1 Aw BAWIPA, i thinlung veksen thawn na cuan tuh ing.
Ngaihsun urkul na bawnhnak khiah a veksen in rel tuh ing.
2 Na lakah i ang tuh i. Aw a Sangber Pa,
na hming cuan kongin lasa tuh ing.
3 I raalte khiah let leh fangin,
na hmai ah tlu tuh ai rall tuh sio i.
4 Ziangmanti fangin, kaimah ca le kaimah thu ca in i tawng sah i si.
Kumpibawi tauhkheng vumah to in a dikcang in thukhan i si.
5 Mi phunte khiah hau i si.
Misualte khiah hnawmcan liang i si.
Amahte hming khiah a kumzangza in phiat sah sio i si.
6 I raalte khiah kumzangza in hnawmcan sek i si.
Amahte khua khai hnawm sah sio i si.
Amahte khiah aisu in khai hih lo i hang.
7 Ikhalselai BAWIPA khiah kumzangza in nung tuh i.
A kumpibawi tauhkheng khiah thukhan tuhin remcia zo i hang.
8 Laivum khiah a dikcang in thukhan tuh i hang.
Mite khiah a dikcang ngai in thukhan sah tuh i.
9 BAWIPA khiah mite ai nemhhnak mite buanhmun i tuh i.
Rimsu fangin buamhnun i tuh i.
10 Na hming na ling tute in na sang tuh i.
Ziangmanti fangin, BAWIPA nangmah in na sii tute khiah zam lo i si.
11 Zion ai umtu BAWIPA khiah cuan in lasa tuu-ih.
A bawnhnak khiah minungte lakah rel tuu-ih.
12 Amah in phuzul fangin, amahte khiah hih i.
Thinniamte kaphnak khiah hai lo i.
13 Thihhnak dawngkham in i daangtu, aw BAWIPA!
Ngaih i har tu.
I huatute in rim i su ruaihnak khiah i ruat sah tu.
14 Ciafangin na cuanhnak khiah a veksenin
Zion Fenu te kawl dawngkham ah rel tuh ing.
Na ohnak lakah i ang tuh i.
15 Mi phunte khiah amahte co hnak kua songah tlok berh i.
Amahte thuphnak sur songin amahte khiah awk sek i.
16 BAWIPA khiah a thukhanhnak in ling thill i.
Misualte khiah amahte bawnhnak in thang bangin awk i. Higgaion. Selah.
17 Misualte khiah hell songah tlok tuh i.
Pathian hai tu mi phunte khai ciatih bangin rall tuh i.
18 Ziangmanti fangin a samtute khiah hai tuh ngio lo i.
Cen mi farahte ummhnak khai a kumkhua in rall tuh lo i.
19 Tho tu, aw BAWIPA! Mite in neh ma seh.
Mi phunte khiah na hmai ah thukhan tu .
20 Mi phunte in amahte khiah minung ngawn i ti ling thai in,
amahte khiah lau ruai tu, aw BAWIPA.