1Ciafangin Balaam in Balak hnenah, “Heta ah awlta pasarih i sak tulai kawlpaw cang pasarih le tuu cang pasarih khiah a cialep in i dah sah tu.”ti in ruai i. 2Balak in Balaam ruaihnak bangin bawn ai Balak le Balaam in kawlpaw cang pakhat le tuu cang pakhat khiah awlta pakhat caang ah hlu i. 3Ciafangin Balaam in Balak hnenah, “Mei in tai ai na hluhnak hiang ah ding tulai kai tu feh ngang. Bawipa khiah i hnenah kawi in i hmuhhnak hmuah na rel tuh ing.”ti in rel i. Ciafang in ani khai zaikhai um lo hmun tlang vum ah kawi i. 4Pathian khiah Balaam hnenah kawi ai Balaam in, “Awlta pasarih khiah sa ai awlta pakhat vum ten ah kawlpaw cang le tuu cang pakhat ten dah zo ing.”ti in rel i. 5Ciafangin Bawipa in Balaam ka ah thu dah sah ai, “Balak hnenah let tulai hetih in rel tu.”ti in rel i. 6Ciaman in ani khai Balak hnenah let ai Balak khai Moab upate kawmin mei thawn a taihnak a hlu hiang ding khiah tawk i. 7Ciafangin amah in hetih bangin rel i:
“Nisuak hmunlam mual ai Moab kumpibawi
Balak in Aram in i kawih zo i.
‘Kawi in Zakuk khiah i cam sah tu.
Kawi in Israel khiah i hau sah tu!’ ti in i ruai i.
8 Pathian rinin cam lohnak te khiah a kontih in cam thill tuh ing?
Cen Pathian rinin hau lohnak te khiah a kontih in hau thill tuh ing.
9 Ziangmanti fangin lungto vumin amah khiah hmu ing.
Mual vumin amah khiah hmu ing.
Ciata in amahte lekai um tu mi phun te hmu ing.
Amahte khiah mi dang phunte thawn bang dun in ruat lo i.
10 Aisu in Zakuk laivut khiah siar ben tuh i?
Aisu in Israel mite hmunli khan hmunkhat rin siar ben tuh i?
Mi dikcang pa bangin thi i nuam i.
Amah bangin i thi tu she’”ti in rel i.
11Ciafangin Balak in Balaam hnenah, “ Zai i bawt sah i si? I raalte cam tuhin na ko ai a tam ngai in hmuifu sawn bur ang si.”ti in ti i. 12Ciamanin Balaam in, “Bawipa ai i ka songah dahhnak bangin pong tuh lo ing?”ti in sawn i.
13Ciafangin Balak in Balaam hnenah, “Amahte khiah hmu thai in hmun dang ah feh tuhin i hnenah kawi tu. A veksenin hmu tuh lo i si. A puata te lek hmu tuh i si. Amahte khiah ciata in i cam sah tu’ti in ruai i. 14Ciamanin amah khiah Zophim lo in Piskah mual tlang sangber vumah kawih ai awlta pasarih khiah sa ai awlta vumah kawlpaw cang pakhat le tuu cang pakhat tleuh hlu i. 15Ciafangin Balak hnenah, “Khiata ah Bawipa thawn tawk dun lakin he mei thawn tai ai na hluhnak hiang ah ding tu.”ti in ti i. 16Ciafangin Bawipa in Balaam khiah tawk ai a thu khiah a ka songah haih sah ai, “Balak hnenah let tulai hetih bangin pong tuh i si.”ti in rel i. 18Ciafangin Balaam in hetih in rel i:
“Tho tu, Balak, ngai tu! Zippor fapa i ngai tu!
19Pathian khiah minung i lo i.
Ciamanin thudon rel lo i.
Cen minung fa khai i lo i.
Ciamanin sir kul lo i.
A relhnak bangin bawn tuh lo im?
A relhnak bangin khim ruai tuh lo im?
20Hmuifu bur tuhin thu i pe zo i.
Amah in hmuifu bur zo i.
Kai in kham thill lo ing.
21Amah in Zakuk songah sualhnak hmu lo i.
Cen Israel songah khai a pha lo hmu lo i.
Bawipa a Pathian khiah amah thawn um i.
Kumpibawipa auhnak aw khiah amahte lakah um i.
22Pathian in amahte khiah Izip ramin suah zo i.
A tha khiah ramlak ai kawlpaw cang bang in hat i.
23Aisu in khai Zakuk khiah cam thill lo i.
Aisu in khai Israel khiah dawi thawn neh thill lo i.
Zakuk le Israel thu ah, ‘Pathian ai bawnhnak khiah
hmu tu!’ti in ti tuh i.
24Chintit nu bangin mi phunkhat khiah tho zo i.
Chintit pa khiah tho zo ai a sa te khiah ei ai a rekhnakte
a thi ding hlan lo amah khiah bual tuh lo i.”ti in ti i.
25Ciafangin Balak in Balaam hnenah, “Amahte khiah cam khai cam tau mah. Cen hmuifu khai bur tau mah!”ti in ti i. 26Ciaman Balaam in Balak hnenah, ‘Bawipa pong hnak bangin bawn tuh ing.’ti in na rel lo ing?”ti in sawn i.
27Ciafangin Balak in Balaam hnenah, “Kawi tulai hmun dang ah na fehpui ngang. Pathian khiah lungkhim thai pang i. Ciafang ciata in amahte khiah i cam sah tu.”ti in ti i. 28Balak in Balaam khiah nelrawn hmuh hmun Peor mual sangber vumah kawih i. 29Ciafang in Balam in Balak hnenah, “Heta ah awlta pasarih i sak tulai kawlpaw cang pasarih le tuu cang pasarih khiah a cialep in i dah sah tu.”ti in ruai i. 30Balak in khai Balaam ruaihnak bangin bawn ai awlta vum cang ah kawlpaw cang pakhat le tuu cang pakhat ten dah i.