John in Zisu thuzawt i (Luke 7:18-35)
1Zisu in a hnuahlun hlainihte khiah thu pe ben fangin, khua caang ah thucuk tuhin le tazahaw tuhin ciata in thawn i. 2Khrih naperhnak khiah thawng songin John in za fangin, a hnuahlun panih khiah hlat ai, 3“Nangmah khiah a hleng tuh pa i sim maw a dang sii rih nga ing?” ti in zawt i. 4Amahte khiah Zisu in, “John hnen ah feh tu i lai, ning hmu hnak le ning za hnak thute khiah rel tuu-ih. 5Mitcaw te in khuahmu ai, keze te in lam vak ben i. Mipharte khiah ciang ruai ai, nangongte in khuaza i. Mithi te khiah tho ruai ai mi farahte khiah kawspal thupha tazahaw i. 6I lakah a raw lo tute khiah hmuifu i.” ti in sawn i. 7John hnuahlunte khiah feh fangin, Zisu in John thu khiah mi tampui lakah hetih rel i: “Hampalak ah zai sik tuhin feh i si? Hlivua ai seuhnak hampa luang sik tuh in feh i sim? 8Ikhalselai zai sik tuhin feh i si? Pon nemniute siltu pa sik tuhin feh i sim? Pon nemniu siltute khiah kumpibawi inn songah um i. 9Ikhalselai zai sik tuhin feh i si? Prawfet sik tuhin feh i sim? Ning rel ing, prawfet hnak ai lian sawn sik tuhin feh i si. 10Thungai in ning rel ing, He pa khiah, na hmaiah na lampui na rem sah tuhin i nalaang na hlat sah ing, ti ai nganhnak pa i. 11Thungai in ning rel ing, Nupang songai tehnak miangmo lakah John hnak in lian sawn aisu khai te lai lo i. Ikhalselai, vancung ukhnak songai a cik ber niu khiah Tinimtu John hnak in lian sawn i. 12Cen Tinimtu John ai panin tuntian vancung ukhnak khiah mipuarte in simawti in nem hnelhno i. 13Ziangmanti fangin upadi dan thukham songah le prawfet hmuahhmuah in John hleng hlan hmuah relcia zo i. 14Sang ning nuam lekhaw, John khiah a hleng tuh i lai ti ai relhnak Elijah i. 15Khuaza tuh ai bil naite in za tu seh. 16Ikhalselai he san mite khiah aisu thawn santeh tuh ing? He san mite khiah dawr songah to ai a rualpui ko tu naupangte bang i. 17Cia naupangte in a rualpuite hnenah, ‘Hlung ning tum napui ai lam lo i si. Kah la ning siar napui ai kap lo i si.’ti in ti i. 18Ziangmanti fangin John in rongei lo le zu ding lo in hleng ai, amahte in ‘amah in khuavang nai i.’ ti in ti i. 19Mi Fapa in ei le ding in hleng ai, ‘rongham, zutama, siahkhuai dongtute le misualte rualpui,’ ti in ko i. Ikhalselai fimhnak khiah a naperhnak in luat ruai tuh i.” ti in rel i.
A Thungai Nuam lote (Luke 10:13-15)
20A 1ian berber a naper hmun khuate ai minungte in sir lo manin Zisu in amahte khiah hau pan i. 21Khorazin, na vumah siathnak hleng tu selaw! Bethsaida, na vumah siathnak hleng tu selaw! Ziangmanti fangin na hmun ai naper lian puipui khiah Tyre le Sidon ah per taselai, amahte khiah vutkuang le vaidip sil in amahte sual khiah sir awng tuh zo napui i. 22Ikhalselai ning rel ing, Thukhan nia ah Tyre le Sidon khiah ninghnak in tuar khop tuh sawn i. 23Cen nang Kapernaum khai vancung tianin na thang napui khaw, hell songah na lon tuh i. Ziangmanti fangin na hmun ai naper lian puipui khiah Sawdom ah bawn ta selai, tunnia tian in Sawdom khiah taang tuh napui i lai. 24Ikhalselai na rel ing, Thukhan nia ah Sawdom ram khiah nang hnak in tuar khop tuh sawn i.” ti in ti i.
Zisu hmunah thincawlte kawi tuu-ih
25Ciafangin Zisu in sawn ai, “Aw i Pa, van le lai Bawipa, na an ing. Ziangmanti fangin hete khiah mifim le lailingte hmunin thup ai naupangte hnenah larruai i si. 26I Pa, ciatih i tu selai. Ziangman ti fangin , cia khiah na daihhnak i. 27I Pa in zai hmuahhmuah khiah i ap zo i. A Fapa khiah a Pa lek in ling i. Ciabang in a Pa khai a Fa le a Fa ai lingruai hnak te ian in ling ve i. 28Naper ai thilrit phurtute, ning veksenin i hnen ah kawi tu i lai comhmun ning pe tuh ing. I haak khiah phur tu i lai i thu khiah zir tuu-ih. Ziangmanti fangin kaimah khiah mi nunneem le mi thinniam mi ing. Cen ning rauhla in comhmun ngah tuh i. 30Ziangmanti fangin i haak khiah a baai i ai i thil khiah a zaang i.” ti in ti i.