Laban hmunin Zakuk tlan i
1Laban fate in, “Zakuk in kin paa naihnak thil hmuah ping sio ai kin paa naihnak a sumsaw hmuah co liang i.”ti ai rel khiah Zakuk in za i. 2Cen Laban in a lakah hlanlai bangin a hmaizal lo khai Zakuk in hmu i. 3Ciafangin BAWIPA in Zakuk hnenah, “Na pupa ramah le na songkhatte hnenah tlung leh tulai kaimah khai nangmah thawn umkhat tuh ing.” ti in rel i. 4Ciaman in Zakuk in Rachel le Leah khiah a tuu le mete um hmun hampalakah kawi ruai i. 5Ciafangin amahte hnenah, “Ning paa in i lakah hlanlai bangin a hmaizal lo i ti khiah hmu ing. Ikhalselai i paa ai Pathian khiah kaimah thawn umkhat i. 6Ning paa khiah i tha nai tawp in a na per sah khiah i ling i si. 7Inapui ai ning paa in i zawl ai i hlawhtham khiah vel 10 i thleng sah i. Ikhalselai Pathian in ning paa in i ur ruai siang lo i. 8Amah in, ‘A ngaan hmuahhmuah na hlawhtham i tuh i.’ ti fangin tuu le me hmuah in a ngaan fa nai sio i. Cen amah in, ‘A caan hmuah khiah na hlawhtham i tuh i.’ ti fangin tuu le me hmuah in a caan in te i. 9Ciamanin Pathian in ning paa tuu le mete khiah sut berh ai i pe berh i hang.
10Tuu le me te fa nai cu teng in mang pakhat man awng ing. I mang in me nu te bawk tute me cang te khiah a caan le a ngaan le a hang i. 11I mang in Pathian vancung mi in, ‘Zakuk.’ ti in i ko ai kai in, ‘Heta ah um ing.’ ti in sawn ing. 12Ciafangin amah in, ‘Me nute bawk tu me cang te khiah a caan le a ngaan le a hang i ti khiah sik tulai hmu tuh i si. Ziangmanti fangin Laban ai na vumah bawnhnak khiah hmu zo ing. Bethel ah khan bawn ai sathau pawh awng i si. Kaimah khiah cia Bethel ai Pathian ing. Ciata ah thu i kam awng i si. Cen tunin he ram in tlan tu zual lai nangmah ramah tlung tu teu.’ ti in i rel ii” ti in rel i. 14Ciafang Rachel le Leah in, “Kin paa hmunin co tuh ro nai aw lai sing? 15Amah in mi ramdang minung bang in kin ruat te i lo im? Kin zuar lek i lo ai kin ca ai laizo hnak kin thil khai kin hmang sah sio i lo im? 16Pathian in pa hnenin lang sumsaw hmuahhmuah khiah kinte le kin fate ai i peu i. Ciamanin Pathian ai na rel bangin bawn tu.” ti in ruai i.
17Ciafangin Zakuk in a fate le a nute khiah kala-uk vumah tauh ai, 18Khanaan ram ah a paa Aizek hnenah feh tuhin Paddan Aram ai a khawlhnak a thilrite le a sumte khiah a hmai ah feh ruai i.
19Laban khai a tuute hmul met tuhin feh fangin, Rachel in a paa inn ai milim zukte ru sah i. 20Ciahlai ah Zakuk in Aramean mi Laban khiah zawl ai a tlan teu khiah rel lo i. 21Ciatih in Zakuk khai a naihnak hmuah kawmin tlan ai Runti khiah kal ai Kilead mualtlaang ramah feh i.
Laban in Zakuk hnawh i
22Nithum fangin Zakuk tlan teu i ti in Laban rel i. 23Ciafangin Laban khai a unaupui te thawn Zakuk khiah ni sarih hnawh ai Kilead mualtlaang ah man i. 24Ciafangin Pathian in Aramean mi Laban hnenah zanlai a mang in, “Zakuk hnenah a pha le a pha lo rel tuh lo in ralring tu law.”ti in rel i.
25Zakuk khai Laban in man fangin Kilead mualtlaang ramah buk sa teng i. Laban le a unaute khai ciata ah zancam ve i. 26Ciafangin Laban in Zakuk hnenah, “Ziang bawn i si? I zawl ai i fenute khiah raal lakai pomhnak thawngtlate bang in tlanpui i si. 27Zaimanin a thupniu in tlan ai i zawl i si? Ziangmanin i rel lo i si? Khuang le dar tumin lasa le ang ngai in na hla thai i napui ing. 28I tute le i fenute ponhla tuh a khuan peu i pe lo i si. 29Na ur ruai thaihnak power nai napui ing. Ikhalselai mi zanah na paate Pathian in i hnenah, ‘Zakuk hnenah a pha le a pha lo rel tuh lo in ralring tu law.’ i ti i. 30Na paate inn ngai manin tlung teu i si. Ikhalselai zaimanin i milim zukte i ru sah i si?” ti in ti i. 31Ciafangin Zakuk in, “Na fenute khiah i hnenin a khengkhebel in i lang sah tuh na vuah manin i lau i. 32Ikhalselai na milim zuk naitu tawk lesikhaw cia pa khiah nung tau ma seh. He kin unaute hmai ah na thilri khiah i hnenah um le um lo sik tu. Um lekhaw lang tu lio.” ti in rel i. Rachel in milim te lo ru lio khiah Zakuk in ling lo i.
