Joseph le Potiphar ai nu thu
1Joseph khai Izip ah Ishmael te in zuk teu i. Pharaoh kiltute bawi Izip minung pakhat Potiphar in Ishmael te hnenin Joseph khiah lai i. 2BAWIPA khiah Joseph thawn um ai Joseph khiah bawm ai Joseph khai a Izip bawipa inn ah um i. 3A bawipa in Bawipa khiah Joseph thawn um ai a bawnhnak hmuahhmuah khang ruai i ti hmu fangin 4a bawipa in Joseph khiah daih ai a hnenum cang ruai i. 5A inn songai thilri le a naihnak hmuahhmuah Joseph kut ah ap fangin Joseph manin Bawipa in Izip pa khiah hmuifu bur i. Bawipa in Potiphar naihnak hmuah a inn songai i tu seh a lo songai i tu seh hmuifu bur i. 6Ciamanin a thil hmuahhmuah khiah Joseph ap liang ai Joseph in uk liang manin a eihnak rong siarlo ziangkhai ruat lo in Potiphar khai um i. Ciafangin Joseph khiah a ruang le a hmel mawi ngai i. 7Zai cam lo fangin a bawipa nu in Joseph khiah tlak ai Joseph hnenah, “I hnenah it tu.” ti in ruai i. 8Ikhalselai Joseph in el ai cia nuu hnenah, “Kaimah heta ah um manin, i bawipa in a inn songai zai thil khai ngaisung lo in um ai a naihnak hmuah i kut songah a veksenin i ap liang i. 9He inn songah kaimah hnak in lian sawn um lo i. I bawipa in zaizai khai i kham lo i. Nangmah lek i kham i. Ziangmanti fangin nangmah khiah a nu i si. Ciamanin a kontih in he bang a siava khiah bawn in Pathian lakah sual thill tuh ing?” ti in rel i.
10Ni khat hnua ni khat cia nuu in Joseph hnenah sual kawm tuhin so napui hnelhno ai Joseph in cia nuu thawn it khai nuam lo ai, pon khai pon nuam lo i. 11Ni khat nia ah Joseph khai a naper tuhin inn songah kawi le ciafangin inn songah a dang hnenumte um lo i. 12Ciafangin cia nuu in Joseph khiah a angki in rin ai, “It kawm nga sing.” ti in ti i. Ikhalselai Joseph khai a angki khiah cia nuu kut songah hlum ai inn songin suak teu i. 13Cia nuu in a angki khiah a kut songah hlum ai inn songin suak teu hmu fangin, 14cia nu in a hnenum te ko ai, “Sik tuu-ih. He Hebru pa khiah kin zauhsuam tuhin kin hnenah kawih i. Kai thawn it nuam in heta ah kawi manin au ing. 15I auhnak za fangin a angki khiah i hiang ah zam ai inn songin suak teu i.” ti in rel i. 16Joseph bawipa inn tlung hlanlo cia nuu in a angki khiah a hiang ah dah hlen i. 17Ciafangin amah khiah hetih in rel i: “Na kawihhnak Hebru salpa in i hnenah zauh i suam tuhin kawi i. 18Ikhalselai kai in au fangin a angki khiah i hiang ah zam ai inn songin suak teu i.” ti in rel i.
19A bawipa khai a nu in “Na salpa in hetih in bang in zauh i suam i.” ti ai relhnak thu za fangin thinraw ngai i. 20Ciamanin ani in Joseph khai pom ai kumpibawipa thawngtla te thawnginn ah haih i. Ikhalselai Joseph khai thawnginn ah um fangin, 21 Bawipa khiah amah thawn um ai amah khiah ninghio ai thawnginn darvuan pa in daih thai in bawn i. 22Ciaman thawnginn darvuan pa in thawngtlate khiah a veksenin Joseph kut ah ap liang ai thawng songai zaizongza khiah Joseph tavuan in dah sah i. 23Thawnginn darvuan in Joseph kuthnia ai te khiah zai khai ruat kul lo i. Ziangmanti fangin Bawipa khiah Joseph thawn um ai a bawnhnak hmuahhmuah khim liang in bawn ben i.