1Zing khuavar fangin phungki upa le mi upa hmuahhmuah khiah Zisu rekhnak tuh thurel tlaang i. 2Amahte in Zisu khiah ri thawn in pen ben fangin, fehpui ai uktu Pontius Pilate hnenah kawih i.
Judas thihnak thu (Hnuahlun 1:18-19)
3Zisu zuartu Judas in Zisu khiah thi tuhin thusat i ti ling fangin ani khai sir leh ai phungki upate le mi upate hnenah a tangka sawmthum khiah kawih ai, 4“Mawh nai lo thi khiah zuar manin i sual i.” ti in ti i. Ciafangin amahte in, “Cia heh kin zai hnak i? Nangmah hlanlam lo bawn tu.” ti in ti i. 5Ciafangin Judas in cia tangka khiah temple songah sep ai ani khai feh le ri-awk i. 6Phungki upate in cia tangka khiah lang le, “Thi man tangka i manin Pathian tangka khawi hmunah dah dan lo i.”ti in ti i. 7Ciafangin anite khai thusawm tlaang ai, cia tangka thawnin belbawntu pa lo khiah mikhualte vui hmun tuh in lai i. 8Ciamanin cia lo khiah tunnia tian in, Thi ai laihnak lo, ti in ko i. 9Ciafang in prawfet Jeremiah ai relhnak, “Israel mite in tangka sawmthum i ti ai a man lungkhim bangin cia tangka sawm thum khiah amahte in lang ai, 10Bawipa ai i ruai bangin belbawntu pa lo ca in pe ing.” ti ai relhnak khimhnak i.
Zisu khiah Pilate hnenah kawih i (Mark 15:2-5; Luke 23:3-5; John 18:33-38)
11Zisu khai uktu Pilate hmai ah ding ai Pilate in, “Nangmah khiah Judahte kumpibawi i sim?” ti in zawt i. Zisu in, “Na relhnak bang in i.” ti in sawn i. 12Cen phungki upate le mi upate in mawhhluk fangin kam khat khai sawn lo i. 13Ciafangin Pilate in, “Amahte in mawh tamngai na hlukhnak khiah za lo i sim?” ti in ti i. 14Ciafang in Zisu in kam khat bang khai sawn lo manin Pilate khai ngaihsun ur rauh i.
Zisu khiah thi tuar tuhin thutawng i (Mark 15:6-15; Luke 23:13-25; John 18:39-19:16)
15Cia puai ah uktu bawi Pilate in mite daihhnak thawngtla pakhat hlat sah de i. 16Ciafangin ciateng ah Barabbas tihnak a hming sia ngai thawngtla pakhat um i. 17Ciamanin amahte khiah hmunkhat in khawm tlaang fangin, Pilate in, “Kon mi sawn ning hlat sah ning daih i? Barabbas maw Khrih ti ai kohnak Zisu.” ti in zawt i 18Ziangmanti fangin amahte in Zisu khiah iksik manin a hnenah kawih i ti khiah Pilate in ling i. 19Pilate khiah thukhan hmun tauhkheng vumah to fangin, a nu in, “Khia mi dikcang pa thawn ziang khai bawn ma law. Ziangmanti fangin amah manin tunnia ah i mang in a tampui tuar zo ing.” ti tin lai kuat i. 20Ikhalselai phungki upate le mi upate in miburpui in Barabbas sawn hlat tuh ai Zisu khiah rek tuhin ngen tuhin thuso i. 21Ciafangin uktu bawipa in, “A panih lakah aisu sawn ning hlat sah tuh ing?” ti in ti i. Amahte in, “Barabbas,” ti in sawn i. 22Pilate in, “Ilekhaw Khrih ti ai kohnak Zisu khiah zai bawn tuh ing?” ti in ti i. Amahte in, “Zisu khiah thinglamteh in rek tu.” ti in sawn i. 23 Uktu bawipa in, “Zaiman in, zai pha lo bawn i?” ti in zawt i. Ikhalselai amahte in, “Amah khiah thinglamteh in rek tu.” ti in au amam i. 24Pilate in zaikhai neh ben lo ai zolo ah miburpui khiah cai murhmo khiah hmu fangin, ti khai lang ai miburpui hmai ah a kut sawm ai, “He sualhnak nai lo pa thi lakah i mawhhnak um lo i. Ningmah hlanlam lo bawn tuu-ih.” ti in ti i. 25Ciafangin mi veksein, “A thi khiah kin vumah le kin fate vumah hleng tu seh.” ti in sawn i. 26Ciafang Pilate in Barabbas khiah amahte hnenah hlat ai Zisu khiah vit ben fangin thinglamteh in rek tuhin pe i.
Raalkapte in Zisu khiah zauhsuam i (Mark 15:16-20; John 19:2-3)
27Uktu bawipa raalkapte in Zisu khiah khaan lianpui songah kawih ai a hnenah raalkap tamngai khawm ruai i. 28A pon khiah hawk sah ai, pon san khiah silh i. 29Hling lukhuk khiah sa ai a lu ah khuk ai phaikung khiah a kiahhan kut ah awh ruai ai, a hmai ah caicin in um ai, “Ang tu, Judahte Kumpibawipa,”ti in zauhsuam i. 30Ciafangin amahte in cil thuih ai phaikung khiah lang sah ai a lu ah vit i. 31Amahte in zauhsuam ben fangin, cia pon san khiah hawk leh thio ai amah pon kel khiah silh leh thio le thinglamteh in rek tuhin feh pui i.
