1Hete hmuah khiah ben fangin, mi bawite khai i hnenah kawi ai, “Israel mite le phungkite le Levi mite khiah ram songai umtu Khanaan mite le Hit mite le Periz mite le Jebus mite le Ammon mite le Moab mite le Izip mite le Amor mite ningdulkul biahnak thawn khek lai lo i. 2Ziangmanti fangin amahte fenu khiah amahte le a mahte fapate in nu tuhin hoi i. Ciamanin a cianghlim cii khiah he ramai umtu mite thawnin rawih i. Cia upate le mi-uktute khiah he lakah a sualtu berber i.” ti in i rel i. 3Ciamanin cia thu khiah i za fangin, i angki le i thuam khiah zik ai, i lu ai i sam le i kahmul hrekkhat khai phai ai ngaihsun ur rauh in to ing. 4Raalte ai pom ai ram dang ah tlan ai Jerusalem ah let lehtu te sualhnak manin, Israel Pathian thu kih tu hmuah khai i hnenah khawm ai, zanlam raithawi cu tian ngaihsun ur rauh in to meng ing.
5Zanlam raithawi cu khim fangin, kai khai rongul awl in tho ing. I angki le i thawm khiah zik ben fangin, kai khai i khuk caicin ai i kut khiah Bawipa i Pathian hnenlam ah pharh ing. 6Ciafangin amah hnenah, “Aw i Pathian, i hmai thawn na hnenlam sik tuh khiah zak khai i thi, zakthi khai kul i, i Pathian. Ziangmanti fangin kin sualhnak khiah kin lu tah in saang ai, kin mawhhnak khiah vancung tian in hleng zo i. 7Kin paate sanlai ai panin tun nia tian kin mawh rauh i. Kin sualhnak manin, kinmah le kin kumpibawite le kin phungkite khiah mi ram dang kumpibawite kut ah le vang ai rek tuhin le raalte ai pom tuhin le rok tuhin le tunnia ai bangin zakthi kul tuhin kin ap zo i. 8Ikhalselai tun campuikhat song khiah Bawipa kin Pathian in ngaih kin har manin, a taanghnak mi tlawmniu khiah kin luat ruai ai, Amah temple songah umhmun tuh kin pe i. Ciamanin kin Pathian in kin mit ah khuavar kin pe ai, cengfa kin tuarhnak thilrit songin a tlawmniu kin zaang ruai i. 9Ziangmanti fangin kinte khiah mi cengfa awng napui ai kin Pathian in kin zam lo i. Persia kumpibawi hmai ah ngaihharhnak kin pe zo i. Cen kin Pathian inn rol leh tuhin inn hnawm saa sa leh tuhin kin nung ruai leh i. Cen Judah le Jerusalem ah kin khakber tuhin sen kin pe i. 10Aw kin Pathian, akontih bangin rel tuh i ing? Ziangmanti fangin na thukhamte khiah zam sek i ing. 11Cia thukhamte khiah na hnenum na prawfette songin, ‘A ping tuhai ning lut hmun he ram khiah a ciang lo ram i. Cia ram ai minungte khai a ciang lo i. Amahte ningdulkul thawn a khatlam ai panin a khatlam tian a riim thawn dim ruai i. 12Ciamanin ning fenute khiah a fapate pa ruai mah ih. Cen a fenute khiah ning fapate nu ruai mah ih. Cen ning kho thaihnak tuhin le cia ram ai rong pha khiah ei in cia ram khiah ning fate hnenah kumzangza ro bangin hlup thai in, amahte phathnak le amahte thawn remhnak tuh sii mah ih.’ ti in ruai awng i si. 13Kin hnenah hlenghnak khiah a pha lo bawn manin le kin mawhhnak lian ze manin hleng i. Ikhalselai kin Pathian, nangmah in kin sual zah in kin cawh lo ai he zah kin taang ruai i lai si. 14Na thukham khiah hlun lo in ciabang ningdulkul bawntute thawn nu dun pa dun tuh i ing? A taangtu pakhat khai um lo in nangmah in kin rek tuh in thin na raw tuh lo im? 15Aw Bawipa Israel Pathian, nangmah khiah na hman i. Ciamanin tunnia tianin kin taang ruai i si. Kin mawhhnak manin na hmai ah kinte pakhat bangin khai ding ben napui lo ai, na hmai ah kin mawh thawn um i ing.” ti in sawngen ing.