1Nisan hla, Kumpibawipa Artazazi in kum kul uk fangin, kumpibawipa hnenah capittizu khiah kawih ing. Cia hlanah a hmai ah lungsia in um awng lo ing. 2Ciamanin kumpibawipa in i hnenah, “Na ur loi lo ikhaw, ziangman in lung na sia i? He khiah na thin songah lungsia hnak um i.” ti in i zawt i. Ciafangin kai khai thi banghma in i lau i. 3Ciafangin kumpibawipa hnenah, “Kumpibawipa khiah kumzangza in lo nung tu seh! I paate vui hmun khua khiah hnawm sio ai a dawngkhamte khiah mai in kang sio manin a kontihin lungsia lo in um thill tuh ing?” ti in sawn ing. 4Ciafangin kumpibawipa in i hnenah, “Zai i ngen na nuam pa?” ti in i zawt i. Ciamanin kai khai vancung ai Pathian hnenah sawngen ing. 5Ciafangin kumpibawi hnenah, “Kumpibawipa in lungkhim in ngaih i har lesikhaw, i paate vui hmun khua khiah sa leh tuhin, i hlat tu.” ti in ngen ing. 6Ciamanin kumpibawipa in (kumpibawinu khai a hiang ah to ai), “Zaicam na rai tuh i? Zaikom in tlung leh tur si?” ti in i zawt i. Ciamanin kumpibawipa in i feh ruai tuhin lungkhim i. Ciafangin zai cam i rai tuh rel ing. 7Ciahlai ah kumpibawipa hnen ah, “Kumpibawipa lungkhim lekhaw, Runpui Ralkhat lamai ram uktute hnen ah, Judah i hleng tian amahte ram songin i feh siang thai in lai i pe tu. 8Cen kumpibawipa tuu uktu Asaph hnenah khai, temple thawn senghnak inn dawngkham ca le khua renhnak sen ca le i umhmun tuh inn ca in thing kin pe tuhin lai kuat tu.” ti in ngen ing. Pathian kut khiah i vumah um bangin kumpibawipa in i ngenhnak hmuah i pe i.
9Ciafangin kai khai Runpui Ralkhat ramai uktu bawite hnenah kawi ai, kumpibawipa lai khiah amahte hnenah pe ing. Kumpibawipa in raalbawi te le siphutotu te khiah kaimah thawn feh ruai i. 10Horon mi Sanballat le Ammon bawi te in za fangin, mi pakhat khiah Israel mite phat hnak sii tuhai kawi manin anite khai thin hnaihnok rauh i.
11Ciamanin kai khai Jerusalem ah hleng ai ni thum um ing. 12Ciafangin kai khai mi a tlawm niu thawn zanlai in tho ing. I Pathian in Jerusalem ah bawn tuhai i thinlung songah dahhnak khiah aisu khai rel lo ing. Cen i tohnak lo a dang siphuh khai um lo i. 13Kai khai zanlai in Rawn Zawllai Dawngkham songin Rulpui Namkum le Hnawmborh Dawngkham ah suak ai, a tlu bial Jerusalem renhnak sen le mai ai kanghnak a dawngkham te khiah sik ing. 14Ciaben fangin Cirhti Dawngkham le Kumpibawipa Tikhur ah kawi ai, i tohnak siphuh khel hmun tuhin lampui um lo i. 15Ciamanin kai khai zanlai in rawn zawllai hiang in kawi ai cia sen khiah sik ing. Ciaben fangin kai khai let leh ai, Rawn Zawllai Dawngkham songin lut ai tlung leh ing. 16Bawite in i kawi hmun le i bawnhnak khiah i ling sah lo i. Cen kaimah in khai Judah mite le phungkite le mi upate le bawite le naper tute khai rel lai lo ing.
17Ciafangin kaimah in anite hnenah, “Jerusalem khiah hnawm sio ai a dawngkhamte khai mai in kang sio manin thin kin thip ngai khiah hmu i si. Jerusalem sen khiah sa leh nga singkhaw, mi hmai ah zak kin thi tuh lo i.” ti in rel ing. 18Amahte khiah Pathian in i vumah a kut dah hnak thu le kumpibawipa ai i hnenah ponghnak thute khai rel ing. Ciamanin amahte in, “Tho nga singkhaw, sa nga sing.” ti in ti i. Ciamanin anite khai naper pan i. 19Ikhalselai Horon mi Sanballat le Ammon bawi te le Arab mi Keshem in cia thu za fangin, zauh kin suam ai hnih kin cip ai, “He ning bawnhnak khiah ziang i pa? Kumpibawipa kut hnia in suak tum i sim?” ti in kin ti i. 20Ciamanin kai khai amahte khiah, “Vancung ai Pathian amah rori in kin bawm tuh i. Ciamanin kin a hnenumte in tho in sa tuh i ing. Ikhalselai ningte in Jerusalem ah ning co tuhhnak ro le ngah tuhhnak vo nai lo i si.” ti in sawn ing.