1Ciafangin Israel khai a naihnak a veksen thawn feh panai Beersheba ah hleng fang in a paa Aizek Pathian hnenah a hlu raithawi i. 2Ciafangin Pathian in Israel hnenah zanlai a mangah, “Zakuk, Zakuk.”ti in ko i. Amah in, “Heta ah ing.” ti in sawn i. 3Ciafangin Pathian in, “Kaimah khiah Pathian ing. Na paa ai Pathian ing. Izip ah zu tuhin lau mah. Ziangmanti fangin mi phun lian ngai in na bawn tuh ing. 4Izip ah nangmah thawn zu tuh ve ing. Cen na tlun leh tuh ing. Cen Joseph in khai a kut thawn na mit na khuk sah tuh i.” ti in rel i. 5Zakuk khai Beersheba in thawn ai Israel fate in a paa Zakuk le a faniu niu le a nute khiah Pharaoh in Zakuk phur tuh in kuathnak kawlpaw leng thawn thiar i. 6Ciatih in Zakuk le a fate khiah Khanaan ramai amahte naihnak sumhnam le thilrite kawmin Izip ramah hleng i. 7Amah kawm in a fapate le a tute a fenute le a tute khiah amah thawn Izip ramah kawih i.
8Izip ramah Zakuk le a fapate, Israel fate hming khiah hete i: Zakuk fapa upaber Reuben le 9Reuben fate: Hanok le Phallu le Hezron le Kharmi. 10Cen Simeon fate: Jemuel le Jamin le Ohad le Jachin le Zohar le Khanaan nupui fapa Shaul. 11Levi fate: Kershon le Kohath le Merari. 12Judah fate: Er le Onan le Shelah le Pharez le Zarah. Er le Onan tu Khanaan ramah thi te i. Pharez fate khiah Hezron le Hamul. 13Issakhar fate: Tola le Phuvah le Job le Shimron. 14Zebulun fate: Sered le Elon le Jahleel. 15Hete khiah Paddan Aram ah Leah thawn naihnak fapate le a fenu Dinah i. A veksenin a fapa le a fenute khiah sawmthum le pathum i. 16Cen Kad fate: Ziphion le Hakkai le Shuni le Ezbon le Eri le Arodi le Areli. 17Asher fate: Jimnah le Ishuah le Isui le Beriah le a farnu Serah. Beriah fate: Heber le Malkhiel. 18Hete khiah Laban in a fenu Leah hneum tuhai pehnak Zilpah fate i. Zilpah thawn fate 16 nai i. 19Zakuk nu Rachel fate: Joseph le Benjamin. 20Izip ramah Joseph in On phungki Potifera fenu Asenat thawn Manasseh le Efraim nai i. 21Benjamin fate: Belah le Becher le Ashbel le Kera le Naaman le Ehi le Rosh le Muppim le Huppim le Ard. 22Hete khiah Zakuk le Rachel fate i. A veksenin hlaili i. 23Dan fate: Hushim. 24Naphtali fate: Jahzeel le Kuni le Jezer le Shillem. 25Hete khiah Laban in a fenu Rachel hnenum tuhai pehnak Bilhah fate i. A veksenin pasarih i. 26Izip ramah Zakuk thawn hlengtu Zakuk songai suakhnak le Zakuk fapate nu te kawmin sawmruk le paruk i. 27Cen Izip ramah tehnak Joseph fapa khiah panih. Ciamanin Izip ramah hlengtu Zakuk inn songkhat khiah sawmsarih i.
28Ciafangin Koshen ramah konghoi ruai tuhin Zakuk in Judah khiah amahte hlanah feh ruai ai anite khai Koshen ramah hleng i. 29Joseph khai Koshen ah a paa Israel tawk tuhin a siphuh leng khiah ralring ai a paa tawk fangin a hawng kuah ai camcu khat a hawng kuah in kap i. 30Ciafangin Israel in Joseph hnenah, “Tunin na hmu zo ai na nung lai manin i thi tu hang seh.” ti in rel i. 31Ciafangin Joseph in a unaute le a paa inn songkhat hnenah, “Pharaoh hnenah kawi ngangkhaw, amah hnenah, ‘Khanaan ramai i unaute le i paa inn songkhat khiah i hnenah hleng zo i. 32Amahte khiah tukhal tu te i. Ziangmanti fangin amahte in tute khiah rong paih ai amahte turual le kawlpawrual le amahte naihnak a veksen thawn hleng i.’ ti in rel tuh ing. 33Pharaoh in ning leng fangin, ‘Zai per i si?’ ti in ning zawt fangin, 34Ningte in, ‘Kin naupang lai pahin tuntian kin pupate ai panin tuukhal i ing.’ ti in rel tuu-ih. Ziangmanti fangin Koshen ramah ning to siang tu seh. Ziangmanti fangin Izip mite in tuukhalte khiah ningdul i.” ti in rel i.