1 “Jerusalem lamceh cang ah dawp tu cuk.
Sik in ling tu cuk.
Amah lampui lakah a hman in thukhan tu
le thuhman sii tu mi pakhat sii tulai tawk
lesikhaw, Jerusalem khiah zah tuh ing.
2 Amahte in, ‘BAWIPA nung song hmuah
in,’ ti in ti napui ai amahte in thudon pui in cukcam i.”
3 Aw BAWIPA, na mit in thuhman khiah sik lo im?
Amahte khiah nangmah in seu napui ai amahte khiah ur lo i.
Nangmah in amahte khiah hnawmcan
napui ai amahte in tiamhnak khiah daih lo i.
Amahte hmai khiah lungto hnak in ruh sawn in dah i.
Amahte in let leh nuam lo i.
4 Ciamanin kai in, “Hete khiah mi farah te i.
Amahte khiah mivoi i.
Amahte in BAWIPA lampui khiah ling lo i.
Amahte Pathian cawhkuan khai ling lo i.
5 Mi upate hnenah kawi in thu rel ngang.
Ziangmanti fangin amahte in BAWIPA lampui khiah ling i.
Amahte Pathian cawhkuan khai ling i.” ti in ti i.
Ikhalselai hete in thilrit khiah hawk zo ai,
a penhnak ri khiah cat zo i.
6 Ciamanin tupui songai chintit in amahte khiah rek tuh i.
Nelrawn songai mehleng in amahte khiah dawp tuh i.
Tlavang in amahte khua khiah cul tuh i.
Cia khua song ai suak tute khiah hlik tuh dek i.
Ziangmanti fangin amahte sualhnak khiah tam ngai i.
Amahte sanghnak khai thanau amam i.
7 “Akontih in he khiah sual na zah thill tuh ing?
Na fate in i zam ai pathian lote hmingin cukcam i.
Amahte khiah rongkham ngai in cawm ai
amahte in nulepa sual bawn i.
Phatemahte inn ah a bur in tai tlang i.
8 Amahte khiah a thau a hur siphuh pa bang i.
Aisu hmuah in a ompui nu khiah ko i.
9 Hete manin amahte khiah cawh tuh lo ing?” ti in BAWIPA in ti i.
“Cen he bang mi phun khiah phuzul tuh lo ing?
10 “A seen vumah kaai tu i lai hnawmcan tuu-ih.
Ikhalselai a vuva in hnawmcan mah ih.
A kakte khiah vawng tu sek ih.
Ziangmanti fangin amahte khiah BAWIPA
minung te i lo i.
11 Ziangmanti fangin Israel mite le Judah mite in,
I lakah hlotlau rauh in um i.”ti in BAWIPA in rel i.
12 Amahte in BAWIPA thu khiah:
“Amah i lo i. Kin vumah hnophnak hleng tuh zel lo i.
Vangsau le rian khiah hmu tuh lo i ing.” ti in thudon in rel i.
13 Prawfet te khai hlivua bang teng i.
Amahte songah thu rel tuh lo i.
Ciatih bangin amahte vumah bawt sah tuh i.”
14 Ciamanin vancung mite BAWIPA Pathian
in, “Nangmah in he thu rel manin,
I thu khiah na kaa songah mai cang ruai tuh ing.
He mite khiah thing cang ruai tuh ing.
Cia mi in amahte khiah kang tuh sio i.
15 Aw Israel mite, “A hla ngai ai mi phunte
khiah ning tawng tuhin kawih tuh ing.” ti in BAWIPA in ti i.
Cia mi phunte khiah a lian ngai le hlanlai in um awng zo i.
Ningte in a pon khai ling sah tuh lo i si.
Amahte relhnak khai ling sah tuh lo i si.
16 Amahte conkiang bawm khai hlan kua bang i.
Amahte khiah a veksenin raaltawng thiam ngaingai i.
17 Amahte in ning fapa le ning fenu te ai ei
tuhhnak rong le ning rongkhawmhnak
khiah ning ei sah tuh berh i.
Ning tu le ning me le ning kawlpawte ning ei sah tuh berh i.
Ning capitti le ning thai hmin te ning ei sah tuh berh i.
Ning rinsanhnak a kho ngai ai ning sahnak
ning khuapuite khiah vangsau thawn ning
hnawm sah tuh sio i.
18 Ikhalselai cia nia ah, ning bo ruai tuh sio lo ing.” ti in BAWIPA in ti i. “19Ningte in, ‘Zaimanin BAWIPA in hetih bangin kin bawn i pa?’ ti in zawt fangin, nangmah in, ‘Ningmah in i zam ai ning ram songah mi ramdang te pathian ning bia bangin, ning ram lo mi dang te ram ah ram dang mite naper sah tuh i si.’ ti in sawn tu.
20 “ He khiah Zakuk hnenah le Judah mite hnenah rel tu:
21 ‘Ngai tuu-ih. Aw mivoite,
Linghnak nai lo te.
Mit nai napui ai khuahmu lote,
Naa nai napui ai khuaza lote:
22 I kih lo i sim?’ ti in BAWIPA in ti i.
‘Tipui in a varkam khiah kaan thill tuh lo
in runsiat dah tu kaimah khiah ning lau tuh lo im?
A tiphul khiah nuamthaih in mer napui ai neh ben lo i.
Cia tipui in huk napui ai varkam khiah kaan ben lo i.
23 Ikhalselai he mite in mi tawng cai thai le
mi tawng nuam thai thinlung lek nai i.
Amahte in raltho ai tlan sek i.
24 Amahte thin songin, “A cuu bangin fur
le khaal ruah kin pe tu le rongkhawm cu
kin pe tu BAWIPA kin Pathian khiah kih
nga sing.” ti in ruat lo i.
25 Ning sualhnak in hete khiah ning hmun in tlan ruai i.
Ning sualhnak in thil pha khiah ning kham sah ngio i.
26 ‘Ziangmanti fangin i minungte songah misual um i.
Thangtauh tute bangin mi khiah bawh i.
Amahte in thangtauh ai mite khiah awk ruai i.
27 Vaniu inn songah vaniu a dim in um bangin,
Amahte khiah hrokhrawlhnak thawn dim i.
Ciamanin amahte khiah milian cang i.
28 Amahte khiah thau hiar ai mam rauh i.
Amahte in misualte bawnhnak hlai in sual i.
Amahte in paa nai lo fate thu khiah rel sah nuam lo i.
Cen samhnak naite khai bawm nuam lo i.
Ikhalselai amahte khiah lian amam i.
29 Hete manin amahte khiah cawh tuh lo ing?
He bang mi phunte khiah phuzul tuh lo
ing?’ ti in BAWIPA in ti i.
30 “He minungte in amahte ram songah,
a siava multing kul thil khiah bawn i.
31 Prawfet te in thudon in thurel i.
Phungkite in amahte huthawm thawn uk i.
I minungte in cia khiah daih i.
Ikhalselai a bo fangin kontih in bawn nga i si?