1Zakuk in a fate khiah ko ai, “Ning veksenin hmunkhat in khawm tu i lai tunhnua lamah ning vumah cang tuhhnak thu ning rel ngang. 2Zakuk fate, hmunkhat in khawm tu i lai ning paa Israel thu ngai tuu-ih.
3Reuben, nangmah khiah i fapa upaber i si.
I thapui a hmasaber pantu i si.
Upathnak le power lamah a rel zolo in nai i si.
4Inapui tihual bang na i manin zaikom in
khai ciabang i leh tuh lo i hang si.
Ziangmanti fangin na pa khuahluan
vumah kai ai rim ruai i si.
I zauhmun ah kawi i si.
5 Simeon le Levi khiah unau i si.
Ning vangsau khiah mirekhnak in hmang i si.
6Amahte thusawm hmun ah lut tuh zel lo ing.
Amahte thawn khai khawm khat tuh lo ing.
Ziangmanti fangin thinraw in mite khiah rek lio i.
Amahte nuam bangin kawlpawte kawng ai thari khiah at sah lio i.
Amahte thinrawhnak khiah awrsia in cam sah ing
Ziangmanti fangin a hlaihlawr ze in puar i.
7Amahte binglio thinrawhnak khiah awrsia in cam sah ing.
Ziangmanti fangin ninghiohnak nai bul lo i.
Amahte khiah Zakuk lakah piak ruai tuh ing.
Amahte khiah Israel lakah khan ruai tuh ing.
8Judah, na unaute in na cuan tuh i.
Na kut in na raalte hawng khiah dik tuh i si.
Na paa fate in na hmai ah ut in na bia tuh i.
9Judah, nangmah khiah chintit fa i si.|
I fapa, na dawphnak ramsa hmunin let leh i si.
Chintit bangin a bok in bual pio i.
Chintitnu bang i si.
Aisu in amah khiah phawr ngam tuh i?
10Ukhnak tokrolh khiah Judah hnenin tlan tuh lo i.
Cen Shiloh hleng hlan lo thukham
petupa khai a ke kualak in tlan tuh lo i.
Amah hnenah mi hmuahhmuah tai tuh i.
11A lak khiah capit kuang ah khih tuh ai
lakniu khiah a kak phaber vumah a ri pen tuh i.
A thuam khiah capittizu thawn som tuh
ai a ponte khiah cabit thi thawn sawp tuh i.
12A mit khiah capittizu thawn san ruai tuh i.
A kamte khiah cawhnawi thawn ngo ruai tuh i.
13Zebulun khiah tipui varkam ah um tuh i.
Amah khiah timbawte comhmun i tuh i.
A ramri khiah Zidon tian i tuh i.
14Issakhar khai thil rit ngai panih lakah
boktu lak bang in cakngai i.
15A comhmun ram khiah a pha ngai le a mawi ngai i ti in hmu
fangin, a kodar khiah thil phur tuhin ut tuhai a khengkhebel ai pomhnak
napertu tuhin hnenum cang tuh i.
16Israel mi phun pakhat i bangin Dan in a
minungte khiah thukhan sah tuh i.
17Dan khiah lampui ai rul bang i tuh i.
Lam lakai a ru nai rul bangin siphuh
keruh khiah cik ai siphuh to tu pa khiah
a hnualamah tlok teu i.
18Aw BAWIPA, na luangtlanhnak khiah iang ing.
19Kad tu mite in roksah tuh i.
Ikhalselai amah in amahte hnua in roksah leh tuh ve i.
20Asher rong khiah ur rauh tuh i.
A rong khiah kumpibawi rong bang i tuh i.
21Naphtali khiah kiho laa bang in luat i.
Pon hlum ngai thawn pong tuh i.
22Joseph tu a thaiha capit kuang i.
Cirhti hiang ai a thaiha cabit kuang i ai
a kakte khiah sen vumah zaam i.
23Conkiang kapte in amahte a rauhsia in
tawng ai amah khiah kap ai hnaihnok i.
24Ikhalselai a kahpuk khiah kho ngio ai
Zakuk Pathian, Tuukhaltu pa, Israel Lungpui le
25Na bawmtu na paate Pathian le vancung
ai hmuifu le ti thuk songai hmuifu le nu
hnawi le nu pum songai hmuifu thawn
hmuifu na bur tu Pathian in a kutte khiah hat ruai i.
26Na paa hmuifu khiah i pupaate tahin tam sawn zo i.
Kumzanga mualtlang kan in tam i
Cia hmuifute khiah Joseph lu ah le a
unaute lakai a cuangtu ber lukhuk vumah lo hleng tu seh.
27Benjamin khiah a riahsia ngai mahleng bang i.
Zing fangin a dawphnak ramsa ei i.
Zanlam fangin a rekhnak ramsate khiah khan i.” ti in rel i.
28Hete khiah Israel phun 12 te i. Hete khiah a paa in thurel ai hmuifu burhnak te i. Amahte thawn phutua in hmuifu bur i.
Zakuk thi i
29Amahte khiah thurel ben fangin amahte hnen ah, Israel in, “I hinpuite hnenah i khawm tuh lio i hang. Hit mi Efron lo ai khukua songah i paate thawn i vui tu i law. 30Vuihmun tuh in Hit mi Efron hnenin lo thawn Khanaan ramah Abraham ai laihnak Mamre hiang ai Makhpelah lo songai khukua songah i vui tuu-ih. 31Ciata ah Abraham le a nu Sarah vui i. Ciata ah Aizek le a nu Rebekah vui ai kai in Leah vui ing. 32Lo le a songai khukua khiah Hit te hmunin laihnak i.”ti in rel i. 32Zakuk in a fate khiah thurel ben fangin a kete khiah khuahluan vumah zau ai thi le amahte in a paate hnenah vui i.