1 BAWIPA hnenah khaal fangin ruah si ruai tuh in ngen tuu-ih.
Khuahu mairo bawn tu khiah BAWIPA i.
BAWIPA in amahte khiah ruahsar pe tuh i.
Mi veksen ca in lo ah hampa po ruai tuh i.
2 Ziangmanti fangin milim zuk te in thudon rel i.
Tlahsan tu te hmu hnak khiah thudon pui i.
A relhnak khai thu lovang mang i.
Amahte in mi thinnuam ruai khiah thu lovang i.
Ciamanin amahte khiah tu te bang in lamtler i.
Tukhal tu um lo manin amahte khiah harsa hnak tawk i.
3 “Tukhal tu te lakah i raw i.
Mekhal tu te khiah cawh tuh ing.
Ziangmanti fangin vancung mite BAWIPA in a tu run Judah mite khiah fan tuh i.
Amahte khiah raaltawng hnak a kumpibawi siphuh bang in bawn tuh i.
4 Amah hmun in inn ning lungto hleng i.
Amah hmun in buk khih hmun khuam hleng i.
Amah hmun in raaltawng hnak kahpuk hleng i.
Amah hmun in uktu a veksen in hleng i.
5 Amahte khiah lam lakai raaltawng hmun ai nawng songah a raalte tlawh tu raal bawite bang tuh i.
BAWIPA khiah amahte thawn um manin amahte in raaltawng tuh i.
Siphuh totu te khiah zakthi ruai tuh i.
6 Judah innkua khiah kho ruai tuh ing.
Joseph innkua khiah o tuh ing.
Amahte khiah tlun leh tuh ing.
Ziangmanti fangin amahte vumah ngaihhar ing.
Amahte khiah kaimah in hnawt awng lo bangin um leh tuh i.
Ziangmanti fangin kaimah khiah amahte Pathian BAWIPA ing.
Amahte khiah ngai sah tuh ing.
7 Efraim mite khiah raal bawipa bang tuh i.
Amahte thin khiah capittizu thawn ang bang in ang tuh i.
A fate in cia khiah hmu tuh ai ang tuh i.
Amahte khiah BAWIPA lakah ang tuh i.
8 Amahte khiah singsir tum in
Amahte khiah khawm tuh ing.
Ziangmanti fangin amahte khiah tlanh tuh ing.
Amahte khiah hlanlai ah khaang awng bang in, khaang leh tuh i.
9 Amahte khiah mi dang te lakah cing tuh ing.
Ram hla ngai in amahte in i hih tuh i.
Amahte khiah a fate kawmin hmunkhat in nung tuh i.
Amahte khiah tlung leh tuh i.
10 Amahte khiah Izip ram in khai tlun leh tuh ing.
Assiria ram in khai khawm tuh ing.
Amahte khiah Kilead le Lebanon ramah
A umhmun tuh um lo tian in tlun tuh ing.
11 Amahte in tipui khiah harsa ngai in tan tuh i.
Tipui tihual khiah amahte in seu tuh i.
Nile Runpui khai ro tuh lio i.
Ciafangin Assiria te hngalhnak khai tlok ruai tuh i.
Izip kumpibawi ukhnak khai pai tuh i.
12 Ciamanin amahte khiah BAWIPA songah thahat ruai tuh ing.
BAWIPA hming in amahte khiah zuksuk le kaiso lam ah feh tuh i.”ti in BAWIPA in rel i.