1 Kumpibawipa Lemuel khiah a nuu inPathian relhnak thu khiah hetih bangin cuk i:
2 Aw i fapa, i songai suakhnak fapa,
i thukhamhnak bang ai ngahhnak i fapa.
3 Na tha khiah nupuite hnenah pe mah.
Cen na can khiah kumpibawite
hnawmcan tute ca in hmang mah.
4 Aw Lemuel, kumpibawite in capittizu ding pha lo i.
Bawite in khai zu ding pha lo i.
5 Amahte in zu ding fangin upadi dan hai mawh ngai.
Ciafangin anhar tuartu te khiah
a hman in thukhan sah tuh lo i.
6 A thi banghma te hnenah zu pe tu.
Cen capittizu khiah thinthip te pe tu.
7 Cia pa in ding tu selai a farahhnak le
a rimsuhnak khiah hai tuh i.
8 Amahte veve ca pong thiam lo te ca in pong sah tu.
A thi tuh hmuahhmuah te ca in pong sah tu.
9 Mifarah le a sam mite ca in pong sah in
ahman ngai in thukhan sah tu.
10 Aisu in nu pha ngai khiah tawk thill i?
Cia nuu khiah lungto mankhung tah in manhar sawn i.
11 A pa in cia nu khiah umhlah lo in sang i.
Ciamanin a pa in miat lohnak tuh thu um lo i.
12 Cia nuu in a pa hnenah, a nung song hmuah
siathnak i lo ai phathnak bawn sah i.
13 Cia nuu in sahmul le thiam te sii i.
A kut thawn thakawl ngai in naper i.
14 Amah khiah sumpei tu te timbaw thawn bang i.
Ram hla ngai ai rong khiah kawih i.
15 Zan lai in tho ai a innkuate khiah rong suan i.
A hnenum nupangte ca in khai rong dah sah i.
16 Lo pakhat khiah sik ai lai i.
A ngahhnak a miat thawn capit vuandum bawn i.
17 Amah in amah veve khiah a bante kawm in thahat ruai i.
18 A dawr bawnhnak thilri khiah a pha i ti khiah hmu i.
A mai-inn khai zanlai ah dit lo i.
19 A kut ah vo sualhnak le vo kher hnak sin in awh tio i.
20 A kut khiah mi farahte hnenah san ai
a sam tute khiah a kut thawn bawm i.
21 A innkuate ca ah vur tla fangin thincawl lo i.
Ziangmanti fangin a innkuate khiah
pon a san thawn thuam liang i.
22 Amah ca in ponbu khiah tak i.
A thilthuam khiah a pha ngai thiam le a num pon i.
23 A pa khiah kawl dawngkham ah ram song ai
mi upate kawm in to fangin, mi hmuah in ling i.
24 Amah in thiam thawn angki te tak ai zuar i.
Dawr bawntute khiah elpen zuarh i.
25 A thilthuam khiah thazaang le upathnak thawn thuam i.
A cu khim fangin amah khai ang tuh i.
26 Fimhnak thawn a kaa in pong i.
A kaa songah mi ninghiohnak upadi dan khai um i.
27 Amah in a innkua te nunhnak khiah sik i.
Nihlawh leng in rong ei menma in um lo i.
28 A fate in khai tho ai amah khiah hmuifu ti in ko i.
A pa in khai amah khiah hmuifu i ti in ko ai,
29 Amah khiah, “Nupui tamngai in a pha ngai khiah bawn zo i.
Ikhalselai nang in lan sio i si.” ti in cuan i.
30 Mi lawm thiam heh sang ngam lo i.
Hmel mawi khai a lovang i.
Ikhalselai Bawipa kih tu nupui khiah mi in cuan tuh i.
31 A hlawhhnak bangin amah khiah lehsawng tham tu.
Kawl dawngkham ah amah rori ai perhnakte in cuan tu seh.