1 Phawk tu, phawk tu,
Na tha suah tu, aw Zion.
A mawi ngai na angki khiah sil tu,
aw a cianghlim khuapui, Jerusalem.
Ziangmanti fangin vunpar cemlo te le
a ciang lote khiah na hnenah kawi tuh lo i hang.
2 Laivut khiah thing tu i lai, tho tuu-ih.
To tu, aw Jerusalem.
Na hawng ai thirri khiah hawk tuu-ih,
aw Zion thawngtla fenu.
3 Ziangmanti fangin Bawipa in,
“A man um lo in nangmah veve khiah zuar i si.
Ciamanin tangka lo in na tlan tuh i.”ti in ti i.
4 Ziangmanti fangin Bawipa Pathian in,
“I minungte khiah Izip ramah khuato tuhin zu hmasa awng i.
Ciafangin a thu um lo in Assiria mite in amahte khiah rimsu pe i.
5 Ciamanin hetah zai nai ing.” ti in Bawipa in rel i.
“I minungte khiah a man um lo in lang sek im?
A uk tute in amahte khiah kap ruai i.”ti in Bawipa in ti i.
“I hming khiah nisiar in zauhsuam i.
6 Ciamanin i minungte in i hming i ling sah tuh i.
Ciamanin cia nia amahte in, ‘Kaimah ing.’ti ai
rel tu khiah kaimah i, ti ling tuh ing.
7 Thupha kawih tu le remhnak thu rel tu le
anghnak thupha kawih tu le
ohnak thu rel tu le
Zion hnenah, “Na Pathian in uk i hang.”ti ai rel
pa kete khiah zaitluk in mualvum ah mawi i.
8 Ning santari kiltute in au tuh i.
Amahte in hmunkhat lasa tlang tuh i.
Ziangmanti fangin Bawipa in Zion tlun leh fangin
amahte in hmaiton in hmu dun tuh i.
9 Jerusalem khua a hnawm hmunte,
Ang ngai in hmunkhat in lasa tuu-ih.
Ziangmanti fangin Bawipa in a minungte khiah
thinnuam ruai zo i.
Bawipa in Jerusalem khiah luangtlan zo i.
10 Bawipa in mi phun hmuahhmuah hmai ah
a cianghlim a banpui khiah kawngkolh in dah zo i.
Laivum pumpalah in kin Pathian ohnak khiah hmu tuh i.
11 Thawn tu, thawn tu. Ciata in suak tu.
A cianglo thil khiah dai mah.
Amah song in suak tu.
A ciang in um tuu-ih
Bawipa bel phurtute.
12 Ziangmanti fangin ngaihhlah in suak tuh lo i si.
Tlan khai tlan tuh lo i si.
Ziangmanti fangin Bawipa in ning hmai in feh tuh i.
Israel mite Pathian in ning hnua in ning kil tuh i.
13 Sik tu! I hnenum in a fim ngai in per tuh i.
Amah khiah do tuhai, cuan tuhai saang tuh ngai i.
14 Mi tamngai khiah nangmah lakah ngaihsun ur bangin,
A hmuihmel khiah mi dang tah in hmuh zuam lo in hnawm i.
A pum khai minung fate hnak in hmuh zuam lo in hnawm i.
15 Amah in mi phun tamngai khiah phiah tuhai,
Kumpibawite in amah lakah pong tuh ling lo i.
Ziangmanti fangin amahte khiah rel napui lo ai,
amahte in hmu tuh i.
Amahte in za napui lo ai, amahte in ruat tuh i.