1 Inn dim ai puai rong khiah hauhnak thawn ei tah in,
thin nuamniu in rongkhing tlawm niu ei khiah pha sawn i.
2 A fim hnenum in zakthi kul fapa khiah uk tuh i.
Amah in a unaute kawmin roco tuh ve i.
3 Thil er hmun bel khiah ngun er hmun ca i.
Maipual khai sui ca i.
Ikhalselai Bawipa in thinlung khiah cu i.
4 A pha lo bawn tu pa in thudon khiah ngai i.
Thudon rel tu pa in misiathnak pon khiah ngai liatlo i.
5 Mifarahte zauhsuam tu in a Bawntu pa zauhsuam i.
Mite harsahnak lakah tluangkhawng tute khiah
cawh lo in luat tuh lo i.
6 A fate ai fate khiah patar hnenah sui lukhuk bang i.
Cen paate khiah fate thangphathnak i.
7 Mivoite in pon pha pong thiam lo i.
Cen bawite in thudon rel tuh khai mawi lo i.
8 Nawhthuh khiah a pe tu te mit ah a
mankhung lungto bang i.
A feh hmun cang ah a miat ngah i.
9 Sualhnak khuk sah tu in ithnak sii i.
Ikhalselai not leklo ai thu reltu in a
rualpui a pha ber te khiah khek ruai i.
10 Mivoi pa khiah vel zakhat vit tah in,
mi fim pa tiam khiah hnempui sawn i.
11 Mi pha lo pa in raaltawng tuh ian in um i.
Ciamanin huatsuak ngai nalaang khiah
amah tawng tuhin hlat tuh i.
12 Mi pakhat in mi voi pa a voi teng in
tawk tah in, a niute ru sah hnak
vompui khiah tawk tu sawn seh.
13 A pha khiah a pha lo thawn hlawhtham tu in,
A pha lo khiah a inn songin tlan tuh nawn lo i.
14 Thu el dun a pan ngom khiah ti hlat hnak bang i.
Ciamanin tawng dun hnak suak thai lo in thu el dun awl tuu-ih.
15 Misualte luat ruai tu le mi dikcang te cawh tu khiah
Bawipa hmai ah ningdul kul i.
16 Mivoi pa in fimhnak ngah tuh khiah nuam lo i.
Ciamanin, fimhnak lai tuhin mivoi pa kut ah
tangka um khiah zai hnempui i?
17 Rualremte in a zomzet in it dun i.
Harsahnak songin ulenau suak i.
18 Fimhnak nai lo te in hnuksat dunin aamah khan i.
A rualpui ca in aamah khan sah i.
19 Sualhnak daih tute in hau hnak khai daih i.
Cen a dawngkham a saang ngai ai sa tute in hnophnak sii i.
20 Hrokhrawl thinlung naite in a pha tawk tuh lo i.
Pon sia pong tute in a pha lo songah tlok i.
21 Thu sang lo fa naitu paa in lungsiahnak ngah i.
Cen mivoi ai paa in ang tuh nai lo i.
22 Thin songai ang khiah sii bang in pha i.
Ikhalselai thinhnawm hnak in ruh khiah ro ruai i.
23 Misual pa in thu hman khiah sual ruai tuhin
a thupniu in nawhthuh lang i.
24 Mifim pa in fimhnak khiah a mithmuh ah dah i.
Ikhalselai mivoi pa mit khiah
laivum tong hmun lam ah sik hnelhno i.
25 Mivoi fapa in a paa khiah lungsia ruai i.
Cen a paai tu a nuu khai thinthip ruai i.
26 Mi dikcangte cawh khiah pha lo i.
Mi dikcang bawite khai vit pha lo i.
27 Fimhnak naite in pon tlawm niu in pong i.
Ling thiamhnak naite in a nem niu in um i.
28 Mivoi pa rin pong lo in um fangin mifim ti in ko i.
Cen a kaa ciip meng in um fangin,
amah khiah a fim ti in ko i.