Aizek le Rebekah
1Abraham khai kum tar ngai i hang le Bawipa in Abraham khiah a zongza in hmuifu bur i. 2Ciafangin Abraham in a naihhnak zaizongza kilkhawltu a hnenum a upaber hnenah, “Na kut khiah i kalkua lakah dah tu. 3Van le laivum Pathian Bawipa hmai ah he tih bangin thu i kam tu: i fapa in he kin umhmun Khanaan mite fenute nu lo in nangmah in i keuh hmun ram le i unaute hnenah i fapa Aizek nu sii sah tuh i si.” ti in thu kam ruai i. 5Ciafangin a hnenum in, “Thuthimhnak in cia nupang in he ramah i hlun nuam pang hlahselai, na keuh hmun ramah na fapa khiah kawih ngang?” ti in sawn i. 6Ciafangin Abraham in, “I fapa khiah cia ramah kawih tuh lo in raalring tu. 7I paa inn songin le i unaute ramin i lang tu le i hnenah ‘he ram khiah na fa hnenah pe tuh ing.’ ti ai thu i kam tu vancung ai umtu Bawipa Pathian in na hlanah amah vancung mi hlat tuh ai cia ramah i fapa ca in nu tawk tuh i si. 8Cen cia nupang in na hlun nuam hlahlekhaw na thukamhnak songin na luat tuh i. I fapa zong cia ramah kawih mah.” ti in sawn i. 9Ciafangin a hnenum in a kut khiah a bawipa Abraham kalkua lakah dah ai ciatih bangin thukam i.
10Ciafangin cia hnenum khai a bawipa naihhnak hmuah khiah amah in peng manin kala-uk sawmkhat lang ai Mesopotamia ramai Nahor khua ah feh i. 11Cia khua pua ah hleng fangin zanlam nupangte in ticawi hmun namkum hiang ah a kala-ukte khiah bok ruai ai, 12“I bawipa Abraham Bawipa Pathian, ninghio na ngen ing: I bawipa Abraham khiah ninghio tulai tunnia i khualsihnak hlawhtling ruai tu. 13Tun he namkum hiang ah ding ing. Cen khua songai fenute khiah ticawi tuhin kawi i. 14Ciamanin fenu niu pakhat hnenah, ‘Na balti in ticawi tulai ninghio in ti ding tuh i pe tu.’ ti in ti ngangkhaw ciafangin ani in, ‘Ti ding tu. Cen na kala-ukte khai ti na tul sah ngang.’ti ai i sawn tu nuu khiah na hnenum Aizek ca ai dahcia hnak nuu lo i tu seh. Ciatih bangin nang in i bawipa khiah na ninghiohnak hmuh i si ti ling tuh ing.”ti in sawngen i.
15Ciatih ai a sawngen ben hlanah Abraham nau Nahor nu Milkah fapa Bethuel songai tehnak Rebekah khiah a kodar ah balti thawn kawi i. 16Cia fenu khiah hmel mawi ngai i ai aisu pasal thawn khai it awng lo fenu i. Ani khai namkum songah theuh ai a balti songah ti a dimin thun ben fangin hong leh i. 17Ciafangin cia hnenum pa khai cia nuu tawk tuhin dawp ai, “Na balti songai ti ding tuh in ninghio na ngen ing.” ti in ti i. 18Cia fangin cia nuu in, “I bawipa, ding tu.” ti in ti ai ani khai a rang ngai in a balti khiah a kutin sin ai ti ding tuhin cia hnenum pa khiah pe i. 19Amah pe ben fangin, “Na kala-uk te in a kham tianin ding tuhin ti na cawi sah ngang.” ti in ti ai 20Cia nuu khai a rang ngai in kuang songah balti thawn ti khiah lai ai namkum songah ticawi tuhin dawp ai kala-uk veksen ca in ticawi sah i. 21Ciafangin cia hnenum pa khai a multing ngai in Pathian in a khualsihnak khiah hlawhtling ruai i nim ti in ruat kongin pong lo niu in um i.
