1 I fapa, i thu khiah hlun tulai
i ruaihnak thute khiah na thin songah
hlawnthil bangin khawi tu.
2 I ruaihnak thu khiah hlun tulai na nung tuh i.
I upadi dan khiah na mit fang bang in dah tu.
3 Na kut zung ah pen tu.
Na thinlung calung vumah ngan tu.
4 Fimhnak khiah, “I farnu.”ti in ko tu.
Ling thiamhnak khiah na nong ber
letlo na unau bang in ko tu.
5 Amahte in misual nupui hnenin kil na
khawl tuh i.
Hlotlau nupang zawlhnak pon hnenin
na him ruai tuh i.
6 Ziangmanti fangin i inn dawngkham niu
songin, sik ai,
7 Mi voi te lakah le tlangval niute lakah
Linghnak nai bul lo tlangval pakhat khiah
8 Cia mi sual nupui inn hiang ah vak hmu ing.
Cia tlangval pa in cia nuu inn ah kawi teu i.
9 Cia khiah zanlam khuathim ngom le zan
seulai le khuathim teng i.
10 Cia tlangval pa khiah nupui pakhat in caang i.
Cia nuu khiah phatemah thuam sil ai,
cia nuu in mizawl thai thinlung khai nai i.
11 Amah khiah kaa tam i ai, aisu khai kih lo i.
A ke khai a inn ah um meng thill lo i.
12 Amah khiah sumpua ah um tuak, cen
lentawng ah khai um tuak i.
Nuamhmun cangah bawh hnelhno i.
13 Cia nuu in cia tlangval pa khiah pom ai thut i.
Hmaisong lo in tlangval paa hnenah:
14 “Remhnak ca ai raithawihnak a hlu nai ing.
I thukhamhnak bangin tunnia ah bawn zo ing.
15 Ciamanin na caang tuh in suak ing.
Na hmai sii tuhin kawi ing.
Cia tunin na tawk i hang ing.
16 I khuahluan khal a cawihsa ponbu thawn phah ing.
Izip ramai pon phaber thawn khuk ing.
17 Cen i khuahluan khiah rimhmui myrh,
aloe le sinamon thawn rawih zo ing.
18 Kawi tulai, zing khuavar tian it dunin it kawm nga sing.
Ithnak thawn nunnuam in um kawm nga sing.
19 I pa khai inn ah um lo i.
A hla ngai ah khualsi teu i.
20 Amah in tangka dip khat dim in keng ai,
A nia khim fangin tlung tuh i lai.” ti in rel i.
21 A ponka hlum thawn amah khiah zawl ai,
a ponka nal thawn amah khiah forh i.
22 Ciafangin tlangval pa khai, kawlpaw cang
khiah a ro hmun ah kawi bangin cia nuu khiah hlun teu i.
Mivoi pa in a ke henhmun thingtlep hnenah
kawi bang in ani khai kawi ai,
23 Ciafang in a thin khiah conkiang bang in kap ai,
vaniu khiah thang songah a rang ngai
in zuang bangin, cia nuu hnenah kawi ai,
a nunhnak thawn rul kul tuh khiah ling lo i.
24 Ciamanin i fate, i ngai tuu-ih.
I kaa ai relhnak thu khiah ngai tuu-ih.
25 Ning thinlung in amah khiah hlun mah ih.
Cia nuu lampui ah khai vak mah ih.
26 Ziangmanti fangin cia nuu in mi tam ngai
khiah ur ruai i.
Mi upate khiah a veksenin cia nuu in rek i.
27 A inn khiah hell feh hmun lampui i.
A inn khiah thihhnak khaan songah tolh hmun i.