1Ciafangin Bawipa in Moses hnenah, 2“Israel mite hnenah hetih in rel tu: Kaimah Bawipa ning Pathian khiah a cianghlim ing. Ciabangin ningte khai cianghlim tuh i si. 3Kaimah khiah Bawipa ing. Ciamanin ningte aisu hmuah in a nuu le a paa khiah zul tu seh. 4Kaimah khiah Bawipa ing. Ciamanin milim zuk khiah bia tuh lo i si. Cen a bia tuhin milim zuk khai bawn mah ih. 5Bawipa hnenah remhnak ca in raithawihnak hlu leisikhaw, a siang ngai in hlu tuh i si. 6Cia raithawihnak khiah a hlu nia ah le a thangha ah ei tuh i si. Cen ni thum tian taang lekhaw mei thawn tai tuh i si. 7Cen ni thum nia in ei leisikhaw, cia khiah a ningdulkul i. Ning saang sah tuh lo i. 8Ciamanin a ei tu in a sual hnak khiah a tavuan i. Ziangmanti fangin Bawipa hnenah hluhnak a cianghlim khiah zauhsuam i. Cia pa khiah a mi phun songin rek tuh lio i.
9Ning lo ai rong ning khawm fangin ning lo a ning songai rong khiah a veksen in khawm tuh lo i si. Cen a thehhnak rongmu khai khul sio tuh lo i si. 10Cen ning capit vuandum khai a vuva in khawm tuh lo i si. Ning capitti khai a veksenin loih tuh lo i si. Ikhalselai mi farahte le mikhualte ca in hlum tuh i si. Kaimah khiah Bawipa ing.
11Ruko tuh lo i si. Cen mi khai zawl tuh lo i si. Cen pakhat le pakhat hnenah thudon rel tuh lo i si. 12Cen i hming in thudonpui in cukcam tuh lo i si. Cen ning Pathian hming khai zauhsuam tuh lo i si. Kaimah khiah Bawipa ing. 13Cen ning ompui khiah zawl tuh lo i si. Cen rok khai rok tuh lo i si. Cen ning na per sah tuhai ning ngahnak a hlawhtham khiah ning hnenah zan khuavar zinglam tian um ma seh. 14Nangongte khiah cam tuh lo i si. Cen mitcawte hmai ah a bah thai in thingtum khiah dah tuh lo i si. Ikhalselai ning Pathian khiah kih tuh i si. Kaimah khiah Bawipa ing.
15Thu ningkhan fangin a hmanlo in khan tuh lo i si. Mi farahte khiah danghan tuh lo i si. Cen miliante khai hmaison tuh cuang lo i si. Ikhalselai ning ompui khiah a hman in a thukhan sah tuh i si. 16Ning phunpui lakah misiat tuhin vak tuh hnelhno lo i si. Cen ning ompui ur ruai tuhin zai khai bawn tuh lo i si. Kaimah khiah Bawipa ing.
17Cen ning thin songin ning unau khiah hua tuh lo i si. Ning ompui khiah tiam tuh rori i si. Amah manin sual mah ih. 18Phuzul tuh lo i si. Cen ning phunpui pakhat lakah thinraw meng in cim tuh lo i si. Ikhalselai ning ompui khiah ningmah bangin it tuh i si. Kaimah khiah Bawipa ing.
19I thukham khiah hlun tuh i si. Cen ning sumhnam khiah sumhnam phun dang thawn raiki ruai tuh lo i si. Ning lo ah rongci a rawih in pawi tuh lo i si. Cen sahmul le vo thawnai a rawih ai takhnak thilthuam khai sil tuh lo i si. 20A luat khai luat lo a tlan khai tlan lai lo, mi dang ai thawlthan zo nupang thawn itkhat tu khiah rihual thawn vit tuu-ih. Ikhalselai amahte khiah rek tuh lo i si. Ziangmanti fangin cia nu khiah luat lai lo i. 21Cia pa in Bawipa hnenah sualhnak ca hlu tuhin tuu cang pakhat khiah tawkdunhmun tabernacle dawngkham ah kawih tu seh. 22Phungki pa in cia pa sualhnak khiah sualhnak ca ai hluhnak tuu cang thawn a sualhnak khiah Bawipa hmai ah khuk sah tu seh. Ciafangin a sualhnak khiah hlat sah tuh i.
23Cen khia ramah ning hleng fangin ei tuhin thingthai phun cang ning cing fangin, cia a thaite khiah vunpar cem lo ti in siar tuh i si. Kum thum song vunpar cem lo ti in siar tuh i si. Ciamanin ei tuh lo i si. 24Ikhalselai a kum li hnak fangin a thai hmuahhmuah khiah Bawipa anhnak tuhin a ciang hlim i. 25A kum nga hnak fangin ningte in ei tuh i lai i si. Ciafangin in cia thingthai khiah a dim in thai tuh i. Kaimah khiah Bawipa ing.
26Zai sa khai a thi thawn ei tuh lo i si. Tlahsaan tuh lo i si. Cen pol thu khai rel tuh lo i si. 27Ning metmet ai ning sam khiah met tuh lo i si. Cen ning kahmul par khai hmuhhehkul in cem tuh lo i si. 28Mithi ca in ning taksa khiah at tuh lo i si. Cen tattoo khai bawn tuh lo i si. Kaimah khiah Bawipa ning Pathian ing.
29Ning fenu khiah phatemah cang tuhin zuar tuh lo i si. Cialo fangin ning ram khiah phatemah ram cang tuhai, a phalo thawn dim tuh i. 30I Sabbath khiah ul tuh i si. Cen i sanginn khiah zul tuh i si. Kaimah khiah Bawipa ing.
31Tlahsaan thiamte le pol thurel thiamte khiah zai khai nam tuh lo i si. Amahte khiah zawt tuh lo i si. Cialo fangin ning rim ruai tuh i. Kaimah khiah Bawipa ning Pathian ing.
32A lu ah puakpaar naite hmai ah tho tuh i si. Cen a tar te khiah zul tuh i si. Cen ning Pathian khiah kih tu. Kaimah khiah Bawipa ing.
33Cen ning ramah mikhual ning tlawng lekhaw a thiam niu in sik lo in um tuh lo i si. 34Ikhalselai ning lakah mikhual khiah ning songai tehnak bangin sik tuhai amah khiah ningmah bang in it tuh i si. Ziangmanti fangin ningmah khai Izip ramah mikhual i awng i si. Kaimah khiah Bawipa ning Pathian ing.
35Ning thukhanhnak i tu seh, ning tehhnak a saulam, a ritlam le a lian lamah a hmanlo in thukhan tuh lo i si. 36Ning zazu le ning tikal le ning ephah le ning hin khiah a hmanniu in teh tuh i si. Kaimah khiah Izip ramai ning suah tu Bawipa ning Pathian ing.
37Ciamanin i thukham le i dan upadite khiah a veksenin hlun in per tuh i si. Kaimah khiah Bawipa ing.”ti in rel i.