11Ciafangin Bawipa in Moses le Aaron hnen ah, 2“Israel mite hnenah, ‘Laivum ai ramsa hmuahhmuah lakah hete pawl khiah ei thai i si. 3Ramsa lakah a ketin kaak ai a sialkiah kial te ramsa khiah ei thai i si. 4Ikhalselai a ketin kaak napui in rong khai sialkiah kial khalselai hete pawl khiah ei tuh lo i si: Kala-uk, a sial kial napui ai a ketin kaak lo i. Ciamanin ning ca ah a ciang lo i. 5Betzar in a sialkiah kial napui ai a ketin kaak lo i. Ciamanin ning ca ah a ciang lo i. 6Savek khiah a sialkiah kial napui ai a ketin kaak lo i. Ciaman in ning ca ah a ciang lo i. 7Vok khiah a ketin kaak napui ai a sialkiah kial lo i. Ciamanin ning ca ah a ciang lo i. 8Ciate sa khiah ei tuh lo i si. A pum khai khing tuh lo i si. Amahte khiah ning ca ah ciang lo i.
9Ti songai umtu hete khiah ei thai i si: A phaw nai lekhaw tipui songai i tu seh run ti song ai i tu seh ti songah umte khiah ei thai i si. 10Ikhalselai tipui songah i tu seh run ti songai um tute le ti leuh tute khiah phaw nai hlahlekhaw ei tuh lo i si. Amahte khiah ning ca ah a ningdulkul i. 11Amahte khiah ningdul tuu-ih. A sa ei tuh lo i si. Cen a pum khai ningdul tuh i si. 12Ti song ah umte a phaw nai hlahlehaw ningte in ningdul tuh i si.
13Cen vaniu lakah hete khiah a ningdulkul te i. Amahte khiah ei tuh lo i si. A ningdulkul i: mudokka, mupui le langtar 14muniu le falkhon le falkhon phun pawl, 15langaak phun pawl, 16ostrich le a bil comniu nai simbu, ngathur le hawk phunte, 17simbu cikniu, ngasio thai simbu le rit lio ai au thai simbu, 18simbu ngo le zakdaw le kharian langtar, stork le heron phun pawl le hoopoe le palak te khiah ei tuh lo i si.
20A zuang thai nunghing i napui a ke pali thawn vak pawl nunghing khai ningdul tuh i si. 21Ikhalselai a zuang thai napui ai ke li ai vak thai he bang nunghing tu ei thai i si: laivum ah a dawk ai dawk thai in a kete khiah a kawng thawn zomdun te pawl ei thai i si. 22Hete khiah ei thai i si: Khokhuakte pawl, rong hnawmcan thai khokhuakte pawl, cen a dang khokhuak te pawl ei thai i si. 23Ikhalselai a dang ke li nai ai zuang thai nunghingte khiah ningdul tuh i si.
24Hete in ning riim ruai tuh i: A thisa ramsa pum khingtu pa khiah zanlam tian riim tuh i. 25Cen a thisa ramsa a pum pakhat khat phur tu pa in a pon khiah sawp tu selai zanlam tian riim tuh i. 26Cen a ke kaak napui ai a ketin kaak lo le a sialkiah kial lo ramsa thihnak pum khiah ning ca ah a ciang lo i. Cia ramsa khing tu hmuah khiah a ciang lo i. 27Cen a ke pali thawn vaktu ramsa lakai a ketin thawn vak tu ramsate khiah ning ca ah a ciang lo i. Ciabang a thi ramsa pum khing tu khiah zanlam tian ciang tuh lo i. 28Ciabang ramsa pum khingtu te in a pon khiah sawp tu selai zanlam tian ciang tuh lo i. Cia khiah ning hnenah a ciang lo i.
29Cen laipua lakah a bok ai vaktu te lakah hete khiah ning ca ah a ciang lo i: zubui, buthi, a lian ngai dildit phun pawl le 30Ok-aw le dildit le taangkawng le nelrawn lakai dildit le hawngki te i. 31Hete khiah laipua ah a bok ai vaktute lakah ning ca ah a ciang lo te i. Ciate pawl khiah a thi fangin khing tute khiah zanlam tian ciang tuh lo i. 32Cen ciate tlok hmun thing i tu seh, pon i tu seh, saphaw i tu seh vaidip i tu seh ciang tuh lo i. Cen ciate tlok hmun khiah zai i ta in khai naperhnak in hmang lekhaw ti song ah nim tuh i. Zanlam tian ciang tuh lo i. Ciaben fangin ciang leh tuh i. 33Ciate khiah lai bel songah tlok lekhaw cia lai bel khiah khoi tuh i si. Cen cia bel songai thil khai a ciang lo i. 34Cen ciabang bel songah ei pha rong vumah ti tlok lekhaw cia rong khiah a ciang lo i. Cen cia bel songai a ding tuh ti khai ciang lo i. 35Cen ciabang a thi ramsa pum khiah a vumah tlok lekhaw lungthu le rongsuang hmunte khai bal tuh sio i si. Ziangmanti fangin ciate khiah a ciang lo i ai ning ca ah a ciang lo i. 36Ikhalselai ti tamngai umhmun cirhti le namkum te khiah a ciang i. Ikhalselai cia a thi ramsa pumin khing lekhaw ciate khai a ciang lo i. 37Cen ciabang a thi ramsa khiah a cing tuh rong cimu vumah tlok lekhaw cia rongci khiah ciang hlen i. 38Ikhalselai cia rongci vumah ti thah in cia rongci vumah cia a thi ramsa tlok lekhaw cia rongci khiah ning ca ah a ciang lo i.
39Ning ei thillhnak ramsa khiah thi lekhaw cia bang ramsa pum khing tu khiah zanlam tian ciang tuh lo i. 40Ciabang sa a ei tu in a pon khiah sawp tu selai zanlam tian ciang tuh lo i. Ciabang sa phur tu in khai a pon khiah sawp tu selai zanlam tian ciang tuh lo i. 41Laipua lakai a bok ai vaktu zuvate khiah ning ca ah ningdulkul i. Ei tuh lo i si. 42Cen laivum ah a bok ai vakte i tu seh, ke li nai i tu seh ke tamngai naite i tu seh, amahte khiah ningdulkul manin ei tuh lo i si. 43Cen a bok ai vaktu nunghing te in ningmah khiah ningdulkul in ning dah ma seh. Cen ciate thawnin ningmah khiah a cianglo in dah tuh lo i si. Ziangmanti fangin amahte in ning rim ruai tuh i. 44Ziangmanti fangin kaimah khiah ning Pathian ning Bawipa ing. Ciamanin ningmah veve khiah ciang ruai tu i lai ciang ning hlim tuh i. Ziangmanti fangin kaimah khiah a cianghlim ing. Laipua ai a bok ai vaktu nunghing te thawn ningmah veve khiah rim ruai tuh lo i si. 45Ziangmanti fangin kaimah khiah ning Pathian tuhin Izip ram songai ning suah tu Bawipa ing. Ciamanin kaimah khiah a cianghlim bangin ningte khai cianghlim tuh i si.
46He khiah ramsa le vaniute le ti songai nunghingte le laipua ah a bok ai vaktu nunghing te khiah 47a ciang le a ciang lo le ei pha le ei pha lo thia thiamhnak tuh dan upadi i.” ti in rel i.