<< PROVERBS 1 >>
1 Israel kumpibawipa David ai fapa Solomon thuthimhnak proverb thu.
2 Cia proverbte khiah fimhnak ngahhnak tuh le
thinlung sup benhnak tuh le thuthuk ling tuhhnak le
3 thinsup le a kung niu ai nung thiam tuhhnak le
a pha le a hman le a mawi ai ruat thiam thai le
4 a voite khiah a kungniu in nung thiam thai in le
mi no te hnenah linghnak le ril thiam thaihhnak tuhai relhnak i.
5 Mifim pa in ngai tuh ai a linghnak khang tuh amam i.
Mifim pa in cukhnak ngah tuh amam i.
6 Ciafangin amah in proverb le santehhnak te le
mifim te ponghnak khiah ling sah tuh i.
7 Bawipa kih heh fimhnak a hmasaber i.
Ikhalselai mivoite in fimhnak le cukhnak khiah daih lo i.
8 I fapa, na pa ai thucukhnak khiah ngaai tu.
Na nuu thukham khai hai mah.
9 Ziangmanti fangin ciate khiah na lu ah
a mawi lukhip thawn bang tuhai,
na hawng ah khi thawn bang tuh i.
10 I fapa, mi sualte in so napaw lekhaw,
Ngai mah.
11 Amahte in, “Kin thawn kawi tulai,
Mi rek tuhin bawh nga sing.
A thu um lo in mawhhluk tuh nai lo
te khiah a thupniu in bawh nga sing.
12 Amahte khiah hlankua bangin lem lio nga sing.
Hlankua songai tolh tute bangin
a pumpui in lem lio nga sing.
13 Thil mankhung a phun cang tawk tuh i sing.
Kin rokhnak thilri thawn kin inn dim ruai nga sing.
14 Kin pawl ah lut tu lio lai
Kin veksen in paisa dip pakhat
lek nai tlang nga sing.” ti in na sawm lekhaw,
15 I fapa, amah thawn lam lakah vak khat mah.
Na ke khiah amahte lampui in pial tu.
16 Ziangmanti fangin amahte khiah a pha lo
bawn tuhin dawp i.
Mi rek tuhin rualrang i.
17 Thungai in, vaniu mit hmuhin sur
pharh hnelhno khiah a lo vang i.
18 Ikhalselai amahte in amahte thi lala bawh i.
Amahte nunhnak lala a thupniu in bawh i.
19 A miat daih ze ai pamhap tute nundan khiah
cia bang i.
A naitu te nunhnak khiah lang sah lio i.
20 Fimhnak in sumpua in a cawm ngai in au i.
A aw khiah lentawng hnenin au i.
21 Amah in mi taai hmun ber ah au i.
Khua ai kawldawngkham hong hmunah
A thu khiah rel i.
22 “Mi voite, zaicam tian mivoi ning nuam i?
Mi zauhsuam tute in mi zauhsuam khiah hiam i.
Mi voite in fimhnak khiah hua i.
23 I tiam fangin i ngai tulai,
Na vumah i rauhla na burh tuh ing.
I thu khiah na ling ruai tuh ing.
24 Na ko napui ai i awi lo i si.
I kut thawn ning hawl napui ai,
aisu in khai zainam lo i si.
25 I thusohnak khiah zainam lo ai
i tiamhnak khiah na daih lo manin,
26 Har na sa rauh fangin khai hnih na san tuh ing.
Na hnenah laukulhnak hleng fangin khai na im tuh ing.
27 Laukul hnak khiah khuahu bangin le na hnawmruai tu khiah
khuahu pui bangin hleng fangin,
Thintawp hnak le thin rimsu hnak hleng fangin,
hnih na san in na im tuh ing.
28 Ciafangin amahte in i ko tuhai,
amahte khiah sawn tuh lo ing.
A kungniu in i sii tuh riamro napui ai
i tawk tuh lo i.
29 Ziangmanti fangin amahte in fimhnak khiah hua ai,
Bawipa sawn kih tuh in tum lo i.
30 Amahte in i thusohnak khiah daih lo ai,
I tiamhnak khiah zauhsuam i.
31 Ciamanin amahte in amahte nunghnak
bangin a thai ei tuh i.
Amahte ruathnak bangin amahte khiah kham tuh i.
32 Amahte in thungai nuam lo manin mivoite
khiah rek tuh i.
Ngulsul in um manin mi voite khiah hnawmcan tuh i.
33 Ikhalselai i thu i ngai tu khiah a muang niu in um tuh i.
A pha lo khiah lau kul lo in amah khiah him tuh i.’ ti in ti i.
<< PROVERBS 1 >>