Abram le Lot khekhnak
1Ciamanin Abram khai a nu le Lot le a naihnak kawmin Izip ramin suak ai Nekev lamah feh i. 2Abram khiah sum le ngun le sui tamngai nai ai milian ngai i. 3Abram khai Negev in Bethel ah feh ai ciata in Bethel le Hai laklawh ai a ngom in a buk le 4raithawi hmun awlta a sa hmun ah feh i. Ciata ah Pathian hming khiah ko i.
5Lot khai Abram hlun ve ai amah in kawlpaw le sum le buk tamngai nai ve i. 6Ciamanin hmunkhat in um tlaang tuhin cia ramin cawm ben lo i. Ziangmanti fangin amahte naihhnak khiah tam ze manin hmunkhat um tlaang thill lo i. 7Ciafangin Abram kawlpaw khaltute le Lot kawlpaw khaltute khiah hau dun i. Cia ramah Periz mite le Khanaan mite lo um ve i. 8Cia manin Abram in Lot hnenah, “Kin panih le i kawlpaw khaltute le na kawlpaw khaltute lakah hau dunhnak um tuh lo in na ngen ing. Ziangmanti fangin unau i sing. Na hmai ah he ram um bial i lo im? I hnenin khek tuhin na ngen ing. Kekeh lamah feh lesikhaw kiahhan lamah feh tuh ing. Cen kiahhan lamah feh na nuam lekhaw kekeh lamah feh tuh ing. ” ti in rel i. 10Lot khai khuahlir in sik fangin Jordan ram khiah hmu i. Cia ram khiah BAWIPA vuandum bang in nuamhmun caang ah ti khai um ai zawl khai zawllai i le Zoar hnenlam ai Izip ram bang i. Cia khiah BAWIPA in Sodom le Kawmawrah hnawmcan hlanah i. 11Ciamanin Lot in Jordan ram khiah ril ai nisuah hmun lamah ah feh le Abram le Lot khiah khek kawm i. 12Abram khai Khanaan ramah um ai Lot khai zawllai hmunai khuapuite hnenah um ai Sodom hiang ah buk sa i. 13Ikhalselai Sodom minung te khiah BAWIPA hmai ah misual le mi siava thimang i.
14Lot thawn a khek hnua fangin BAWIPA in Abram hnenah, “Na umhmun in na ziatlam le saklam le na vailam le na hlanglam sik tulai 15Na hmuhnak ram hmuah nangmah le na cii hnenah a kumkhua in ping tuhin na pe tuh ing. 16Na cii khiah laivut zahin bawn tuh ing. Ciamanin laivut siar bentu in na cii khai siar ben tuh i. 17Tho tulai he ram a saulam le a kaulam khiah fehin tek tu. Ziangmanti fangin he ram khiah na pe tuh ing. ” ti in rel i. 18Ciafangin Abram khai a buk khiah bal ai Hebron ai Mamre thing lian ngai hiang ah um ai ciata ah BAWIPA hnenah raithawi hmun awlta sa i.