9Kaimah khiah apawstal i lo ing? Kaimah khiah aisu in khai i uk lo ai a luat minung i lo ing? Kin Bawipa Zisu Khrih khai i mit in hmu i lo ing? Ningte khiah Bawipa songah i naper manin thusangtute i lo i sim? 2Mi dangte hnenah apawstal i hlah ing lai ciarinin kaimah khiah ning apawstal ing. Ziangmanti fangin ningte khiah Bawipa songah i apawstal tacik khethnak sil i si. 3I thuzongtute hnenah i sawnhnak khiah he bang i: 4Kinte in ei tuh le ding tuhhnak power nai lo i ing? 5A dang apawstalte le Bawipa unaute le Siphas bangin thusangtu farnu khiah nu thaihnak tuh power nai lo i ing? 6Barnabas le kaimah lekin naper lo in um thill lo i ing? 7Aisu in raaltawng feh fangin amah veve pumcawm kongin feh i? Aisu in capit kung bir ai a thai ei lo in um i? Cen aisu in kawlpawte khiah rongpaih hnelhno ai a hnawiti ding lo in um i? 8Hete khiah minung dan in rel ing? maw upadi dan thukham in khai rel ve i lo im? 9Ziangmanti fangin Moses upadi dan thukham songah, “Nimden rialtu kawlpawcang khiah a ka pen sah mah ih.” ti in ngan zo i. Cia khiah Pathian in kawlpawcangte ca ruat harsa im? 10Maw kin ca ai relhnak i pa? A ngaingai in he khiah kin ca ai nganhnak i. Ziangmanti fangin hambongtu in ummhnak thawn hambong tuhai a ciltute in cia pa ai ummhnak rong khiah ngah tuh ve in cil i. 11Ning hnenah rauhla thilte cing lengkhaw ning hnenin laivum thilte khawm tuh khiah a rauhze i awm? 12Midangte in ning vumah he power nai lekhaw kin in nai kin mawi sawn lo im? Ikhalselai he power hmang lo i ing. Ikhalselai Khrih kawspal thupha zaai thaihnak tuhin zai hmuahhmuah tuar bengbo i ing. 13Temple songai Pathian napertute in temple songai rong ei i. Cen awlta cabuai hmaiah a catlo napertute in awlta cabuai vumai amahte vo khiah co ve i ti ling lo i sim? 14Ciabangin Bawipa in khai kawspal thupha tazahawtute in kawspal thupha thawn nung tuh i ti in thu pe zo i. 15Ilekhaw hete khiah pakhat bang khai hmang lo ing. I vumah bawn tu seh ti ai nganhnak khai i lo i. Ziangmanti fangin i tluangkhawnghnak khiah mite in a lovang cang ruai tah in i thi lio pha sawn i. 16Ziangmanti fangin kawspal thupha khiah tazahaw naper manin tluangkhawnghnak tuh nai lo ing. Ziangmanti fangin kawspal thupha tazahaw tuh khiah i vumah i hlak bel i. Ziangmanti fangin kawspal thupha tazahaw lo in um lengkhaw kaimah khiah rim i su i. 17Ziangmanti fangin kawspal thupha khiah a hiam ngai in tazahaw lengkhaw lehsawng ngah tuh ing. Ikhalselai i hiam lo kong in tazahaw lengkhaw kawspal thupha kilkhawltu tuhai tavuan i pe loi i. 18Ciailekhaw i lehsawng khiah zai i? Aw kawspal thupha taza i haw fangin a man um lo in haw tuh le ciafangin kawspal thupha songai i ngahhnak i vo khiah hmang kul tuh lo ing.
19Ziangmanti fangin mi veksen hnenah aisu khai batba lo in i luat napuikhaw mi tamngai khiah Zisu sang ruai ben thillhnak tuhin kaimah veve khiah mi veksente hnenum cang ing. 20Judah mite sang ruai thillhnak tuhin Judah mite hnenah Judah mite bang in nung ing. Cen thukham songai umte sang ruai thillhnak tuhin thukham songah um ing. 21Cen thukham pua ai umtute thu sang ruai thillhnak tuhin thukham pua ai umte hnenah thukham pua minungte bangin um ing. (Ikhalselai Pathian hmai ah tu thukham pua ah um lo ai Khrih hmai ah thukham songah um ing.) 22Thanaute khiah thu sang ruai thillhnak tuhin thanaute hnenah thanau in um ing. Mi hrekkhat teng i o thaihnak tuhin mi veksen hnenah zai hmuahhmuah mite bangin um ing. 23Ningte kawmin kawspal hmuifu khiah ning co thillhnak tuhin he khiah kawspal thupha ca in bawn ing.
24 Cen dawphnak puai ah dawptu hmuah lakah pakhat lekin lehsawng ngah ling lo i sim? Ciamanin lehsawng ngah thai in dawp tuu-ih. 25Cen a thiamber cang tuhin a zuamte in zai hmuahhmuah khiah sup kongin zuam i. Ciate in a hmon thai kumpibawi lukhuk ngah tuhin zuam i. Kin in a hmon thai lo lukhuk ca in zuam i sing. 26Ciamanin tuumhnak thawnin dawp ing. Cen boksing i thu fangin khai hlivua sawn vit bang in thu lo ing. 27Ikhalselai i pumpui khiah kaimah in uk ing. Cialofangin midangte taza i haw ben fangin kaimah sawn tu a tlak lo i cang mawh ngai.