Bethesada tikhur ah mi cakruai i
He hnua ah Judah te puai um ai Zisu khai Jerusalem ah feh i. 2Cia Jerusalem khua songah Tu Kawldawng hiang ah Hebrew te pon in Bethesda tihnak tikhur um ai sankil panga um i. 3He sankil hnia ah mi-ur, mitcaw, vakben lo, kut le ke ro ai urtu mi tamngai khiah ti phul bawh in um bial i. 4Ziangmanti fangin, vancung mi in tikhur songah tolh de ai ti phau de i. Cia tiphau lak fangin a hmasaber ti rah tu pha khiah a urhnak in lawm ruai de i. 5Ciata ah kum sawmthum le kum riat urhnak naitu mi pakhat um i. 6Zisu in amah khiah ciata ah taal hmu ai ciatih bangin ciata ah a raipui um awng zo ling manin, amah hnenah, “Cak na nuam awm?” ti in ti i. 7Mi-ur pa in amah hnenah, “Bawipa, ti phau fangin ti songah i dah tu tuh aisu khai nai lo ing. Ciamanin i kawi lak fangin mi dang in i hlanah ti rah hmasa lio de i.” ti in sawn i. 8Zisu in amah hnenah, “Tho tulai, na khuahluan lang in feh tu.” ti in ti i. 9Ciasawng fangin cia pa khai cak vut ai a khuahluan lang le feh i. Cia nia khiah sabbath nia lo i. 10Ciamanin Judah mite in a cak lio tu pa hnenah, “Sabbath nia i. Na khuahluan phur dan lo i.” ti in ti i. 11Ciafangin cia pa in amahte khiah, “I cak ruai tu pa in, ‘Na khuahluan lang in feh tu.’i ti i.” ti in sawn i. 12Ciafangin amahte in, “ ‘Na khuahluan lang in feh tu.’ na ti tu pa khiah aisu i pa?” ti in zawt i. 13Cia a cak lio mi pa in aisu i ti ling lo i. Ziangmanti fangin ciata ah mi tam ngai um ai Zisu in aisu lin lo in a dapthen in vak teu i. 14A lehhnua lam fangin Zisu in cia pa khiah temple songah tawk ai amah hnenah, “Sik tu. Na cak ruai zo i. Sual ma hang. Ziangmanti fangin na vumah he hnak in a pha lo amam hleng mawh ngai.” ti in rel i. 15Cia pa khai feh ai Judah mite hnenah, a cakruai tu pa khiah Zisu i ti in rel i. 16Ciamanin Judah mite in Zisu khiah hnaihnok pan ai rek tuhin si i. Ziangmanti fangin amah in hete khiah sabbath nia ah bawn i. 17Ikhalselai Zisu in amahte hnenah, “I Pa in tuntian naper bang in kai khai naper ve ing.” ti in sawn i. 18Zisu in sabbath nia hnawmcan lek ai zolo in Pathian khiah a Pa ti in ko ai amah veve khiah Pathian thawn camra in dah manin Judah mite in amah khiah rek nuam amam i. 19Ciafangin Zisu in amahte hnenah, “Thungai, thungai in ning rel ing. A Fapa in amah thu in zaikhai bawn thill lo i. A Pa bawnhnak a hmu bang ian in bawn i. Ziangmanti fangin a Pa ai bawn bangin a Fa in khai bawn ve i. 20Ziangmanti fangin a Pa in a Fapa it manin a bawnhnak hmuahhmuah hmuh liang i. Ningte in ngaihsun ning ur thaihnak tuhin a Pa in a Fapa khiah he hnak in lian sawn naperte hmuh tuh i. 21Ziangmanti fangin a Pa in a thi te tho ruai ai nung ruai bang in a Fa in khai a nuamhnakte nung ruai tuh i. 22Ziangmanti fangin a Pa in aisu thu khai khan sah lo i. Ikhalselai thukhanhnak a veksen khiah a Fapa hnenah ap liang i. 23Ciaman in mi hmuah in a Pa zul bangin mi hmuah in a Fa khai zul tuh ve i. 24Thu ngai, thu ngai in ning rel ing, I thu ngai ai i hlat tu pa a sang tu khiah kumzangza nunhnak ngah tuh ai hnawmcanhnak tuar tuh lo ai thihhnak in nunhnak ah hleng tuh i. 25Thungai, thungai in ning rel ing, A thite in Pathian Fapa aw zahnak cuu khim ai cia cuu khiah tun i hang. A zatute khiah nung tuh i. 26Ziangmanti fangin a Pa in amah songah nunhnak nai bangin, a Fapa in khai amah songah nunhnak nai tuhin pe zo i. 27Cen amah khiah mi Fapa i manin, thukhanhnak tuh in huthawm khai pe zo i. 28He khiah ngaihsunur mah ih. Ziangmanti fangin hlan songai mithi te in a aw zahnak cuu hleng i hang. 29Amahte khiah tho tuh ai a pha bawntute khiah nunhnak songah tholeh tuh ai a pha lo bawn tute khiah cawhkuanhnak ah tholeh tuh i. 30Kaimah thu in zaikhai bawn thill lo ing. I za bangin thukhan ing. I thukhanhnak khiah dikcang i. Ziangman ti fangin i nuamhnak khiah sii lo ai i hlat tu i Pa nuamhnak si ing. 31Kaimah veve khiah tettikhan le ingkhaw, i tettikhanhnak khiah hman lo i. 32I tettikhan tu pa a dang pakhat um i. Cia pa ai kai ca ai a tettikhanhnak khiah a hman i ti khiah ling ing. 33Ningte in John hnenah hlat i si. Cia John in thuhman lakah tettikhan zo i. 34Ikhalselai minung hnenin tettikhanhnak khiah saang lo ing. Ikhalselai ning o thillhnak tuhin he thute rel ing. 35John khiah a ko le a tleu mei-inn i. Ningte in a varhnak songah campuikhat lungawi in um tuh in ning hiam i. 36Ikhalselai John hnak in lian sawn tettikhan tu nai ing. Ziangmanti fangin a ben tian in per tuhin i Pa in i pehnak naperte i perhnakte in i Pa in i hlat i ti khiah tettikhan i. 37Cen i hlat tu i Pa amah rori in khai tettikhan i. Ningte in a aw khiah velkhat bang khai za awng lo i si; cen a hmuihmel khai hmu awng lo i si. 38Cen a thu khai ning songah um lo i. Ziangmanti fangin ningte in a hlathnak pa sang lo i si. 39Lai Cianghlim khiah sii tuu- ih. Ziangmanti fangin Lai Cianghlim songin nunhnak ngah tuhin ruat i si. Cia Lai Cianghlimte in kaimah khiah tettikhan i. 40Cen nunhnak ning co thaihnak tuhin i hnenah kawi ning nuam lo i. 41Minungte hnenin zulhnak saang lo ing. 42Ning ling ing. Pathian ithnak khiah ning songah um lo i. 43I Pa hming in hleng ai i saang lo i si. Mi pakhat in amah hming in hleng selai saang tuh i si. 44Pathian hnen lek ai hlenghnak upathnak si lo ai mi dang hmun ai upathnak saang tu khiah a kontih in sang thill i si? 45I Pa hnenah ning zuar tuh i vuah mah ih. Ning sanghnak Moses cia pa in ning zuar tuh i. 46Ziangmanti fangin Moses sang ta i silai, i sang tuh napui i si. Ziangmanti fangin Moses in i thu ngan zo i. Ikhalselai Moses nganhnak sang hlahleisikhaw a kontih in i thu sang tuh i si?” ti in ti i.