1 A pha lo mite khiah ot mah. Pawl khai pawl mah.
2 Ziangmanti fangin amahte thinlung in
tawngdun tuhhnak lek ruat i.
Cen a kaa thawn huatsuakhnak thu lek rel i.
3 Fimhnak thawn inn sa i.
Ling thiamhnak in cia inn kho ruai i.
4 Fimhnak in a khan song khiah
thil mankhung le thil mawi thawn dim ruai i.
5 Mifim pa khiah thahat i.
Fimhnak nai tu pa khiah cak amam i.
6 A fim thusawmhnak thawn na raal khiah tawng tuh i si.
Thusawmhnak tampui nai fangin a hman in thukhan thill i.
7 Fimhnak khiah mivoi pa ca ah a saang ze i.
Amah in kawldawngkham ah a kaa hong lo i.
8 A pha lo bawn tuh ai ruat hnelhno tu
khiah mi siava ti in ko tuh i.
9 Voihnak ai ruat hnelhno hnak khiah sualhnak i.
Thu sang lo te khiah mite in ningdul i.
10 Harsahnak hleng fangin thikhum in
na tlu lekhaw, Na tha khiah nau i.
11 Thihhnak hnenlam ah dukhnak te khiah o tu.
Cen rekhnak hmunah tlok tute khiah kham tu.
12 Nangmah in, “He khiah ling bul lo i ing.” ti in rel le si,
Mi thinlung zong tu Pa in ling tuh lo im?
Na kil tu Pa in na ling sah tuh lo im?
Amah in aisu hmuah khiah amahte
perhnak bang in man tham tuh lo im?
13 I fapa, khoitilu khiah ei tu. A pha i.
Khoihnar khiah ei tu. A hluum i.
14 Ciatih bangin fimhnak khai na nunhnak ca ah pha i.
Fimhnak khiah tawk lesikhaw,
hmailam ah umm tuhhnak nai i si.
Na ummhnak khiah na lang sah tuh lo i.
15 Aw misual pa, mi dikcang pa inn khiah
bawh hnelhno mah.
A umhmun khiah rok sah mah.
16 Ziangmanti fangin mi dikcang pa khiah
vel sarih bah tuh napui ai tho leh tuh i.
Ikhalselai misual pa khiah rimsuhnak in bah ruai tuh i.
17 Na raalte bah fangin im mah.
Amah in lungsui fangin ang mah.
18 Cialo fangin Bawipa in hmu ngaikhaw,
Bawipa thinrawhnak khiah
amah hmun in lang mawh ngai.
19 A pha lo bawn tute manin caam hnelhno mah.
Misual te khai ot mah.
20 Ziangmanti fangin a pha lo mite in
hmailam ah umm tuhhnak nai lo i.
Misualte mai-inn khiah dit sah tuh lio i.
21 I fapa, Bawipa le kumpibawipa khiah kih tu.
A thleng nuam thai te khiah pawl mah.
22 Ziangmanti fangin amahte rimsuhnak khiah
mangrin lo in suak tuh vut i.
Hete panih in zaizah hnophnak
suak ruai ben thai khiah aisu in ling i?
23 Hete khai mifim te in nai i:
Thukhan fangin hmaisonhnak nai pha lo i.
24 Misual pa hnenah, “Dikcang i si.”
ti in rel tu khiah mite in awrsia cam tuh i.
Mi phun hmuahhmuah in hua tuh i.
25 Ikhalkselai misualte tiamtu khiah ang tuh i.
Amahte vumah hmuifu a pha hleng tuh i.
26 A hman ai phi thiam te in a kaa thut i.
27 Sumpua ah na naper tuhhnak khiah paai tu.
Na thilte khiah kaih dun thai in lo lai ah tuat tu.
Ciaben fangin na inn khiah sa tu.
28 A thu um lo in na ompui lakah tettikhan mah.
Na kaa thawn mi zawl tuh i sim?
29 Cen, “Amah in i vumah bawn bang in
amah vumah bawn tuh ve ing.
Amah bawnhnak bangin rul tuh ing.” ti in pong mah.
30 Thazawng pa lo le mivoi pa
capit vuandum hiang ah kawi ing.
31 Cia vuandum khiah hling thawn dim i.
Arsam in khai khuk bial i.
Lungto thawn tianghnak a khan khai khoi sio i.
32 Cia khiah hmu fangin, kai khai ruat ing.
I sik leh thio fangin thucuk hnak ngah ing.
33 Mitmu tlawm niu, a tlawm niu mitmu sung,
a tlawm niu in a kutte khiah a kaang ah
dah ai com tute hnenah
34 Na farahhnak khiah damiah bang in hleng tuh i.
Na samhnak khiah raalkap bangin kawi tuh i.