1 Mi-uk tu pa thawn rong ei tuhin na to fangin,
Na hmai ai dahhnak rong khiah a phan niu in sik tu.
2 Nangmah khiah rong to thai bik ilesikhaw,
Na dangkua ah vang khiah dah tu.
3 A rong ur khiah rawp sah mah.
Ziangmanti fangin cia rong khiah mizawl hnak i.
4 Milian cang tuhin a tluk lo in naper hnelhno mah.
Suphnak tuh fimhnak nai tu.
5 Um lo pui thil khiah sik hnelhno nga sim?
Ziangmanti fangin lianhnak thilri te in ko
nai ai mu bang in vancung lamah zuang teu i.
6 Mi hmundit te rong khiah ei sah mah.
A ur ngai a rong khai ot mah.
7 Ziangmanti fangin amah in a thin songai
ruat bangin, amah khiah cia bang i.
“Ei in ding tu.”na ti napui ai
a thinlung khiah na hnenah um lo i.
8 A tlawmniu na ei hnak lam khiah
awk leh tuh sio i si.
Na pon hlum ponghnak khai
a lovang cang tuh i.
9 Mivoi pa zak in pong mah.
Ziangmanti fangin na fimhnak pon khiah
zauh na suam tuh i.
10 Hlanlai ai ramri khiah thawn sah mah.
Paa nai lote lo songah khai lut mah.
11 Ziangmanti fangin amahte Luangtlantu khiah
thahat ngai i.
Amahte ca in amah in na tawng tuh i.
12 Na thinlung in thucukhnak khiah daih tu.
Cen na bil khai fimhnak thu ngai tu seh.
13 Naupang khiah tiam lo in sup mah.
Ziangmanti fangin tokrolh in vit rin in
amah khiah thi tuh lo i.
14 Nangmah in amah khiah
tokrolh thawn vit tuh le amah khiah
hell songin luat ruai tuh i si.
15 I fapa, na thinlung khiah fim lekhaw,
I thinlung khai ang tuh ve i.
16 Na kaa in thu hman pong fangin,
I thin song in i ang rauh tuh i.
17 Na thinlung in mi sualte khiah ot ma seh.
Ikhalselai sunnivui in Bawipa khiah kih tu.
18 Ziangmanti fangin a bo nia um tuh i lai.
Ciafangin na ummhnak khiah pai tuh lo i.
19 I fapa, i thu i ngai tulai fim tu.
Na thin lung khiah a hman lampui ah dah tu.
20 Capittizu ding hnelhnote thawn komdun mah ih.
Sa ei rongham te thawn khai pawldun mah ih.
21 Ziangmanti fangin zukhamte le ronghamte khiah farah tuh i.
Mitmu sung tute in angki her sil tuh i.
22 Na cawitu na paa thu khiah ngai tu.
Cen na nuu khai a tar fangin nautat mah.
23 Thuhman khiah lai tulai, zuar leh mah.
Ciatih in fimhnak le thucukhnak le ling
thiam hnak khai lai in zuar leh mah.
24 Mi dikcang ai paa khiah ang tuh rauh i.
Cen a fim fapa nai tu pa khai amah lakah ang tuh ngai i.
25 Na paa le na nuu khiah ang tu seh.
Na paai tu na nuu khiah ang ruai tu.
26 I fapa, na thinlung khiah i pe tu.
Na mit thawn i lampui khiah sik tu.
27 Ziangmanti fangin phatemah nuu khiah a thukngai kua i.
Hlotlau nuu khiah a fipniu namkum bang i.
28 Cia nuu in a sualpui tuhte khiah bawh i.
Pasal puite lakah hlotlau tam ruai i.
29 Aisu khiah harsa i? Aisu khiah lungsia i?
Aisu te in hau hnelhno i?
Aisu te in cam tuh nai i?
Aisu in a lovang in maa nai i?
Aisu in mit san nai i?
30 Capittizu hnenah a rai um tu te le a rawihhnak
capittizu sii tu te in nai i.
31 Capittizu khiah a san teng fangin sik mah.
Khuat songah a tleu teng fangin le
a nemniu in khuat songah a mer fangin sik mah.
32 Hnuavai fangin rul bangin na cik tuh ai,
a ru nai rul bangin na kai tuh i.
33 Na mit thawn a phun cangcang hmu tuh i si.
Na thinlung in sualhnak thu rel tuh i.
34 Ciafangin nangmah khiah tipui laiteng ai
taal tu thawn na bang tuh i.
Ihlahle timbaw khuam vumah it ai:
35 “Amahte in i beng napui ai, i ur lo i.
Amahte in i vit napui ai ling veng lo ing.
I phawk fangin zu dang ding tuh sii tuh ing.”
ti ai rel tu pa thawn na bang tuh i.