1 Tipui songai ramsa lian ngai khiah
ngasiohnak huk thawn duk ben tuh i sim?
A lei tang rihual thawn pe ben tuh i sim?
2 A hnarkua ah phaikuang thil ben tuh i sim?
A karuh tang huk thawn dawt ben tuh i sim?
3 Amah in ninghio na ngen tuh im?
A nemniu in na pon tuh im?
4 Amah in nangmah thawn thukham dun tuh im?
Amah khiah kumzangza na hnenum tuhin lang tuh i sim?
5 Amah thawn vaniu bangin sal nga sim?
Amah khiah na fenute ca in ri thawn pen tur sim?
6 Na rualpuite in amah khiah puaihnak in hmang tur im?
Amah khiah dawr bawntute in khan tlang tur im?
7 A phaw khiah fei thawn dawt cawk tur sim?
A lu tang ngadawihnak fei thawn dawt ben tur sim?
8 Amah khiah na kut in pom tum lesikhaw,
na tawng tuhai, pom na nuam leh tuh lo i.
9 A neh tuh umm tuh khiah thu lovang i.
A hmu menma rin in a lau kul ngai i.
10 Amah khiah phok ruai ngam thai
raalpha pangam pakhat khai um lo i.
Cia ilekhaw aisu in i tawng ben tuh i?
11 Aisu khiah batba manin rul kul tuh ing?
Vanhang hnia ai thil hmuahhmuah kaimah ai i.
12 A kete le a tha le a ruang mawi dan khiah
rel lo in um tuh lo ing.
13 Aisu in a kawt angki puata khiah
hawk sah ben tuh i?
Aisu in amah khiah kakharh panih thawn
nong ngam tuh i?
14 A laukul a kam thawn dim a kakua khiah
aisu in hong ngam tuh i?
15 A zaanglam khiah lum bangin pitpek in khuk i.
16 Pakhat le pakhat khiah nong dunpek manin
hlivua rin lut thill lo i.
17 Pakhat le pakhat khiah a cipniu in zom dun ai
pakhat le pakhat khiah kopmeng manin
khan thill lo i.
18 A haihawh fangin khuavar suak sutso i.
A mitte khiah zingkhua var tleu bang i.
19 A kaa songin mai suak ai,
maipuak te suak liang lo i.
20 Phaikung thawn semhnak mai vumai bel songai
tisa so bangin a hnar songin maikhu suak i.
21 A haihawh in lungto maihol khiah kang ruai i.
A kaa songin mailei khiah suak i.
22 A hawng ah a thahathnak um i.
A hmai in lungsiahnak vak i.
23 A taksa vun khiah hmunkhat in peh dun ai,
amah vumah a kho ngai in um manin
aisu in khai thawn sah thill lo i.
24 A thin khiah lungto bangin ruh i.
Lungrial a hniata sawn bangin ruh i.
25 Amah khiah tho fangin mi thahatte khai lau i.
A vithnak lau in anite khai hnualamah sup i.
26 Vangsau le feipui le feiniu te le a khawhhnak
conkiang te in amah khiah ur ben lo i.
27 Amah in thir khiah hamparo bangin dah ai
dar khiah thing mot bangin haih i.
28 Conkiangte in amah khiah hnawt ben lo i.
Saihual khai fangkung bang teng i.
29 A khawhhnak conkiangte khiah
hampa ro bangin siar i.
Feiniu te khiah hnihsan menma i.
30 A pumpui a kaang lam khiah
a khoihnak laibel per niu niu bangin san i.
Sumsuhnak suk ai khawhhnak bangin
nawng lakah a niah hlum i.
31 Ti thukngai khiah bel bangin so ruai i.
Tipui khiah zihmui thawn dim bel bangin bawn
32 A hnualam in tihual tleu ngai in hlun i.
Ciamanin mite in, tipui in sam ngo nai vuah thai i.
33 Laivumah amah bang ramsa um lo i.
Amah khiah lauhnak nai tuh lo ai bawnhnak i.
34 Mihngalte khiah amah in nautat i.
Amah khiah a hngalte kumpibawi i.” ti in rel i.