22Kala-ukte ti ding ben sek fangin cia pa in shekel hrek rit sui bilvuh le shekel sawmkhat rit sui nguun panih khiah cia nuu kut ah ru tuh in pe ai, 23“Ninghio in i rel tu. Aisu fenu i si? Na paa inn ah zancam hmun nai aw i sim?” ti in zawt i 24Ciafangin cia nuu in, “Kaimah khiah Nahor le Milkah fapa Bethuel ai fenu ing.” ti in sawn i. 25Ciahlai ah cia nuu in, “Hampa le rong khai tam ngai nai i ing. Cen camhmun tuh khan khai nai i ing.” ti in sawn i. 26Ciafangin cia pa khai a lu ut ai Bawipa bia i. 27“I bawipa Abraham ai Bawipa Pathian khiah hmuifu tu seh. Ziangmanti fangin i bawipa hnenah thuhman le ngaihharhnak khiah amah in pe i. Cen kai khai Bawipa in lamlakah kong i hoi ai i bawipa ulenaute innah kong i hoi i.”ti in ti i. 28Ciafangin fenu niu khai dawp ai he thute khiah a nuute innkua hnenah rel i. 29Rebekah in hmingpa pakhat nai ai a hming khiah Laban i. Laban khai namkum hnenai cia pa hnenah dawp i. 30Laban in a farnu bilvuh le a nguunte khiah hmu ai a farnu Rebekah in, “He pa in ciatih in rel i.” ti za fangin ani khai cia pa hnenah kawi ai cia pa khiah namkum hiangah kala-uk kawmin ding khiah hmu i. 31Ciafangin Laban in cia pa hnenah, “Bawipa ai hmuifu burhnak pa, tlum tu. Ziangmanin sumpua ah ding i si? Ziangmanti fangin inn le kala-ukte ca in umhmun remcia zo ing.” ti in ti i.
32Cia pa khai inn songah tlum ai a kala-ukte thil hma sah le hampa le rong khiah pe ai amah thawn feh tu mite kawmin a ke somhnak tuh ti khai pe i. 33Anite in amah khiah rong ei tuhin rong suah fangin cia pa in, “Zaimanin heta ah kawi ing tihnak thu ning rel hlanah rong ei tuh lo ing.” ti in ti ai amah in, “Rel tu.” ti in ruai i.
34Ciafangin cia pa in, “Kaimah khiah Abraham hnenum ing. 35Bawipa in i bawipa khiah hmuifu burh rauh manin milian ngai i. Bawipa in amah khiah tu le kawlpawte le ngun le sui le pasal hnenum le nupang hnenum le kala-uk le lak tamngai pe i. 36Cen i bawipa nu Sarah in a tar hnua ah fapa pakhat cawi ai Abraham in a naihhnak hmuah a vekin pe sio i. 37Cen i bawipa in, ‘He i umhmun ai Khanaan fenute khiah i fapa in nu tuh lo i. 38Ikhalselai nangmah khiah i paa inn le i unaute hmunah feh tuhai i fapa ca in nu lang tuh i si.’ ti in thu i kam ruai i. 39Ciafangin kai in i bawipa hnenah, ‘Cia nuu in i hlun nuam lo pang selai,’ ti in sawn ing. 40Amah in, ‘I biahnak Bawipa in a vancung mi in na hlun ruai tuh ai na khualsihnak khiah hlawhtling ruai tuh i. Ciamanin i fapa ca in i unaute le i paa inn song ai nu pakhat lang tuh i si. 41Cen i unaute hmunah na hleng fangin i thukamhnak songin na luat tuh i. Cen amahte in nupang na pe hlahlekhaw i thukamhnak songin na luat tuh i.’ti i ti i.
42Cen tunnia ah he namkum hnenah hleng ai, ‘Aw i bawipa Abraham Bawipa Pathian, i lamvak hnak hlawhtling ruai lesikhaw 43tunin namkum hiang ah ding ing. Fenu niu pakhat khiah ticawi tuhin hleng fangin, ‘Na balti songai ti ding tuhin na ngen ing.’ti in ti fangin 44cia nuu in, ‘Ti ding tulai na kala-ukte ca in khai ti na cawi sah ngang.’ti ai i ti tu nuu khiah Bawipa in i bawipa fapa ai nu tuhai dah ciahnak i tu seh.’ ti in ti ing.
