<< 2 KAWRINTHIAN 6 >>
6Kinte khiah amah thawn naper khattute i ing. Ciamanin ning ngahhnak Pathian ngaihharhnak khiah a lovang cang tuh lo in ning so ing. 2Ziangmanti fangin amah in,
“A cuu khim teng in ning thu ning ngai sah ing.
Ohnak nia ah ning bawm zo ing.”ti in rel i.
Tunnia khiah a cuu i hang. Tunnia khiah ohnak nia i. 3Aisu in khai kin naperhnak khiah mawhhluk lohnak tuhin aisu khai bah tuh lo in per i ing. 4Ikhalselai zaizongza ah kinmah veve khiah Pathian hnenum bangin nung i ing. Tuarhnak tamngai lakah, rimhnak le harsahnak le thincawlhnak le 5vithnak le thawngtlahnak le hnaihnokhnak le zan tamngai mitmu lo in um le rikamhnak le 6Cianghnak le linghnak le thinsau hnak le nunnemhnak le Ciang Rauhla songah le ithnak peupeu thawn le 7Pon hman ponghnak le Pathian power songah le kiahhan kut le kekeh kut ah dikcanghnak ralthilthuam sin kongin le 8Thangphathnak le nautathnak le mi siathnak le mi anhnak le mizawltute ti ai ruathnak napui ai mihmante, 9Mite ai ling awng lo napui aisu hmuahhmuah in khai ling, a thi bang i napui ai nung hlen, cawhkuan ngah napui ai rekhnak ngah lai lo, 10Lungsia napui ai ang tio, farah napui ai mi tamngai lian ruai, zaikhai nai napui lo ai zaizongza co liang tu i ing.
11Aw Kawrint mite a luat ngai in thu ning rel ing. Kin thinlung dawngkham khiah a kaungai in ning hon i ing. 12Kin ai ning ithnak khiah pamhap kongin ning it i lo ing. Ningmah sawnin pamhap kongin kin it i si. 13I fate bangin ning rel ing: Kin itdunhnak thleng nga sing. Ning thinlung dawngkham khiah a kaungai in hong tu ve ih.
Thusanglote thawn rualrem tuh lo
14 Thusanglote thawn thil phurkhat mah ih. Ziangmanti fangin dikcanghnak le sualhnak khiah a bangdunhnak zai um i? Ihlahle a kontih in khuavaar le khuathim khiah pawldun thill i? 15Cen Khrih le Belial khiah a kontihin thinkhat hnak um i? Cen thusangte le thusanglote khiah zai bangdunhnak um i? 16Cen Pathian temple le milimte khiah zai lungkhimdunhnak um i? Ziangmanti fangin kinte khiah a nung Pathian temple i sing. Cia khiah Pathian in,
“Amahte thawn um tuhai amahte lakah vak tuh ing.
Amahte Pathian cang tuh ai amahte khiah
i minung cang tuh i.
17 Ciamanin amahte songin suak tu i lai a
tumce in um tuu-ih, ti in Bawipa in rel i.
A cianglo khiah khing mah i lai ciafangin
ning saang tuh ing.
18 Kaimah khiah ning Pa i cang tuh ai ningte
khiah i fapa le i fenute ning cang tuh i, ti in
Bawipa in rel i.”ti ai relhnak bangin i.
<< 2 KAWRINTHIAN 6 >>