1 Hming pha tuh khiah milian tuh tahin ril pha sawn i.
Mite in zarto ai ithnak khiah
sui le ngun tah in ril pha sawn i.
2 Mi lian le farahte te khiah he vumah bang dun i:
A veksenin Bawipa in bawn i.
3 Mifim pa in a pha lo khiah hmu hal i.
Ciamanin ani khai relh i.
Ikhalselai mivoi te in tu vak tekto manin cawhkuan ngah i.
4 Thinniam le Bawipa kih in um khiah
Lianhnak, upathnak le nunhnak i.
5 Mi sualte lampui ah hling le thang um i.
A nunhnak kil tute in ciate hnenin
a hla ngai ah um tuh i.
6 Naupang niu khiah
a feh tuh hmun lampui cuk tulai,
A tar leh fangin cia lampui hmunin tlan tuh lo i.
7 Milian te in mi farahte uk i.
Thil pu tu khiah a put tu hnenum i.
8 Sualhnak cing tute in lungsiahnak khawm tuh i.
A thinrawhnak tokrolh khai rall tuh i.
9 Hmunthiam mite khiah hmuifu i.
Ziangmanti fangin amah in a rong khiah mifarah te pe i.
10 Mi zauhsuam thai pa khiah
sumpua ah suah tu teu lai
Hauhnak khai tlan tuh ve i.
Tawngdun le zauhsuam dunhnak khai pai tuh i.
11 Thinlung ciang daih tu le ponka hlum naitu khiah
kumpibawipa rualpui i tuh i.
12 Bawipa mit in fimhnak khiah kilkhawl i.
Ikhalselai rinsantlak lote pon khiah lon sah i.
13 Thazawng pa in, “Sumpua ah chintit um i.
Lam lakah i rek tuh lio i.” ti in ti i.
14 Phatemah nupui ka khiah a thuk ngai kua bang i.
Bawipa in huahnak pa khiah cia kua songah tlok tuh i.
15 Voihnak khiah naupang thinlung songah pen meng i.
Ikhalselai tiamhnak tokrolh in amah
hnenin a hla ngai ah hnawt tuh teu i.
16 Milian cang tuhin mifarahte nemhtu le
miliante thil pe tu khiah farah tuh rori i.
17 Na bil thawn mifim te thu khiah ngai tu.
Na thinlung in i fimhnak khiah hlun tu.
18 Amahte khiah na thin songah khawi in
Na kaa songah um lekhaw, na ang tuh i.
19 Nangmah in Bawipa khiah rinsan tuh in,
Tunnia ah nangmah tianin na tiam zo ing.
20 Nangmah hnenah a pha ngai thusawmhnak le
fimhnak khiah na ngat zo i lo ing?
21 Ciafangin thuhman khiah a peupeu i ti
khiah kaimah in na ling ruai tuh ai
na hnenah hlat hnakte khiah a hman in
sawn ben tuh i si.
22 M farah khiah a farah manin rok mah.
Cen kawldawngkham ah a urte khiah nemh mah.
23 Ziangmanti fangin Bawipa in
amahte khiah bawm tuhai,
a rok tu te khiah rok sah tuh i.
24 Thinraw ai um thai tio pa thawn rual dun mah.
Thincom te thawn khai vak mah.
25 Cialo fangin amahte dan khiah cung in
Nangmah veve khiah thang tauh tuh i si.
26 Aamah khan tuhin hnuksat tu lo i mah.
Batba ca in aamah khan tu khai lo i mah.
27 Nangmah in pe tuhhnak nai leh lo fangin,
zaimanin amah in na khuahluan khiah
na hnia in na lang sah tuh lio i?
28 Na paate ai dah awnghnak hlanlai ai
ramri khiah thawn sah mah.
29 Mi pakhat khiah a naper pha bik in
per hmu aw sim?
Amah khiah kumpibawipa hmai ah ding tuh i.
Aisu in khai ling lohnak mite hmai ah ding tuh lo i.