1 Ni hnuataber lam hleng fangin,
BAWIPA temple sa hmun mual khiah
Mual hmuahhmuah ai vumah sa tuh ai
Tlang hmuahhmuah hnak in saang tuh i.
Mi phun caang khai ciata ah kawi tuh i.
2 Mi phun tam ngai in,
“BAWIPA mual vumah hong nga sing.
Zakuk ai Pathian temple ah feh nga singkhaw
Amah in a thu kin cuk tuh ai,
Kinte in a lampui ah vak tuh i sing.” ti in rel tuh i.
Ziangmanti fangin Zion in upadi dan khiah suak tuh ai,
Jerusalem in BAWIPA thu khiah hleng tuh i.
3 Amah in mi phun khat le phun khat thu khiah
khan sah tuhai,
mi tamngai khiah hau tuh i.
Ciafangin amahte in amahte vangsaute khiah
tuhmui ah bawn tuhai,
Amahte feipui khiah
thing hlawrhnak vang ah can tuh i.
Mi phun khat le phun khat khiah
tawng dun tuh lo ai,
raal tawng dan khai zir tuh lo i hang.
4 Ikhalselai aisu khai amah te capit kung
hnia ah le amah te thaikung hnia ten ah to tuh i.
Aisu in khai amahte khiah lau ruai tuh lo i.
Ziangmanti fangin vancung mi te BAWIPA in rel zo i.
5 Mi dang veksenin amahte pathian hming in vak i.
Ikhalselai kin ngawn kin Pathian BAWIPA
hming in kumzangza vak tuh i ing.
6 BAWIPA in,
“Cia nia ah kawngbai te khiah
hmunkhat in khawm tuh ing.
Mite ai lonhnak te khai pum tuh ing.
Cen kaimah in rimsu ruaihnak te khai khawm tuh ing.
7 Kawngbai mite khiah a taanghnak mite cang tuh i.
Mite ai lonhnak te khiah huthawm nai
mi phun ah cang ruai tuh ing.
Ciafangin BAWIPA in amahte khiah
Zion Mual ah tun ai panin kumzangza tian uk tuh i.
8 Cen aw a saang ngai turual te inn,
aw Zion fenu in buanhmun inn,
Na hnenah,
Hlanlai ai kumpibawi ukhnak
Jerusalem fenu ai kumpibawi ukhnak
khiah hleng tuh i.
9 Tunin zaimanin a cawm ngai in kap i si?
Ning lakah kumpibawi um lo im?
Ning tlangsuak te tang pai berh im?
Ziangmanti fangin naukai nuu bangin na ur vut i.
10 Aw Zion fenu,
Naukai ai ur tu nupui bangin,
naukai ur bang in ur tu.
Ziangmanti fangin tunin khua song in
suak in lo lakah um tuh i si.
Babilon ah rin feh kul tuh i si.
Ciata ah nangmah khiah na tlanh tuh i.
Ciata ah BAWIPA in na raalte kut songin na o tuh i.
11 Cen tunin ram mi tam ngai in
na tawng tuhin khawm tlang zo i.
Amahte in, “Amah khiah riim tu seh.
Kin mit in Zion khiah im nga sing.” ti in ti i.
12 Ikhalselai amahte in BAWIPA ruathnak
khiah ling sah lo i.
A thusawmhnak khai ling sah lo i.
Ziangmanti fangin amah in amahte khiah
fang tel bangin fangcil hmun ah khawm tuh i.
13 “Tho in fang cil tuu-ih, aw Zion fenu.
Ziangmanti fangin na ki khiah
thir bangin bawn tuh ing.
Na keruh khiah dar bang in bawn tuh ing.
Mi phun tam ngai khiah a cik niuniu in seu tuh sio i si.
A tluk lo ai amahte miathnak khiah
BAWIPA hnenah hlu tuh ing.
Amahte thilri khiah laivum pumpalah
BAWIPA hnenah pe tuh ing.”