1 He khiah Judah kumpibawi Uzziah, Jotham, Ahaz le Hezekiah te kumpibawi tuan teng in Amoz fapa Isaiah in Judah le Jerusalem vumah hleng tuhhnak hmuhnak thu i.
2 Aw vancungte, za tuu-ih.
Laivum mite, ngaai tuu-ih.
Ziangmanti fangin Bawipa in,
“I fate khiah rong cawm in sik napui ai
Amahte in i tawng i.
3 Kawlpaw in a naitu khiah ling i.
Lak in a bawipa rong paih hmun kuang khiah ling i.
Ikhalselai Israel mite in ling lo i.
I minungte in ruat khai ruat lo i.” ti in ti i.
4 Amahte khiah misual phun,
Sualhnak thilrit phur tu,
A pha lo bawntute
Hmon ruaitu minung i.
Amahte in Bawipa khiah zam ai
Israel ai a Cianghlim Pa khiah
Thinraw tuhin tok hnelhno i.
Amah khiah zaangtak in um i.
5 Zaimanin na vit leh tuh thio i?
Amah khiah tawng tuh amam i si.
A lu khiah a pumpalah in ur i.
Thinlung khai a veksenin zuul i.
6 Ke ai pan in a lu tian, a cak hmun um bul lo i.
Ikhalselai hmaihma le a hmon le a uih thawn dim i.
Hmaihma te khai bawl lo ai sii khai noih lo i.
7 Ning ram khai zaikhai um lo in dap sukso i.
Ning khuate khai mai thawn kang sio i.
Ning raalte in ning ram khai ningmah hmuh in ning ei sah i.
Ning raalte in ning neh manin ning ram khai dap sukso i.
8 Ciamanin Zion fenu khiah vuandum ai buk
le zil vuandum songai hlaam bang in zam i.
Raalte ai kulhhnak khua bang i.
9 Vancung mite Bawipa in a tlawmniu teng
tal kin taang ruai ta hlahselai,
Sodom le Kawmawrah bang kin cang tuh zo i hang.
10 Sodom uktute, Bawipa thu khiah za tuu-ih.
Kawmawrah mite, kin Pathian thukham khiah ngaai tuu-ih.
11 Bawipa in, “Zai ca in hehlawti in i hnenah raithawi hnelhno i si?
Mai thawn ai ning taihnak tu cang le ning
kawlpaw thau hlu hnak khiah i luah lio i.
Kawlpaw le tu le me te thi khiah i kul lo i.
12 I hmai ah daak tuhin ning kawi fangin,
I tualvan khiah i tlawh sah tuhin aisu in ning ruai i?
13 Thulovang raithawi hnak khiah kawih hnelhno ma hang ih.
Ning rimhmui khai ning i dul i.
Ning Hla Thar, ning Sabbath, pumkhawm
tuhai kohnak Sualhnak thawn ai ning
pumkhawm khiah i luah i.
14 Ning Hla Thar le ning puaite khiah i hua i.
I hnaihnok tu teng i.
Thinsau ai or hnelhno khiah i rim sek i.
15 Ning kut tung in saw ning ngen fangin,
Ning sik sah tuh lo ing.
Saw tampui ning ngen manin, ning ngai sah tuh lo ing.
Ning kut khiah thi thawn dim i.
16 Takhlu in ningmah veve ciang ruai tuu-ih.
I mit in hmu thai lo in a pha lo ning
bawnhnakte khiah bawn awl tuu-ih.
A pha lo khiah bawn awl tuu-ih.
17 A pha bawn tuh khiah zir tuu-ih.
Thuhman khiah sii tuu-ih.
Mi ai nemhhnak te khiah luat ruai tuu-ih.
Paa nai lo te khiah tawng sah tuu-ih.
Hmaitong te ca in ninghio ngen sah tuu-ih.” ti in ti i.
18 Bawipa in, “Kawi tu i lai, thurel tlang nga sing.
Ning sualhnak khiah san khal selai
Vurpaar bangin ngo ruai tuh i.
Thi bangin san khal selai
Tu hmul bangin ngo ruai tuh i.
19 Thungai ning nuam lekhaw,
Ram songai pohnak rong pha ei tuh i si.
20 I lo in, i el in i tawng leisikhaw,
Ning raalte in vangsau thawn ning rek tuh sek i.” ti in rel zo i.
Ziangmanti fangin Bawipa kaa in rel zo i.
21 Akontih in rinsantlak khuapui khiah
Phatemah cang lio i?
Thuhman thawn dim awng i.
A songah dikcanghnak zancaam awng i.
Ikhalselai tuntu mirektute lek um i.
22 Ning tangka khai hnawmborh bang teng cang lio i.
Ning capittizu khai ti thawn rawihhnak i.
23 Ning bawite khiah mitawng tu, ruko thawn kom dun i.
Aisu hmuah in nawhthuh daih i.
Lehsawng lek ngaisung i.
Paa nai lote khiah tawng sah lo i.
Cen hmaitong te thu khai rel sah nuam lo i.
24 Ciamanin Bawipa, Vancung mite Bawipa,
Israel mite Pathian in, “I tawngtute khiah rek tuh sio ing.
I raalte khiah phuzul tuh ing.
25 I kut in ning tawng tuh ai, ning hnawmborh
khiah a kungniu in phiak tuh sio ing.
Ning rimhnak khiah ning lang sah tuh sio ing.
26 Ning thukhantute khiah a hmasa bangin
ning dah sah leh tuh ing.
Thu ning tiamtute khiah a ngom ai bangin
ning bawt leh tuh ing.
Ciafangin ning khua khiah a dikcang,
a rinsan tlak khua ti in ko tuh i.
27 Thuhman in Zion khiah luat ruai tuh i.
Dikcanghnak in a sual sir tute khiah o tuh i.
28 A pha lo bawntute le misualte khiah
hmunkhat in rek tuh sek i.
Bawipa zam tute khai rall ruai tuh sio i.
29 Ningmah ai ning irhnak makeng thingte
manin amahte khiah zakthi tuh i.
Cen ningmah ai ning rilhnak vuandum
manin amahte khiah hmaisong tuh i.
30 Ziangmanti fangin ningmah khiah a hnah
voi sio mekeng thing bang i tuh i si.
Ti um lo vuandum thawn ning bang tuh i.
31 Ziangmanti fangin thahat te khiah
mai hlawmhnak maifar bang tuh i.
Amahte perhnak na khiah maipuak bang tuh i.
Ciate khiah a panih in kang tuh lio ai,
aisu in khai hmit ben tuh lo i.