45I thin songin ciatih ai i pong ben hlanah Rebekah khai a kodar ah balti thawn kawi ai namkum songah theuh le ticawi i. Ciafangin kai in, ‘Ti ding ngang.’ ti in ngen ing. 46Ciafangin ani khai a rang ngai in a kodar ai balti khiah hma ai, ‘Ding tulai na kala-ukte khai ti tul ngang.’ti in i ti i. Ciamanin kai khai ti ding ai ani in khai kala-ukte khiah ti tul ve i. 47Ciafangin kai in, ‘Aisu fenu i si?’ ti in zawt ai, ‘Nahor fapa Bethuel le Milkah fenu ing.’ ti in i sawn i. Ciafangin bilvuh khiah a hmaiah ton sah ai nguunte khiah a kut ah ruk ing. 48Ciafangin kai khai i lu ut in Bawipa khiah bia ai i bawipa Abraham ai Bawipa Pathian khiah hmuifu pe ing. Ziangmanti fangin i bawipa nau ai fenu khiah a fapa ai nu tuhin lampui hmanniu in kong i hoi i. 49Cen tunin i bawipa khiah ninghio tuh le a ngaingai in bawm tuh le tuh lo i rel tuu-ih. Ziangmanti fangin kiahhan lam maw kekeh lamah feh tuh ling i nuam i.”ti in rel i. 50Ciafangin Laban le Bethuel in, “He heh Bawipa ai bawnhnak i. Ciamanin a pha le a pha lo rel thill lo i ing. 51Rebekah khiah na hmai ah um i. Bawipa relhnak bangin na bawipa ai fapa nu cang tuhin lang tu lai feh tu.”ti in sawn i.
52Abraham hnenum in amahte relhnak za fangin Bawipa khiah bia ah laipua ah bok i. 53Ciafangin cia hnenum pa in ngun le sui hlawnthil le thilthuam khiah kawih ai Rebekah pe i. Cen a hmingpa le a nuu khai thil mankhung te sum i. 54Ciafangin anite khai ei le ding in um tlaang ai zancam i. A thangha tho fangin, “I bawipa hnenah tlung tuhin i hlat tuu-ih.” ti in ti i. 55Ciafangin a hmingpa le a nuu in, “Rebekah khiah kin thawn in ni 10 tengteng um rih tu seh. Ciaben fangin feh tu seh.” ti in ti i. 56Ciafang in ani in, “I kham mah ih. Ziangmanti fangin Bawipa in i khualsihnak hlawhtling ruai zo i. I bawipa hnenah feh tuhin i hlat tuu-ih.” ti in ti i. 57Ciafangin anite in, “Fenu nu ko nga singkhaw amah zawt nga sing.” ti in ti i. 58Anite in Rebekah khiah ko ai, “He pa thawn feh na nuam awm?” ti in zawt fangin Rebekah in, “I nuam i.” ti in sawn i. 59Ciafangin anite khai amahte farnu Rebekah khiah a hnenum thawn Abraham hnenum le a hluntu mite kawmin feh ruai i. 60Amahte in Rebekah khiah hmuifu pe ai, “Nangmah khiah kin farnu i si. Mi thawng tam ngai te nuu lo na cang tu seh. Na cii in a huatute khiah neh tu seh.” ti in ti i.
61Rebekah khai a hnenum thawn tho ai kala-uk to ai cia pa hlun i. Cia hnenum pa in Rebekah khiah lang ai tlung teu i. 62Aizek khai Beer Laha-roi lamin kawi i. Ziangmanti fangin amah khiah Negev ramah um i. 63Aizek khai zanlam fangin lo lakah sawngen tuhin feh ai ani khai vancau in khuahlir fangin kala-uk te hleng lianglo hmu i. 64Rebekah khai vancau in khuahlir fangin Aizek hmu ai kala-uk vumin tolh i. 65Ziang manti fang in hnenum pa hnenah, “Lo lakin vak ai kin caang tu pa tu aisu i pa?” ti in zawt i. Hnenum pa in, “I bawipa i.” ti in sawn le Rebekah khai ponniu lang ai amah veve khuk i. 66Hnenum pa in Aizek khiah a bawnhnak hmuahhmuah relsio i. 67Aizek in Rebekah khiah a nuu Sarah buk songah tlun ai Rebekah khai a nu cang i. Aizek in Rebekah khiah it i. Ciamanin Aizek khai a nuu thi hnua fangin thinnuam i lai.