2 Kawrin 1

<<  2 KAWRINTHIAN 1 >>

1Pathian lungkhimhnak bangin Zisu Khrih apawstal Paul le kin unau Timothy in Kawrint khua ai pawlpuite le Akhaia ai umtu Pathian thusangtute a veksen hnenah 2Ngaihharhnak le kin Pa Pathian le Bawi Zisu Khrih hnenai thinnuamhnak khiah ning hnenah hleng tu seh. 3Kin Bawi Zisu Khrih Pa le ninghiohnak hmuah naitu Pa le thinnuamhnak hmuahhmuah naitu Pathian khiah hmuifu tu seh. 4Pathian in thin kin nuam ruaihnak thawn harsahnak tuartute khiah kin in thinnuam ruai thill thai in rimsuhnak hmuahhmuah songah kin Pathian in thin kin nuam ruai zo i. 5Ziangmanti fangin Khrih tuarhnak khiah kin songah a dim in um bangin thinnuamhnak khai Khrih songin a dimin hleng ve i. 6Thin kin rimsu lekhaw ning thinnuamhnak le ning ohnak ca ai tuar i ing. Cen thin kin nuam lekhaw ning thinnuamhnak le ning ohnak ca i ai ciafangin ningte in kin tuarhnak bang rimsuhnak khiah thinsau ngai in tuar benhnak suak tuh i. 7Cen ning ca ai kin ummhnak khiah a kho ngai i. Ziangmanti fangin kin tuarhnak khiah kin tuar bawm bangin thinnuamhnak khai kin co bawm tuh i si.

8Ulenaute, Asia ram ai kin hnenah hlenghnak rimsuhnak khiah ningte in ling lo in um tuh kin daih lo i. A rel zoloin rim kinsu manin nung rin zuam tum lo i ing. 9Ikhalselai thi tuhin kin dah zo i ti in ruat i ing. Inapui ai cia khiah kinte in kinmah veve rinsan tuh lo ai a thite tho ruai leh tu Pathian sawn rinsan tuhai canghnak i. 10Cia Pa Pathian in thihhnak lianpui songin kin luat ruai zo ai kin luat ruai tuh tio i ti in amah khiah rinsan i ing. 11Ningte in khai kin ca ai ning sawngenhnak thawn kin bawm tlang manin mi tamngai sawngenhnak maninin kin vumah pehnak lehsawng manin kin ca in mi tamngai in Pathian an tuh i.

12Ziangmanti fangin kin anghnak khiah zai i ti fangin Pathian hnenai cianghlimhnak le thu hman thawn laivumah le ningte hnenah nung i ing. Cia khiah minung fimhnak thawn nung lo ai Pathian ngaihharhnak thawn nung i ing. Cia khiah kin ruathnak in khai tettikhan i. 13Ziangmanti fangin ning siar thilllohnak le ning ling thilllohnak zai thu khai ning ngat lo i ing. A bo tianin ning ling thillhnak tuh khiah i ummhnak i. 14Tunin a tlawmtlawm ngawn ling i si. Ikhalselai kin Bawi Zisu niakhua ah ningte in kinmah manin ning hngal ai kin khai ningmah manin kin hngal ve i ti khiah a ciangniu in ling tuh i si.

15Cia khiah umm rauh manin a velnihhnak in ning hnempui thai in ning tlawng tuhin ruat rih ing. 16Masidonia i tlawng fangin ning tlawng tuh le Masidonia in i letleh fangin ning hnenah hleng leh tuhai ciaben fangin ningte in Judea ramah i hla tuhin tum ing. 17Ciatih ai i pai fangin a thupui lo bangin pai ing? Cen i tumhnak thilte khiah laivum danin tum ing? Ciamanin, “I, i, I lo i, i lo i.” ti in a panihin velkhat in pong aw ing? 18Ikhalselai Pathian khiah rinsantlak bangin ning hnenai kin relhnak thu khai, “I” le “I lo i.” i lo i. 19Ziangmanti fangin kaimah le Silvanus le Timothy ai ning lakah taza kin hawhnak Pathian Fapa Zisu Khrih khiah, “I” le “I lo i.” i lo i. Ikhalselai amah songah zaikom in khai, “I” ngio i. 20Ziangmanti fangin amah songah Pathian khamhnak thu hmuahhmuah khiah “I” liang i ai kinte in Pathian thangphathnak tuhin amah songah “Amen” i liang i. 21Ningte thawn Khrih songah kin kho ruaitu le kin riltu khiah Pathian i. 22Cia Pathian in tacik kin khet zo ai kin co tuh lai ro ca in Ciang Rauhla khiah kin pe cia i. 23Ciazolo ah Pathian khiah i tetti i: Ning zah tuhin Khawrin khua ah ning tlawng lailo ing. 24Cia khiah ning sanghnak vumah ning uk manin i lo i. Ikhalselai ning anghnak tuhai ning bawmtute i ing. Ziangmanti fangin sanghnak thawnin a kho ngai in ding i si.

<<  2 KAWRINTHIAN 1 >>

Leave a Reply

Your email address will not be published. Required fields are marked *