1Cia nia ah mizapui zaak in Moses Ca-uk songai nganhnak khiah siar ai, Ammon mi le Moab mite khiah Pathian pawlpuite thawn khawmkhat tuh lo i ti ai nganhnak lai khiah tawk i. 2Cia khiah ziangmanin i ti fangin, amahte in Israel mite khiah rong le ti thawn caang ta rul ai amahte cam tuhin Balaam khiah zawng i. Ikhalselai kin Pathian in amahte camhnak khiah hmuifu ah cang ruai i. 3Ciamanin amahte in Dan Upadi thu khiah za fangin Israel mite lakai kahpiate khiah a veksenin a tumce in dah i.
4Hete hlan ah, kin Pathian inn songai rongkhawl hmun khaan uktu phungki pa Eliashib khiah Tobiah thawn tang khat i. 5Eliashib in Tobiah ca in khaan lian ngai bawt sah i. Cia khaan khiah Levi te le lasatute le dawngkham kiltute le phungkite ca ai hluhnak rong hluhnak le frankinsens le Pathian thilri le sephuhtaphuh rong le captitizu thar le thau te khawi hmun khaan i awng i. 6Ciatengin kaimah khiah Jerusalem ah um lo ing. Ziangmanti fangin Babilon kumpibawi Artazazi ukhnak kum 32 kum ah kumpibawipa hnen ah let leh ing. Ni zai cam lo fangin kai khai kumpibawi pa hnenin a khuan lang ai 7Jerusalem ah hleng ing. Ciafangin Eliashib in Tobiah ca in Pathian inn tualvan ah a khaan bawt sahhnak thu pha lo khiah za ing. 8Kai khai thin i raw bik manin Tobiah thilri khiah a khaan songin sumpua ah sep sah sio ing. 9Ciafangin cia khaante khiah som ruai ing. Ciaben fangin Pathian inn songai thilrite le rong hluhnak le frankinsens te khiah cia khaan songah kawih leh ing.
10Cen Levi te khai amahte ping vo a hlu khiah lo pe nawn lo i ti khai ling ing. Ziangmanti fangin Levi mite le lasatute khiah amahte lo ten ah lovai tuhin feh i. 11Ciamanin amahte bawite khiah, “Ziangmanin Pathian inn khiah zam berh i?” ti in hau ing. Ciafangin amahte khiah ko leh ai amahte umhmun ten ah dah leh ing. 12Ciafangin Judah mite in rong sephuhtaphuh le capittizu thar le thau khiah rongkhawi hmun ah kawih i. 13Ciafangin rongkhawi hmun uktu tuhin phungki Shelemiah le cazi Zadok le Levi mi Pediah dah ing. A bawm tu tuhin Mattaniah fapa Zakkur fapa Hanan dah ing. Ziangmanti fangin amahte khiah mi rinsan tlak pawl i. Amahte in a unaute hnenah a hlu zem tuh khiah amahte tavuan i.
14Aw i Pathian, he i bawnhnak khiah lo i hih sah tulaw. I Pathian inn ca ai na pha i perhnak khiah lo i phiat sah malaw!
15Ciateng in Judah ramah mi hrekkhatte in Sabbath nia ah capitti rial ai, Sabbath nia ah Jerusalem ah fang telte khiah kawih ai amahte lak khiah capittizu le capitti le thaihmin le thilri phun caang thawn phurh ai Jerusalem ah Sabbath nia in kawih khiah hmu ing. Ciamanin amahte in thilri zuar nia khiah zai nia i ti in ling ruai ing. 16Ciata ah Tyre mite khai um ve ai amahte in Judah mite hnenah le Jerusalem khua songah Sabbath nia ah nga le thilri phun caang zuar i. 17Ciafangin kai in mi bawite hnenah, “Ziangmanin Sabbath nia khiah ul lo in a pha lo bawn i pa i si? 18Ning paate in ciatih in bawn manin kin Pathian in he a pha lo hmuahhmuah khiah kin vumah le he khua vumah hleng ruai i lo im? Ikhalselai Sabbath nia khiah ul lo in Pathian thinrawhnak khiah Israel mite vumah belh i si.” ti in hau ing.
19Ciamanin Sabbath nia khim hlan khuathim tum fangin, Jerusalem dawngkhamte khiah kham tuhin le Sabbath nia bo hlan lo hong tuh lo in thu pe ing. Ciaben fangin Sabbath nia ah zai thil khai phur tuh lo in i hnenumte a hrekkhat khiah dawngkham ah dah ing. 20Thil phun caang zuartu dawr tuahtute khiah Jerusalem khuapua ah velkhat maw velnih dung caam awng i. 21Ciamanin amahte hnenah, “Zaimanin Jerusalem renhnak senpua ah zancaam i si? Ciatih in bawn leh thio leisikhaw, ning pom tuh ing!” ti in tiam ing. Ciata ai panin anite khai Sabbath nia ah kawi leh lo i hang. 22Ciafangin Sabbath nia khiah cianghlim ruai tuhin, Levi te in amahte ve ciang ruai in dawngkham kil tuhin thu pe ing. Aw i Pathian, he thu khai lo i hih sah tulaw. A lian ngai na ngaihharhnak bangin lo i luat ruai tu.
23Ciateng in Judah mite in Ashdod, Ammon le Moab nupangte nu khai hmu ing. 24Amahte fate tlamhmatte in Ashdod pon pong ai Judah pon tu pong thiam bul lo i. Ikhalselai mi dangte pon in pong i. 25Ciamanin kai khai amahte khiah hau ai amahte khiah cam ai, a hrekkhatte khiah vit ai amahte samri thawn duk ai Pathian hnenah thukham ruai ai, “Ning fenute khiah amahte fapa te pa ruai tuh lo i si. Cen amahte fenute khai ning fapate pa ruai tuh lo i si. Ningmah in khai nu tuh lo i si. 26Israel kumpibawi Solomon in hete manin sual i lo im? Ikhalselai mi phun tam ngai lakah Pathian in Solomon bangin aisu khai it lo i. Cen Pathian in amah khiah Israel mi veksen uk tuh in pe i. Ikhalselai Pathian ling lo nupangte in amah khiah sual ruai i. 27Ningte in Pathian ling lo nupangte khiah nu in kin Pathian lakah a pha lo bik sualhnak khiah bawn i ti in ning za nga ing im?” ti in hau ing.
28Joiada fapa pakhat phungki upa Eliashib fapa in Horon mi Sanballat fenu nu i. Ciamanin amah khiah i hnenin hnawt ing.
29Aw i Pathian, amahte in phungki dan khiah rim ruai ai phungki thukhamhnak le Levi thukham hnak khiah rim ruai manin amahte khiah lo hih tulaw!
30Ciamanin phungkite le Levi mite khiah Pathian ling lo tute lakin ciang ruai ing. Cen amahte naper ten khai zem ing. 31Cen thing le rongthar khai a cu bangin khon tuhin tavuan pe ing. Aw i Pathian, ngaihhar kongin lo i hih tulaw!