1 Aw Israel mite, Bawipa ai ning relhnak thu khiah ngai tuu-ih.
2 Bawipa in, “Zental mite dan khiah cung mah ih.
Van ai hnikhnaihhnak manin lau mah ih.
Ziangmanti fangin Zental mite khiah cia hnikhnaihhnak manin lau i.
3 Ziangmanti fangin he mite bawn dan khiah thu lovang i.
Mi pakhat in tupui songah thing pakhat vawng i.
Haihpui thawn cia thing khiah a kut in solh i.
4 Amahte in cia thing khiah sui le ngun thawn par i.
Tlu ma seh ti in tluangkhen le haibul thawn khen i.
5 Ungkuang bang in a tung in tauh i.
Amahte in pong thiam lo i.
Amahte thu in vak thiam lo manin,
amahte khiah phur kul i.
Amahte in a pha le a hnawm khai bawn
thiam lo manin amahte khiah kih mah ih.”
ti in ning rel i.
6 Aw Bawipa, nangmah bang aisu khai um lo i.
Nangmah khiah a lian i si.
Na hming khiah thang ngai i.
7 Ciamanin aisu in na kih lo um tuh i,
aw mi phun hmuahhmuah Kumpibawipa?
Ziangmanti fangin cia khiah na vo i.
Ziangmanti fangin mi phun lakai mifim te
lakah le amahte kumpibawi ukhnak ram
hmuahhmuah songah nangmah bang um lo i.
8 Ikhalselai amahte khiah ruathnak nai lo mivoite i.
Thing ai bawnhnak milim zuk cukhnak
thu khiah zaikhai hnempui lo i.
9 A tlep ai seuhnak ngun khiah Tarshish in kawih i.
Sui khiah Uphaz in kawih i.
Ciate khiah lettama le pumsutute kut ai bawnhnak i.
Mepian le a num pon silh i.
Ciate khiah a vekin a thiam ngai mite ai bawnhnak i.
10 Ikhalselai Bawipa tu Pathian ngaingai i.
Amah khiah a nung mi Pathian le kumzangza kumpibawipa i.
A raw fangin laipua khiah lau i.
A raw fangin minungte in tuar ben tuh lo i.
11Amahte hnenah, “Vancungte le laivum bawn lo
tu pathiante khiah laivum le he vancung hnia
songin rall tuh sio i.” ti in rel tuh i si.
12 A power thawn amah in laipua khiah bawn i.
A fimhnak thawn laivum khiah sa i.
A fimhnak thawn van khiah kon zong khuaha ah pharh i.
13 Amah in au fangin, vancung ai ti te khai huk i.
Amah in mairo khiah laivum a tong hmun in kaai ruai i.
Amah in ruah le tlek tla ruai i.
Hlivua khai a thilri khawihmun in kawih i.
14 Aisu hmuah khiah ruathnak nai lo, fimhnak nai lo ciang i.
Pumsu tute khiah amahte milim bawnhnak in zakthi ruai i.
Ziangmanti fangin a bawnhnak zukte khiah thudon pui i.
Amahte songah nunhnak um lo i.
15 Amahte khiah a lovang, ruat khelhtute ai bawnhnak i.
Amahte khiah cawh nia ah rall tuh sio i.
16 Zakuk Pathian tu anite bang lo i.
Amah khiah zaizongza Bawntu i.
Israel mite khiah amah rothil i.
A hming khiah vancung mite Bawipa i.
17 Ram songai ning thilri khiah khawm tu sek ih.
Aw raalte kulhhnak songai umtute.
18 Ziangmanti fangin Bawipa in:
“He ram ai umtu te khiah tunin lon tuh sio ing.
Amahte khiah a raalte in pom thai in
amahte khiah rimsu pe tuh ing.” ti in rel i.
19 I urhnak in rim i su rauh i.
I maa khiah a rauh ngai i.
Ikhalselai kai in, “He khiah i urhnak i.
Ciamanin tuar tuh ing.
20 I buk khiah i rok sah i.
I rihualte khiah cat sio i.
I fate khiah i hnenin tlan sio i.
Amahte khiah um nawn lo i hang.
I buk sa tu tuh le pon zar tuh khai um lo i.
21 Ziangmanti fangin tukhalte in ruathnak nai lo i.
Bawipa khai sii lo i.
Ciamanin amahte khiah fim tuh lo i.
Amahte tu le me te khai a veksenin piak tuh sio i.
22 Ngai tu! Thuthanhnak hleng i.
Saklam ramin rung murhmo aw khiah
Judah khuate khiah mehlengte kua cang
ruai tuhin hnawmcan tuhin hleng i.
23 Aw Bawipa, minung te nunhnak khiah amahte in paing lo i.
Amah kalsuan hmun khai amah in uk benhnak i lo i.
24 Aw Bawipa, a hman niu in i tiam tu.
Ikhalselai thinraw kong in i tiam mah.
Cialo fangin i thi ruai mawh nga si.
25 Na thinrawhnak khiah na ling sah lotu
Zental te vumah hleng ruai tu.
Na hming ko lo tu mite vumah khai hleng ruai tu.
Ziangmanti fangin amahte in Zakuk khiah ei sio i.
Amah khiah kai tu lio lai rek tu lio.
A hlut hmun inn khiah a kualawng in um ruai tu.