1 Ciafangin Shuh mi Bildad in,
2 “Zaikom fangin pong awl tuh i si?
Voi ze in um malai,
ciafangin thurel tlang nga sing.
3 Ziangmanin nangmah in kawlpaw bangin
mivoi kin vuah i si?
4 Thin na raw manin nangmah veve
khiah hlik hnelhno tu pa,
nangmah ca in laivum khiah zam tuh lio im?
Nangmah ca in lungsirpui khiah leu tuh teu im?
5 Misualte maivar khiah dit peu lio i.
Cen a mailei khai tleu lo i.
6 Cia pa buk songah khuavar khiah khuathim lio
A hiang ai mai-inn khai dit lio i.
7 A kalsuanhnak khai com i.
A thucumhnak in amah khiah tlu ruai i.
8 Ziangmanti fangin a ke in amah khiah
sur songah awk ruai i.
Amah khiah thang song ah vak i.
9 Sur in a ke khiah awk lio i.
Thang in amah khiah awk lio i.
10 Amah ca in laipua ah a hong diikhnak tuhin
rihual khiah a thup in um i.
Amah ca tuhin lampui lai ah thangtauh i.
11 A hiang cingkim in lauhnak in kulh ai
a vak hmun cang ah hnawh i.
12 A tha khiah nau ai hnophnak khiah
a hiangah um cialep i.
13 A vun khiah ei sah cekco ai,
thihhnak fapa hmasaber in
a kut le ke te khiah hlum sah i.
14 Amah buan hmun a buk songin
amah khiah phai lio ai,
laukulhnak kumpibawi hmai ah vak ruai i.
15 Amahte khiah amah minung inapui lo ai
a buk songah um i.
Kat mai khiah a umhmun ah zaih i.
16 A hnia ah amah hnuk khiah ro lio i.
A cung ah amah kak khiah voi berh i.
17 Laivum ah aisu in khai amah khiah hih leh lo
Cen mi hming thangte lakah
amah in hming nai lo i.
18 Amah khiah khuavar songin
khuathim songah hnawt ai,
laivum songin amah khiah tlan ruai i.
19 Amah in a phunpui lakah
fapa le tesin fate nai lo i.
A umhmun ah aisu khai taang lo i.
20 Amah nunhnak manin
nitla hmun lamai mite khiah ngaihsun ur i.
Nisuak hmun lamai mite khai lau ngai i.
21 Misualte umhmun khiah ciabang rori i.
He hmun khiah Pathian ling lo tu pa
umhmun i.” ti in sawn i.