1 Kumpibawi pakhat in a dikcang ngai in uk tuh i.
Bawite in thuhman thawn uk tuh i.
2 Aisu hmuah khiah hlivua hmunin relhhmun le
Khuahu hmun in benhmun bang i tuh i.
Cen aisu hmuah khai nelrawn lakai tipui bang le
lairo hmunai lungto pui nihlim bang i tuh i.
3 A hmu tu te mit khiah malria in um tuh lo i.
A za tute bil in ngai tuh i.
4 Thinlung rang te in fimhnak ling tuh i.
Pong thiam lo te khai a naal ngai in pong thiam tuh i.
5 Mivoite khiah hmun thiam ti in ko tuh nawn lo i.
Hmundit te khai hmunthiam ti in ko tuh lo i.
6 Ziangmanti fangin mivoi pa in voi thu rel tuh i.
A thinlung in sualhnak per tuh i.
Sualhnak khiah bawn tuh i.
Bawipa thu khiah a khelh in rel tuh i.
Rikam te khiah rongkham ruai tuh lo i.
Tihaalte khiah tihaal lawm ruai tuh lo i.
7 Tum hnelhno tu te in a pha lo ian tum i.
Mi farahte khiah thudon thawn hnawmcan tuhin
amah in a pha lo khiah tum hnelhno i.
8 Ikhalselai hmunthiam pa in hmunthiam hnak ian tum i.
A hmunthiam manin amah khiah kho i.
9 Nunnuam ai umtu nupangte, tho tu i lai,
i aw i ngai sah tuu-ih.
Caam hnelhno tu, fenute, i I relhnak khiah ngai tuu-ih.
10 Kum khat le ni zailo fangin,
Ngulsul ai um tu nupuite,rim ning su tuh i.
Capit thai te khiah hnawm tuh ai,
Khawm tuh um tuh lo i.
11 Nunnuam ai umtu nupangte, lau tuu-ih.
Nguilsul ai umtu te, rim ning su tu seh.
Ning thuam hawk sio in kawngkolh in um tuu-ih.
Ning el ah vaidip feng tuu-ih.
12 A hmuh hiam lo te le
a thai thawn dim capitti te ca in
amahte in a sohnar beng kawng in kap tuh i.
13 I minungte umhmun ramah le
Anghnak khua songai a ang ai umtu innkuate hnenah,
hling le maimaw te po tuh i.
14 Ziangmanti fangin kumpibawi innte khiah zaam tuh sio i.
Minung umhmun bial khua khai mite in hlum tuh sio i.
Raal kham hmun inn le a saang ngai inn kumzangza in,
ramsa kua ah cang tuh ai,
Hampalak ai lak te tu te leng hmunah cang tuh i.
15 Cia khiah vancung in Ciang Rauhla kin burh hlan lo cang tuh i.
Ciafangin nelrawn te khiah
rong dim lio ai po hmun lo ah cang tuhai,
Rong dim lio ai po hmun lo khiah tupui bang tuh i.
16 Ciafangin nelrawn lakah thuhman khiah um tuh i.
Rong dim lio lo songah dikcanghnak um tuh i.
17 Dikcanghnak in thinnuam hnak suak ruai tuh i.
Dikcanghnak in kumzangza remhnak le
thinmuang hnak suak ruai tuh i.
18 I minungte khiah thinnuam hmun khua,
A kho ngai inn songah um tuh ai,
Thinmuang ngai in com tuh i.
19 Tupui songah rial khiah tlok tuh napui i.
Cen khuapui khai zakthi kul in hnawm tuh sek napui i.
20 Ti hiang ai rong cing tu le
Kawlpaw le lak te khiah khal kul lo in
amahte hlanlam leng ruai tu,
ningte khiah hmui ning fu i.