti khiah i titiruh tian hleng i. 4Ciafangin amah in dong thawngkhat teh leh thio ai ti i tanpui leh thio ai ti khiah i khuk tian hleng i. Amah in dong thawngkhat teh leh thio ai ti khiah i tanpui leh thio le ti khiah i el tian hleng i. 5Ciafangin amah in dong thawngkhat teh leh thio ai runpui cang le tan ben nawn lo ing. Ziangmanti fangin cia ti khiah a thuk ze ai a leuh kul i le a tan thill lo runti i.
6Amah in i hnenah, “ Mi fapa, he khiah hmu aw sim?”ti in i ti i. Ciafangin amah in i kawih leh ai varkam ah i let pui i. 7Ciata ah i let leh fangin, cia run kam khatlam le khatlam ah thing tam ngai um i. 8Ciafangin amah in i hnenah, “He ti khiah nisuah hmunlam ram ah luang ai, rawn zawllai song ah zu le tipui songah lut i. Tipui songah lut fangin cia tipui song ai ti te khiah cak ruai tuh i. 9Ciafangin cia runti luang hmun caang ah nunghing hmuah hmuah khiah nung tuh sio i. Ciata ah ti zu manin ciata ah nga tam rauh um tuh i. Ziangmanti fangin a ti te khiah cak ruai tuh ai cia runti luang hmun caang ah zaizongza nung tuh i. 10Ciafangin En Kedi ai panin En Eklaim ai ngadawi tute khiah a hiang ah ding tuh i. Amahte in sur vorh hmun khai um tuh i. Amahte nga khai A Lianpui Tipui song ai nga thawn bang tuh ai tam rauh tuh i. 11Ikhalselai a cirhti le nawng le hampa umhmun te tu cak ruai tuh lo i. Ci thawn dim tuh i. 12Cia run kam khatlam le khatlam ah rong tuh in thing phun caang po tuh i. Cia thinghnah te khiah voi tuh lo i. A thai khai hnawm tuh lo i. A ti khiah a temple songin luang manin, hla siar in amahte in thai nai tuh i. Amahte thai khiah rong in hmang tuh ai amahte hnah khiah si in hmang tuh i.”ti in i rel i.
13BAWIPA Pathian in, “He ramri thawn Israel ram khiah Israel mi phun hlainih lakah amahte ro tuhin zem tuh i si. Joseph in hmun nih co tuh i. 14Ning veksen in a bang ten in co tuh i si. Ziangmanti fangin ning paa te hnenah he ram khiah pe tuhin i kut tung in thukham ing. Ciamanin he ram khiah ning ro cang tuh ing. 15Saklam ramri khiah he i tuh i: A Lianpui Tipui in Hethlon lam in feh in Zedad luthmun tian, 16Hamath, Berothah, Hamath le Damakhas laklawh ai Sibraim in Hauran ramri ai Hazer-hatticon tian i. 17Ciamanin a ramri khiah Tipui hmun in Damaskhas ramri ai Hazar Enan tian le saklam ah Hamath ramri tian i. He khiah saklam ramri i. 18Nisuah hmunlam ramri khiah Hauran le Damaskhas laklawh le Kilead le Israel ram laklawh in panin Jordan run hlun in tipui in nisuah hmunlam ah i tuh i. He khiah nisuah hmunlam ramri i. 19Cen hlanglam ramri khiah Tamar in panin Kadesh hiang ai Meribah ti tian le ciata in rawnti ai panin a Lian Tipui tian i tuh i. He khiah Hlanglam lam ramri i. 20Nitla hmunlam ramri khiah a Lian Tipui i ai hlanglam ramri ai panin Hamath ralkhat tian i tuh i. He khiah nisuah hmunlam ramri i.
21Ciatih bangin Israel ram khiah Israel mi phun zah in zem tuh i si. 22Cia ram khiah ningmah le ning lakai fa nai tu mi ram dang mite in co tuhin awngbali thawn zem tuh i si. Cia ram dang mite fate khiah Israel mite bang in siar tuh i si. Amahte in ningmah bang in Israel mite phun lakah ro co tuh ve i. 23Cia ram dang mi pa in Israel mi phun lakah khuato hmun ah a ro khiah pe tuh i si.”ti in BAWIPA Pathian in ti i.