Abraham ai a dang fate
1Ciafang Abraham in nu pakhat nai leh thio ai a hming tu Keturah i. 2Keturah fate khiah Zimran le Jokshan le Medan le Midian le Ishbak le Shuah i. 3Jokshan in Sheba le Dedan nai i. Dedan fapate khiah Asshurim le Letushim le Leummim te i. 4Midian fapate khiah Ephah le Epher le Hanok le Abidah le Eldaah te i. Hete khiah Keturah fate i. 5Abraham in a naihhnak a vekin Aizek pe i. 6Cen a nunawnte fate tu Abraham in lehsawng pe ai a nung lai in Aizek hmunin nisuak hmunlam ramah feh ruai sio i.
7A veksenin Abrahama khiah kum 175 nung i. 8Ciaben fangin Abraham khai vel hnuataber haihawh ai thi i. Ciatih in Abraham khai kum sau ngai nung ai a tarpui in thi le amah minungte lakah vui i. 9A fapa Aizek le Ishmael in Abraham khiah Hit mi Zohar fapa Efron lo song ai Mamre ralkhat ai Mekpelah khukua songah vui i. 10Cia lo khiah Abraham in Hit fapa te hnenah laihnak lo i. Ciata ah Abraham khiah vui ai a nu Sarah vui hmun khai i. 11Abraham thi hnua fangin Pathian in a fapa Aizek khiah hmuifu bur i. Ciateng in Aizek khai Beer Lahai-roi hiang ah um i.
Ishmael fate pawl
12He thu khiah Sarah hnenum Izip nupang Hakar le Abraham ai cawihnak Abraham fapa Ishmael thu i. 13He hming te khiah Ishmael fate hming i ai amahte a sangdun in khumhnak i. Ishmael fa upaber Nebaioth i. Cia sang tu khiah Kedar, Adbeel, Mibsam 14Mishma, Dumah, Massa, 15Hadad, Tem, Jetur, Naphish le Kedemah te i. 16Hete khiah Ishmael fate i ai he hmingte khiah amahte khuato hmun le buk bangin khuabawi hlainihte hming i. 17A veksenin Ishmael khai kum 137 nung ai haihawh a hnuataber hawh ben fangin thi ai amah minungte lakah vui i. 18A tesin fate khiah Havilah ai panin Shur tianah khuato tlaang i. Shur khiah Asiria lamah kawi fangin Izip ram in nisuah hmun lamah i. A thi fangin a ulenaute khiah a veksen in um i.
Zakuk le Esau thu
19He khiah Abraham fapa Aizek thu i. Aizek paa khiah Abraham i. 20Aizek khiah Padan Aram ai Aramean mi Bethuel fenu le Laban farnu Rebekeh nu fangin kum 40 i. 21Rebekah khiah fatong manin Aizek in a nu ca in Bawipa hnenah sawngen i. Bawipa in a sawngen hnak khiah ngai sah ai Rebekah khai fapai i. 22Ciafangin a songah a fate khiah tet dun hnelhno fangin, Rebekah in, “Zaimanin hetih i pa?” ti in ti i. Ciamanin ani khai Bawipa zawt i. 23Ciafangin Bawipa in,
“Na songah mi phun nih um i. Mi phun nih khiah na songin suak tuh i. Mi phun khatta sawn khiah a khatta hnak in cak tuh sawn ai a u khiah a nau hnenum cang tuh i.”
ti in rel i.
24A nau te cu fangin a songah nau pasal a phir in lo um i. 25A suak hmasa pa khiah a san lo i ai a ruang pumpalah khiah angki hmul bang in khuk i. Ciamanin a hming khiah Esau ti in sa i. 26Ciahnua fangin a nau khiah suak ai a kut in Esau keruh khiah pom i. Ciamanin a hming khiah Zakuk ti in sa i. Rebekah in he fate nai fangin Aizek khiah kum 60 i.
27Cia naupangte khiah khang fangin Esau tu muksu cang ai hampalakah um i. Zakuk tu a dapniu in buk songah um menma i. 28Aizek in Esau sakap hnak ei sah manin Esau khiah daih sawn i. Ikhalselai Rebekah in Zakuk daih sawn i.
29Velkhat ah Zakuk in kawk suang teng fangin Esau khai hampalak in rikam ngai in hleng i. 30Ciafangin Zakuk hnenah, “Ri i kam ze i. Na kawk san khiah i pe tu.” ti in Zakuk ngen i. Ciamanin amah khiah Edom ti in ko i. 31Ciafangin Zakuk in, “Fa upaber ro na co tuh hnak i zuarh hmasa rih tu.” ti in sawn i. 32Ciafang Esau in, “I thi banghma i. Ciamanin fa upaber ro i co tuh tu ziang hnempui i?” ti in sawn i. 33Ikhalselai Zakuk in, “Thu i kam hmasa tu.” ti in ti i. Ciamanin Esau in Zakuk khiah thukam ai a upaber ro khiah Zakuk hnenah zuar lio i. 34Ciafangin Zakuk in Esau khiah sang le be kawk pe i. Esau khai ei le ding ben fangin tho ai tlan i. Ciatih bangin Esau in a upaber ro khiah zaikhai nam lo i.