1Zisu Khrih apawstal hnuahlun le a hnenum Simon Peter hnenin kin Pathian le Nun Otu Zisu Khrih dikcanghnak songin kinmah camra ai a mankhung sanghnak ngahtute hnenah, 2Ngaihharhnak le thinnuamhnak remhnak khiah Pathian le kin Bawipa Zisu khiah linghnak kawmin ning hnenah lo zaai tu seh. 3Amah thangphathnak le a cungnung hnenah kin ko tu Pa khiah kin ling manin amah Pathian huthawm in nunhnak le cianghlimhnak tuhai a kulhnak thil hmuahhmuah khiah kin pe zo i hang. 4Ciatih in a mankhung le a thukham lian ngaingai khiah kin pe zo i. Ciamanin Pathian nuncan ziaza khiah co tuh i si. Ziangmanti fangin a pha lo a luar ai daihhnak manin hlenghnak sualhnak thawn ning luat ruai zo i. 5Cia ca hrimhrim in ning sanghnak vumah nuncan pha khiah belh in, nuncan pha vumah fimhnak belh tuu-ih. 6Cen fimhnak vumah mah veve ukhnak, mah Veve ukhnak vumah thinsau kongai tuarhnak, thinsau kongai tuarhnak vumah cianghlimhnak, 7Cianghlimhnak vumah unau itdunhnak, unau itdunhnak vumah mi veksen itdunhnak khiah belh tuu-ih. 8Ziangmanti fangin ningte in hete khiah a tam ngai in nai leisikhaw ningte in kin Bawipa Zisu Khrih khiah a ngaingai in ling tuhai thai nai lo le nihlawh nai lo in um tuh lo i si. 9Ziangmanti fangin hete nai lo tu khiah mitcaw le ruathnak com naitu te i. Ciate in hlanlai ai a sualhnak songin ciang ruaihnak khai hai lio i. 10Ciamanin ulenaute ning kohnak le ning rilhnak khiah kho ruai tuhin a tam amam in zuam tuu-ih. Ziangmanti fangin hete khiah bawn leisikhaw ning bah tuh lo i. 11Ciafangin ningte khiah kin Bawipa le Nun Otu Zisu Khrih kumzangza ukhnak songah luthnak tuh in a kaungai in dawng ning hon sah tuh i.
12Ciamanin he thute khiah ningte in lingzo i si. Ciamanin ning nai ciahnak thuhman songah khai a kho in um i si. Ikhalselai he thute khiah ning hih ruai tuh tio ing. 13He taksa pumpui songah i nung song hmuah in hih ning ruai in ning phawr tuh khiah a hman i ti in ruat ing, 14Ziangmanti fangin kin Bawipa Zisu Khrih in i hmuh zo bangin i pumpui lonhnak tuh cuu khiah nong zo i hang ti ling zo ing. 15I thi hnua fangin ningte in he thute khiah zaikom in khai ning hih thai tuhin zuam tuh ing.
16Ziangmanti fangin kin Bawipa Zisu Khrih power le a hlengleh tuhhnak thu khiah ning rel fangin ngiaan thawn ai puahcophnak thuanthu ning rel lo i ing. Ikhalselai a huthawm khiah kin mit rori ai hmu i ing. 17Ziangmanti fangin Zisu in upathnak le thangphathnak khiah Pa Pathian hnenin ngah fangin Thangphathnak Kumpibawi pa in amah hnenah, “He khiah i ithnak i Fapa i. Amah lakah lung i khim i ” ti in aw khiah hleng. i. 18Vancung ai hlenghnak cia aw khiah za i ing. Ziangmanti fangin kinte khiah amah thawn khia cianghlim mual vumah um tlang i ing.
19Ciamanin profette thuthanhnak khiah khoruai amam i ing. Ning thin songah vartin’ arsi le khuavar suak hlan lo he thu khiah khuathim lakai varhnak mai-inn banginjuat tuh khiah ning ca ah pha i. 20Ikhalselai a hmasaber ah Lai Cianghlim songai profette relhnak thu khiah mah ruathnak bang menma ai let dan lo i ti khiah ling tuu-ih. 21Ziangmanti fangin profette relhnak thu khiah miming nuamhnak ai hleng thu i lo i. Ikhalselai amahte khiah Ciang Rauhla in ruai bangin Pathian hnenin hlenghnak thu rel i.