1Rachel in Zakuk facawi sah lo hmu fang in, a u Leah khiah iksik i. Ciamanin Zakuk hnenah, “Fa i pe tu. Cia hlahle thi tuh lio ing.” ti in ti i. 2Ciafangin Zakuk khai raw ai, “Pathian in fa na pe lo i. Kai tu Pathian ing?” ti in sawn i. 3Ciafangin Rachel in, “He i hnenum Bilhah na pe ing. Amah thawn itkhat tulai fa i cawi sah tu seh. Ciafang kai khai fate nai ve ngang.” ti in ti i. 4Ciamanin Rachel in Bilhah khiah Zakuk nu tuhin pe i. Ciafang Zakuk khai Bilhah thawn itkhat ai, 5ani khai naupai le nau pasal niu in nai i. 6Ciafangin Rachel in, “Pathian in i map zo i. I ninghio kunhnak khiah i ngai sah ai fapa i pe i hang.” ti in ti i. Ciamanin a hming khiah Dan ti in ko i. 7Rachel hnenum Bilhah in fapai leh thio ai fapa panihhnak nai leh thio i. 8Ciafangin Rachel in, “I u thawn tawng kawm ai kai in neh lio ing.” ti in ti ai cia nau khiah Naphtali ti in ko i.
9Leah khai fa nai lo in um ngio fangin a hnenum Zilpah khiah a nu tuhin Zakuk pe i. 10Ciafangin Zilpah in fapa niu nai i. 11Ciafangin Leah in, “Bawng i pha i.” ti in ti ai cia nau khiah Kad ti in ko i. 12Leah hnenum Zilpah in fapa panihhnak nai leh thio i. 13Ciafangin Leah in, “Zaitluk in i ang i. Nupuite in, hmuifu i, i ti tuh i.” ti in ti ai cia nau niu khiah Asher ti in ko i.
14Sangvut rongkhawm cu teng in, Reuben in mandrek tihnak papar kung tawk le a nuu Leah hnenah kawih i. Ciafangin Rachel in Leah hnen ah, “Na fapa ai mandrek a hrekkhat i pe tu.” ti in ngen i. 15Ikhalselai Leah in, “I pa i lang sah lio; lung na khim lailo im? I fapa ai mandrek tang sut tum i lai sim?” ti in ti i. Ciafangin Rachel in,“Cia ilekhaw, na fapa ai mandrek ca in tun zanah Zakuk khiah na hnenah it tu seh.” ti in ti i. 16Ciamanin Zakuk khai lo in zanlam fangin tlung fangin, Leah in caang ai, “I hnenah it tuh i si. I fapa ai mandrek thawn na hlawh zo ing.” ti in rel i. Ciamanin Zakuk khai cia zanah Leah thawn itkhat i. 17Pathian in Leah khiah ngai ai Leah khai naupai le a pangahnak fapa nai i. 18Ciafangin Leah in, “I pa hnenah i hnenum pe manin Pathian in hlawh i tham i.” ti in ti ai a fapa khiah Issakhar ti in ko i. 19Leah khai naupai leh thio ai a parukhnak fapa nai i. 20Ciafangin Leah in, “Pathian in a mankhung lehsawng i pe zo i. Fapa paruk cawi sah zo manin tun ngawn i pa in i upat tuh i.” ti in ti ai a fapa hming khiah Zebulun ti in ko i. 21Ciahnua lam fangin Leah in nupang niu nai ai Dinah ti in a hming ko i.
22Ciafangin Pathian in Rachel khiah hih ai Rachel khiah ngai ai naupai siang i. 23Rachel khai ciamanin naupai ai pasal niu in fa nai manin, “Pathian in i hmaisia hnak i lang sah lio i hang.” ti in ti i. 24A fapa hming khiah Joseph ti in ko ai, “BAWIPA in a dang fapa lo i pe rih tu selaw.”ti in ti i.
25Rachel in Joseph nai ben bangin Zakuk in Laban hnenah, “I khua le ramah tlung tuhin i hlat tu. 26Na naper sah man ai i ngahhnak i nute le i fate i pe tulai tlung ngang. Cen zaizah na naper sah khiah ling i si.” ti in ti i. 27Ikhalselai Laban in, “I lakah lung na khim lekhaw, um rih tu. Nangmah manin BAWIPA in hmuifu i bur khiah i tlahsanhnak in ling ing.” ti in ti i. 28Cen Laban in, “Zaizah tham na daih i ti i rel tulai na tham tuh ing.”ti in khai ti i. 29Ciafangin Zakuk in, “Kontih bangin na naper sahhnak le kontih bangin na sumte khiah i khalhnak in khang khiah ling i si. 30I hleng hlanai a tlawmniu na naihnak khiah a tamngai in khaang ai BAWIPA in i umhmun caangah hmuifu na burh i. Ikhalselai zaikom fangin kaimah innkua ca bawn man tuh ing?” ti in ti i. 31Ciafangin Laban in, “Zai na pe ngang.” ti in ti i. Zakuk in, “Zaikhai i pe mah. Ikhalselai he pakhat khiah i bawt tulai na tuu le mete khiah na khal sah in na sik sah tuh ing. 32Tunnia ah na tuu le mete lakah feh ngangkhaw, na tuu a caante le a ngaante le na tuu fa a darhte le na me a caan le a ngaante khiah a tumce in dah ngangkhaw ciate khiah i hlawhtham i tu seh. 33Ciafangin tunhnua ah na hlawhthamhnak na zong fangin a dikcang i nun dan ziaza in tetti i khan tuh i: I tuu songah a caan le a ngaan le tuu fa a darh um lo tuu le me um lekhaw cia tu le me te khiah a ruhnak i ti in ruat thai i.”ti in sawn i. 34Ciafangin Laban in, “Lung i khim i. Na relhnak bangin i tu seh.” ti in ti i. 35Cia nia pah Zakuk in a ngaan le a caan me cang le a caan le a ngaan me nu (a hmul ngo nai pawl hmuah) le tuu fa darh hmuah khiah khan sio ai a fate in khal tuhin ap i. 36Ciafangin Zakuk khai Laban hmunin ni thum tian hla hmunah thawn ai Zakuk in Laban tuu le mete khiah khal sah i.
37Ciafangin Zakuk in poplar le almon le plain thingkakte khiah vong ai a kawng khiah hlik ai a thing ngo khiah laarruai ai a kawng le a ngo khiah roih in bawn i. 38Ciafangin cia thingkakte khiah tuu le mete ti ding tuhin kawi fangin a hmai cangah um thai in tikuang songah dah i. Tuu le me te khiah tiding tuhin kawi fangin 39cia thingkak hmai ah bawk dun le a niute nai fangin a niute ciah a caan le a ngaan in te i. 40Zakuk in tu le me niu te khiah a tum ce in dah ai a dang hmuah tu Laban ai a ngaan le a hang tuu le mete thawn pawl ruai i. Ciatih in a tuu le a mete khiah a tumce in dah ai Laban tuu le mete thawn hmunkhat in dah lo i. 41A pha deuh tuu le me te bawk dun fangin thingkakte hiang ah bawk dun thai in Zakuk in thingkakte khiah tikuang songah dah i. 42A hnawm deuh tuu le mete bawk dun fangin thingkakte khiah dah lo i. Ciamanin a hnawm deuh tuu le mete khiah Laban sum cang ai a pha deuh te khiah Zakuk sum cang i. 43Ciatih bangin Zakuk khiah siarmawti in lian ai tuu le me rual tamngai nai ai pasal hnenum le nupang hnenum le kala-uk le lak khai nai bial i.