1 Minung dim lio ai um awnghnak khua,
zaitluk lungleng kul in um i hang.
Hmaitong nuu bang i.
Mi phun dang lakah lian awng rih i.
A ramai a bawite khai mi hnenum ah cang i hang.
2 Lungsia ngai in zan fangin kap i.
A mithli khiah a biang ah um i.
A tlak awngtute hmuahhmuah lakah
A thinnuam ruai tu tuh pakhat khai um lo i.
A rualrem hmuahhmuah in amah khiah zawl i.
Amahte khiah a raal sawnah cang sek i.
3 Judah khiah raalte in pom sekai thawngtla sek i.
Rimsu ngai in mi umhlawh per i.
Mi phun dangte lakah um i.
Com nia khai ngah lo i.
A hnawhtute in amah khiah a thin rimsu bik teng in man lio i.
4 Aisu in khai puai bawn tuhin kawi nawn lo manin
Zion feh hmun lampuite khai lungsia in kap i.
A kawldawngkhamte ah zaikhai um nawn lo i hang.
A phungkite khai lungsia in au i.
A fenute khai rimsu i.
Amah khiah lungsia ngai i.
5 A raalte khiah a bawipa cang lio i.
A raalte khiah kho amam i.
A sualhnak tam ze manin
Amah khiah BAWIPA in rimh ruai i.
A fate khiah a raalte in thawngtla tuhin fehpui i.
6 Zion fenu hmun in a tleuhnak khiah pai berh i.
A bawite khiah hampa ei tuh tawk lo tu
kiho le a hnawhtu te hmai ah tha nai lo ai dawptu kiho bang i.
7 A rimh le a vai teng fangin,
Jerusalem in hlanlai ai a nai awnghnak
thil mawite khiah hih i.
A minungte khiah a raalte kut songah tlok
fangin, a bawmtu tuh aisu khai nai lo i.
A raalte in cia khiah hmu ai,
A tlokhnak khiah zauhsuam i.
8 Jerusalem in lungsia kul rauhin sual manin,
amah khiah a siava cang i.
A kawngkolh khiah hmu sah manin,
a upat awngtute in amah khiah nautat i.
Ciafangin ani khai lungsia in a hnualam ah tlan teu i.
9 A riimhnak khiah a hnik ah um i.
A hmailam ca khiah ruat lo i.
Ciamanin a tlok fangin ngaisun urkul ngai i.
Amah in thinnuam ruai tu nai lo i.
“Aw BAWIPA, i rimsuhnak khiah i hmu sah tu.
Ziangmanti fangin i raalte khiah lian ngai i.”
10 A raalte in a hlawnthil khiah a veksen in long sah i.
Nangmah in na pawlpui songah
lut siang lohnak mi phun dangte khiah,
Amah in a temple songah lut khiah hmu i.
11 A minungte in lungsia in au i.
Amahte in rong sii i.
Amahte in nung thill hnak tuhin a man nai
thilrite khiah rong thawn thleng zo sio i.
“Sik tulai, aw BAWIPA, hmu tu.
Kaimah khiah nau i tat rauh i.”
12 “Heta ai kheltute, zaikhai ning karh lo im?
BAWIPA in a thin raw rauh in i rim ai i
vumah hlenghnak lungsia hnak bang
lungsiahnak um na maw sik tu cuk ih.
13 Vancungin i ruh songah amah in
mai i hlat sah ai i ruh te khiah neh sio i.
I ke ca in thang i tauh sah ai,
kaimah khiah i let ruai i.
Kaimah khiah a lovang i cang ruai ai,
Sunnivui in i cawl i.
14 I sualhnak hak khiah Amah kut thawn
hualhnak ri thawn i pen sah i.
I hawng ah i phurh i.
I tha khiah nau ruai i.
I tawng ben lo hnak mite kut songah
BAWIPA in i ap i.
15 I lakai i raalbawite khiah BAWIPA in
a vensenin a ke thawn in cil sah i.
I tlangval te khiah hnawmcan tuhin
Amah in pawlpuite khiah i tawng tuh in ko i.
BAWIPA in Judah fenu khiah capit
rialhmunah rial bangin cil i.
16 Hete manin kap ing.
I mit, i mit khai ti thawn dim i.
Ziangmanti fangin i nunhnak tha i pe leh tu
tuh thinnuam ruaitu pa khiah i hnenin
a hla ngai ah um i.
I raalte in i neh manin, i fate khai hnawm sio i.”
17 Zion in a kut khiah pharh napui ai,
A thinnuam ruaitu tuh pakhat khai um lo i.
BAWIPA in Zakuk thu ah, a hiang cingkim
ai mite khiah Zakuk raal cang tuh in bawn zo i.
Amahte lakah Jerusalem khiah a rim cang zo i.
18 BAWIPA khiah dikcang i.
Inapui ai kai in a thukham khiah tawng ngio ing.
Mite veksen in ngai tuu-ih.
I lungsiahnak khiah i hmu sah tuu-ih.
I fenu le i tlangvalte khiah raalte in pom ai
thawnghla sek i hang.
19 “I taang bawmtute khiah ko napui ai,
amahte in i zuar i.
I phungkite le i mi upate khai,
thi lo in a nung thai in rong sii laitak in
he khua song ah thi sek i.
20 Aw BAWIPA, zaitluk in thin rim i su khiah i hmu sah tu.
I songah thin nuam lo bik in um ing.
I thin khiah bungbaleh in um i.
Ziangmanti fangin kaimah in Pathian thu
khiah ngai nuam lo in tawng awng ing.
Sumpua ah vangsau in a lovang cang ruai i.
Cen inn songah le thihhnak lek um i.
21 “Amahte in i lungsia ai au khiah i za sah i.
Thin i nuam ruai tu tuh pakhat bang khai umlo i.
I raalte veksenin i harsahnak khiah zazo i.
Cia khiah nangmah ai bawnhnak manin,
amahte khiah ang i.
Anite khai kaimah bangin cang thai in,
na relhnak nia khua khiah lo hleng tu seh.
22 “Amahte sualhnak khiah a veksenin na
hmai ah lo laar tu sio seh.
I sualhnak hmuahhmuah manin i vumah na
bawn bangin amahte vumah khai bawn tu.
Ziangmanti fangin lungsia ai i auhnak khiah tam ngai i.
Cen i thin khai nau ngai i.”