Zisu khiah a Pha Tukhal Pa i
“Thungai, thungai in ning rel ing, Tu inn songah dawngkham songin lut lo ai a dang lamin kaai tu pa khiah ruko le damiah i. 2Ikhalselai dawngkham song ai a lut tu pa khiah tukhal tu pa i. 3Amah khiah dawngkham kiltu pa in dawnghon ai, tute in a aw ngai i. Amah in a tute khiah a hming in ko ai sumpua ah fehpui i. 4A tute khiah sumpua ah suah ben fangin tute hmai in feh ai a tute in hlun i. Ziangmanti fangin a tute in a aw ling i. 5Cia tute in mi dang khiah hlun tuh lo ai cia pa hnenin tlan tuh berh i. Ziangmanti fangin cia tute in mi dang aw ling sah lo i.” ti in ti i. 6He santehhnak khiah Zisu in amahte hnenah rel ai ikhalselai amahte in relhnak ling sah lo i.
7Ciafangin Zisu in amahte hnenah, “Thungai, thungai in ning rel ing, Kaimah khiah tu dawngkham ing. 8I hlan ai a hleng tu hmuahhmuah khiah a veksenin ruko le damiah i. Tute in amahte thu ngai lo i. 9Kaimah khiah dawngkham ing. I songin a lut tute in ohnak ngah tuh ai cia pa in lut tuh ai suak tuh le hampa rong tawk tuh i. 10Ikhalselai ruko in ru tuh le rek tuh le hnawmcan tuh lekin hleng i. Kai tu amahte in nunhnak ngah hnak tuhin le amahte in nunhnak khiah a khim liang in nai thillhnak tuh in hleng ing. 11Kaimah khiah a pha tukhal pa ing.. A pha tukhal pa in a nunhnak khiah a tu te ca in liam i. 12Ikhalselai tukhal pa i lo ai amah tute i lo ai mi dang tu khiah hlawhtham ai khaltu hnenum in mahleng kawi hmu fangin tute zam ai tlan teu i. Ciafangin mahleng in tute dawp ai tute khiah nuamhmun cang ah piak ruai i. 13Cia hlawhthamhnak hnenum in tlan teu i. Ziangmanti fangin amah khiah hlawhtham hnenum i manin tute khiah zainam lo i. 14Kaimah khiah a pha tukhal pa ing. I tute khiah ling ai i tute in khai i ling i. 15I Pa in i ling bang in kaimah in khai i Pa khiah ling ing. Tute ca in i nunhnak liam ing. 16He tu run lo a dang tu run khai nai i lai ing. Cia tu run khiah kawih ngangkhaw amahte in i aw za tuh ai ciafang in tu run khat le tukhal pa pakhat um tuh i. 17Kaimah in i nunhnak lang leh tuhin i nunhnak liam manin i Pa in i it i. 18I nunhnak khiah aisu in khai i hnenin i lang sah lo ai kaimah thu in liam ing. I nunhnak liamhnak tuh le lang leh tuhhnak power nai ing. He thukham khiah i Pa hnenin ngah ing.” ti in rel i. 19He thute manin Judah mite lakah eldunhnak um leh thio i. 20Mi tamngai in, “Amah in khuavang nai i. Amah khiah a am i. Ziamanin a thu ngai i si?” ti in ti ai 21A hrekkhatte in, “He thute heh khuavang naitu te ai ponghnak bang i lo i. Khuavang in mitcawte mit hong sah thill nim?” ti in eldun tlaang i.
22Ciafangin temple cianghlim ruaihnak puai khiah Jerusalem ah um ai cia cuu khiah khuasik cuu i. 23Zisu khai temple songai Solomon sankil songah vak i. 24Ciafangin Judah mite khai a hiang cingkim in hleng ai, “Zaicam tian a hliahlo in kin dah tuh i si? Khrih i lesikhaw a ciang ngai in kin rel tu lawlaw.” ti in ti i. 25Zisu in amahte hnenah, “Ning rel napui ai i sang lo i si. I Pa hming ai i perhnak naperte in tetti i khan i. 26Ikhalselai i sang lo i si. Ziangmanti fangin ning rel bang in ningte khiah i tute i lo i si. 27I tute in i aw i ngai ai kaimah in amahte ling ai amahte in i hlun i. 28Amahte hnenah kumzangza nunhnak pe ing. Ciamanin amahte khiah zaikom in khai thi tuh lo i. Cen aisu in khai i kut songin phok ben tuh lo i. 29Amahte i pe tu i Pa khiah a veksen hnak in lian sawn i. Aisu in khai i pa kut songin amahte khiah phok ben tuh lo i. 30Kaimah le i Pa khiah pakhat i ing.” ti in ti i. 31Ciafangin Judah mite in amah huat tuhin lungto khul i. 32Zisu in amahte khiah, “I Pa hnenin na pha tamngai ning hmuh zo ing. Kon mi naper ber manin i huat tum i si?” ti in sawn i. 33Judah mite in, “Naper pha manin na huat tum i lo i ing. Ikhalselai nangmah khiah minung i napui ai nangmah veve Pathian cang ruai ai Pathian zauhsum manin na huat tum i ing.”ti in sawn i. 34Zisu in amahte khiah, “Ning thukham upadi dan songah, ‘Ningte khiah pathian i si.’ ti in ning ti ing.” ti in nganzo i lo im? 35Amahte songin Pathian thu hlenghnak mite khiah amah in pathian ti in ko lekhaw, cen Lai Cianghlim khiah hnawm thill lo i khaw, 36Ciailekhaw Pa Pathian ai cianghlim ai dah ai laivum ah hlathnak pa in, ‘Kaimah khiah Pathian Fapa ing.’ ti manin ‘Pathian zauhsuam i si.’ ti i sim? 37I Pa na khiah per hlahleingkhaw i sang mah ih. 38Ikhalselai cia na per leingkhaw, kaimah i sang lo rinin, i Pa khiah i songah um ai kaimah khiah i Pa songah um ing ti khiah ning ling thill le ning sang thill thai hnak tuhin, i perhnak nate khiah sang tuu-ih.” ti in sawn i. 39Ciamanin amahte in amah khiah pom tum leh thio napui ai amahte kut songin suak ngah teu i. 40Ani khai John tinim pan hmun Jordan ralkhat lamah feh teu ai ciata ah um i.. 41Mi tamngai khai a hnenah kawi ai, “John in ngaihsunurkul bawn lo i. Ikhalselai John ai he pa thu relhnak hmuah a veksen in hman liang i.” ti in ti i. 42Ciafangin mi a tamngai in amah sang i.