33Ciamanin Laban khai Zakuk buk le Leah buk le hnenum nute panih buk ah lut ai ziang khai tawk lo i. Leah buk in suak ben fangin Rachel buk songah lut ti. 34Rachel in cia milimte khiah lo ru le kala-uk kung hnia ah thup ai a vumah to i. Laban in buk song ah a vek in sii ai zaikhai tawk lo i. 35Ciafangin Rachel in a paa hnenah, “Na hmai ah ding thill lo manin thin lo raw mah, i bawipa. Thi nai teng ing.” ti in rel i. Ciamanin Laban in sii napui ai milim zukte khiah tawk lo i. 36Ciafangin Zakuk khai thinraw ai Laban khiah, “I bawn sualhnak ziang um i? Ziang sualhnak bawn manin i zul ngerngo i si? 37Cen tunin i thilri hmuah sii dek i sikhaw na thilri zai tawk pa si? He kin unaute hmai ah dah tu cuk lai amahte in thu kin khan sah tu seh. 38Nangmah thawn kum 20 um zo ing. Na tuu le mete in a fazul awng lo i. Cen na sum lakai me cangte khai na ei sah awng lo ing. 39Ramsate ai dawphnak na sumte khiah na kawih sah awng lo ing. Kaimah in a sung na tuar sah ing. Cen sun le zan ai mite ruhnak khai i rul ruai bel i si. 40Sun fangin nisa in i kang i. Zan fangin khuasik tuar ing. Mit khai mu thill lo ing. 41Ciatih bangin na inn ah i um song kum 20 i hang. Na fenu panih ca in kum hlaili na naper sah ing. Cen na tuu le me te ca in kum ruk per ing. Ciasongah i hlawhtham khai vel 10 thleng i si. 42I paa te Pathian, Abraham Pathian le Aizek kihhnak khiah i hnenah um ta hlahselai, kut lolek in i tlan ruai tuh zo i si. Ikhalselai Pathian in i rimsuhnak le i kut thawn i naperhnak khiah i hmu sah manin mizan ah na hau i.” ti in rel i.
43Ciafangin Laban in, “Nupangte khiah kaimah ai i. Naupangte khai kaimah ai i. He sumte khai kaimah ai i. Na hmuhnak hmuah a veksenin kaimah ai i. Ikhalselai he i fenute le a fate lakah zai bawn thil tuh ing? 44Ciamanin kawi tulai nangmah le kaimah khiah thukham dun nga sing. Kin panih hnenah tetti i tu seh.” ti in ti i. 45Ciamanin Zakuk in lungto pakhat lang ai khan bang in tung ai 46a unaute hnenah, “Lungto thiar tuu-ih.”ti in ruai i. Ciamanin anite khai lungto thiar ai hmunkhat in pum ai cia lungto hiangah rong ei tlang i. 47Cia lungto khiah Laban in Jekar Sahadutha ti in ko ai Zakuk in Kaleet ti in ko i. 48Ciafangin Laban in, “He lungto kin pumhnak khiah tunnia ai panin nangmah le kaimah lakah kin tetti i.” ti in ti i. Ciamanin Kaleet ti in ko i. 49Cen Mizpah ti in khai ko i. Ziangnmanti fangin amah in, “Nangmah le kaimah khiah pakhat le pakhat hmunin a khek ai kin um fangin BAWIPA in lo kin kilkhawl tu seh. 50Cen i fenute khiah siatsuah i tu seh, i fenute siarlo a dang nu nai lesikhaw, aisu in khai kin hnenah um napui lo ai Pathian khiah nangmah le kaimah lakah kin tetti i ti khiah lo hih tu law.” ti in ti i.
51Ciafangin Laban in khai Zakuk hnenah, “He lungto pumhnak le he khan hmu i si. Nangmah le kaimah laklawh ah sa ing. 52He lungto pumhnak le he khan khiah tetti pakhat veve i. Ciamanin he lungpum hmun kaan in na tawng tuhin feh tuh lo ing. Cen nang in khai i tawng tuhin he lungto pumhnak le he khan kaan in feh tuh lo i si. 53Abraham Pathian le Nahor Pathian le a paate Pathian in thu lo kin khan sah tu seh.” ti in khai rel leh thio i. Ciamanin Zakuk in a paa Aizek Kihhnak hming in thukham i. 54Cia mualtlang ramah Zakuk in raithawi ai rong ei tuhin a unaute khiah ko i. Amahte in rong ei ben fangin ciata ah zancam i. 55A thangha zingniu fangin Laban in a tute le a fenute khiah thut ai hmuifu bur i. Ciafangin ani khai a inn ah tlung i.