1 “Sik tu! I thuthantu nalaang khiah hlat ing.
Amah in i hlanin lampui sel tuh i.
Cen ning sii hnak BAWIPA khiah,
A temple ah hleng tuh vut i.
Amah khiah ning lungkhimhnak
Thukham dunhnak thuthantu i.
Sik tu. Amah khiah hleng i hang.”ti in
Vancung mite BAWIPA in rel i.
2 Ikhalselai amah hleng nia khiah aisu in tuar ben tuh i?
Amah khiah dak fangin aisu in anh ben tuh i?
Ziangmanti fangin amah khiah pumsu pa maihol bang tuh i.
Amah khiah ponsawp tu pa sapia bang tuh i.
3 Amah khiah pumsu pa le ngun tangka ciang ruai tu pa bang in to tuh i.
Amah in Levi fate khiah ciang ruai tuh i.
Sui le ngun tangka bangin amahte khiah ciang ruai tuh i.
Ciafangin amahte in BAWIPA hnenah
A hlu khiah dikcang niu in hlu thill tuh i.
4 Ciafangin Judah le Jerusalem ai a hlu lakah BAWIPA khiah hlanlai niakhua le
Hlanlai ai kum ah ang awng bangin, ang tuh i.
5 Ciafangin ning nong ah cawhkuan pe tuh in kawi tuh ing.
Kaimah khiah tlahsantu te le
Nulepa sual bawntu te le
Thudon ai thukhamtu te le
Kuli te khiah a nihlawh zawl tu le
Hmaitong le paa nai lo te nemh tu le
Mikhual te a inn ah tlung siang lo tu te
khiah amahte in kaimah i kih lo manin,
A rang ngai in amahte khiah tettikhan tuh ing.”
ti in vancung mite BAWIPA in rel i.
6 Ziangmanti fangin kaimah khiah BAWIPA ing.
Thleng nia nai lo ing.
Ciamanin, Aw Zakuk fapa te,
Ning hnawmcan lo i.
7 Ikhalselai ning paa te sanlai ai panin,
Ning te in i thukham hnenin tlan teu ai,
Hlun lo i si.
I hnenah let tu i lai,
Ning hnenah let leh tuh ing.”
ti in vancung mite BAWIPA in ti i.
“Ikhalselai ning te in,
‘A kon lampui in let leh tuh i ing?’ ti i si.
8 Minung te in Pathian khiah rok tuh im?
Ikhalselai ningte in i rok zo i si.
Ikhalselai ningte in,
‘Akontih in na rok i ing?’ ti i si.
Sephuhtaphuh le a hlu in i rok i si.
9 Ningte khiah awrsia thawn ning cam zo i.
Ziangmanti fangin he ning mi phun veksen in i rok zo i si.
10 Sephuhtaphuh khiah a veksenin rongkhawi hmun inn ah kawih tuu-ih.
I inn song ah rong lo um tu seh.
Vancung dawngkham khiah ning ca in hong in,
Hmuifu tam rauh thawn ning burh tuh manin,
A dong hmun khaan rin ah va tuh lo i.
Cia khiah tunin i cu tu cuk i law,”
ti in vancung mite BAWIPA in ti i.
11 Ningmah ca in ki ning hung sah tuh ing.
Ciamanin amahte in ning lo ai rong khiah hnawmcan tuh lo i.
Cen ning capit kung in khai ning lo ah thai lo in um tuh lo i.” ti in Vancung mite BAWIPA in ti i.
12 “Ciafangin mi phun hmuahhmuah in mi hmuifu ti in ning ko tuh i.
Ziangmanti fangin ning ram khiah a hmuhhiam ram cang tuh i.” ti in vancung mite BAWIPA in ti i.
13 “Ningte in i lakah ponsia pong i si.” ti in BAWIPA in ti i.
“Ikhalselai ning te in,
‘Na lakah zai ponsia pong i ing?’ ti i si.
14 “Ning te in,
‘Pathian na per sah heh a lovang i.
A thukham hlun manin zai kin hnempui i?
Vancung mite BAWIPA hmai ah mikah tu te bang in vak khiah zai kin hnempui i?
15 Ikhalselai tunin mi hngal te khiah hmuifu i ti i ing.
A pha lo bawn tu te khai khang ruai i.
BAWIPA cu tu te khai a luat in um i.’ti i si.”ti in ti i.
16 Ciafangin BAWIPA kih tu te in pakhat le pakhat pon dun ai,
BAWIPA in amahte khiah za i.
Ciamanin BAWIPA a kih tu te le
A hming khiah ngaisung tu te ca in
Hihhnak tuhin ca-uk khiah BAWIPA hmai ah ngan i.
17 Vancung mite BAWIPA in,
“Amahte khiah i daihhnak ber hlawnthil ah i bawn nia ah,
Amahte khiah kaimah ai i.
A na per sah tu a fapa khiah a paa in zah bangin
Amahte khiah zah tuh ing.”ti i.
18 Ciafangin ning te in,
A dikcang le a dikcang lo,
Pathian na per sah tu le per sah lo tu khiah
Thia thiam leh tuh i si.