1 Israel mi ningte,
BAWIPA thu khiah ngai tuu-ih.
BAWIPA in Israel ram ai umtu mite khiah tazacuai i.
“Israel ram songah, thuhman le ngaihharhnak um lo i.
Pathian khai ling lo i.
2 Amahte in cukcam ai thudon rel i.
Mite khiah rek ai ruko in nulepa sual bawn i.
Pakhat hnua pakhat thi luang ruai ai,
Zaikhai kham bul lo in nung i.
3 Ciamanin cia ram in kah tuh i.
Cia ram ai umtu mite hmuahhmuah khiah
Lo lai ramsa te le
Hli lakai vaniute kawm in bo tuh sio i.
Tipui songai nga tian in lang tuh sio i.
4 Aisu in khai mawhhluk ma seh.
Pakhat le pakhat khiah mawhhluk dun mah ih.
Ziangmanti fangin na miphun pui te khiah
phungki te mawhhluk tu te thawn bang i.
5 Ciamanin sun lai in ning bah tuh i.
Cen prawfet khai ningmah thawn zan lai ah bah tuh i.
Cen na nuu khiah na hnawm sah tuh ing.
6 I minung te khiah fim hnak nai lo manin hnawm sek i.
Ningmah in fim hnak engsan manin
Kaimah in khai eng ning san tuh ve ing.
Ningmah in ning Pathian dan upadi khiah hai te manin,
Kaimah in khai ning fate khiah ning hai sah tuh ing.
7 Amahte khiah khang amam fangin,
I lakah sual amam i.
Amahte thangphat hnak khiah
zakthikul in dah sah tuh ing.
8 Amahte in i minung te sual khiah ei sah i.
Amahte in anite sual khiah daih sah rauh i.
9 Ciamanin, mite bang in phungki te khai i ve i.
Ciamanin amahte nundan bang in cawh tuh ing.
Amahte per hnak bangin tham tuh ing.
10 Ziangmanti fangin amahte in ei tuh napui ai, kham tuh lo i.
Amahte in phatemah tuan napui ai,
amahte khiah khang lo i.
Ziangmanti fangin amahte in
BAWIPA khiah a thu ngai sah lo i.
11 Phatemah le capittizu le capittizu thar te in
mi thinlung khiah hnenum cang ruai i.
12 I miphun pui te in thing ai bawnhnak
milim zuk hnenah thu zawt ai,
amahte tokrolh in amahte khiah thu sawn i.
Phatemah thinlung in amahte khiah lam khelh ruai i.
Amahte in amahte Pathian khiah zam in phatemah per i.
13 Amahte in mual vumah raithawi i.
Tlang vumah le hlim hnia ah le vangpar
thing hnia ah le mekeng thing hnia ah
nihlim pha manin rimhmui tai i.
Ciamanin ning fenu te in phatemah cang ai,
ning nu te in nulepa sualhnak bawn i.
14 Ning fenu te in phatemah cang fangin le
ning nu te in nulepa sualhnak bawn fangin,
amahte khiah cawh tuh lo ing.
Ziangmanti fangin pasal te in khai
phatemah te hnenah kawi i.
Cen phatemah te thawn khai raithawi i.
Ciamanin zaikhai ling lo te khiah ke in tlawh tuh i.
15 Nangmah Israel in phatemah cang napui sikhaw,
Judah mite khiah sual ruai mah.
Cen Kilkal ah le Beth Aven ah khai kawi mah.
Cen “BAWIPA nung song hmuah in.’ti in khai cukcam mah.
16 Ziangmanti fangin Israel mite khiah ungtuang i.
Ungtuang kawlpaw niu bang i.
Ciamanin BAWIPA in amahte khiah
tu niu bangin hampa umhmun lo lian ngai
song ah leng siang tuh im?
17 Efraim in milim zuk te hnenah kop i.
Ciamanin hnaihnok mah.
18 Amahte zu khiah bo zo napui ai
a catlo in phatemah cang i.
19 Khuahu in amahte khiah lan tuh berh ai,
Amahte raithawi hnak man in zakthi ruai tuh i.