Zisu thinglamteh tarhnak (Mark 15:21-32; Luke 23:26-43; John 19:17-27)
32Anite khai suak fangin, Sairin mi Simon tihnak mi pakhat khiah tawk ai Zisu thinglamteh khiah phur sah tuhin ruai bel i. 33Mithi lu, tihnak Kolkawtha ah hleng fangin, 34Capittizu thur khiah nikkha thawn rawih ai ding tuh in Zisu khiah pe i. Zisu in cang fangin ding nuam lo i. 35Amahte in Zisu khiah thinglamteh in tar ai, a thilthuam khiah zik ai aungbaili suai tlang i. Cia khiah prawfet ai relhnak, ‘Amahte in i thilthuam khiah zik ai i pon khiah aungbali suai tlang i.’ ti ai prawfet ai relhnak khimhnak i. 36Anite khiah to ai Zisu khiah sik i. 37A lu vumah, “HE PA KHIAH JUDAHTE KUMPI BAWIPA I.” ti ai mawhhluk nganhnak khai tar i. 38Ciafangin ruko panih khiah a kiahhan lam le a kekeh lam ah thinglamteh in tar i. 39Ciata ai a khel tute in amahte lu khiah leuh kong in, 40 “Temple khiah bal tuh ai nithum fangin sa ben tu tuh pa, nangmah veve khiah o tu. Pathian Fapa ilesikhaw, thinglamteh vumin tolh tu.” ti in zauhsuam i. 41Ciabangin phungki upate khai upadi dan cuktu sazate le mi upate kawmin, 42“Mi dang tu o ai amah veve tu o ben lo i. Israel Kumpibawi i lekhaw, thinglamteh vumin tolh tu selai ciafangin sang tuh i ing. 43Amah in Pathian khiah rinsan i. Pathian in amah khiah khawm nuam lekhaw Pathian in amah khiah tunin o tu hang seh. Ziangmanti fangin amah in, ‘Kaimah khiah Pathian Fapa ing.’ ti i.”tin zauhsuam ve i. 44Amah thawnai thinglamteh ai tarhnak tuartu rukote in khai ciatih bangin zauhsuam ve i.
Zisu thi i (Mark 15:33-41; Luke 23:44-49; John 19:28-30)
45 Sun nazi hlainih in zanlam nazi pathum tian cia ram hmuahhmuah ah khuathim i. 46Nazi pathum dung fangin, Zisu in aw cawm ngai in, “Eli, Eli, lama sabakthani?” ti in au i. Cia khiah, i Pathian, i Pathian, zaimanin i zaam lio i si? ti ca i. 47Ciata ai a ding tute mi hrekkhatte in cia khiah za fangin, “He pa in Elijah ko i.” ti in ti i. 48Ciafangin mi pakhat khai dawp vut ai ponniu khiah capitti thur thawn phaikuang vumah dah ai Zisu in ding tuh in pe i. 49A dangte in, “Elijah khiah amah o tuhin hleng na ngai maw, sik nga sing.”ti in ti in i. 50Zisu khai aw cawm ngai in au leh thio ai thi lio i. 51Ciafang in temple songai khaan danhnak pon khiah a cung ai panin a hnia tian tannih in zik ai hlinhlin tlung ai lungto puipui khiah khoi i. 52Hlan khiah hong ai mi cianghlim a thi zote khiah tho ai, 53Zisu tholeh hnua fangin hlan songin suak ai khua cianghlim songah lut ai mi tampui hnenah lar i. 54Raalbawipa le amahte thawn Zisu kiltute in hlinhlin le a canghnak thilte khiah hmu fangin, amahte khiah lau ngai ai, “Thungai in he pa khiah Pathian Fapa i.” ti in ti i. 55Cen ciata ah Zisu khiah Galilee ai panin hlun ai siktu nupang tamngai khai a hla ngai in sik i. 56Cia nupangte lakah Mary Magdalene le James le Joses nuu Zebedee fate nuu Mary um i.
Zisu phumhnak thu (Mark 15:42-47; Luke 23:50-56; John 19:38-42)
57Zanlam fangin Arimathea ai milian pa Joseph tihnak kawi i. Amah khiah Zisu hnuahlun lo i ve i. 58Ani khai Pilate hnenah kawi ai Zisu ruang khiah ngen i. Ciafangin Pilate in a ruang pe tuhin thupe i. 59Joseph in a ruang lang ben fangin a ciang pon thawnin fun ai, 60 khu kua songah amah in co hnak a thar amah hlan songah zau ai cia hlan dawngkham ah lungto lian ngai leu i. 61Cia hlan hmai ah Mary Magdalene le a dang Mary khiah to kawm i. 62Passover puai ca ai remcia nia a thangha fangin phungkibawi upate le Farasite khiah Pilate hnenah hmunkhat in kawi ai, 63“Bawipa, he mi zawltu pa in a nung lai in, ‘ni thum fangin tholeh tuh ing,’ ti ai rel awng khiah hih i ing. 64Ciamanin ni thum tian hlan kil tuhin thupe tu. Cialofangin a hnuahlunte in zanlai in kawi in a ruang khiah ru pang selai mite hnenah, “Amah khiah thihhnak in tho zo i.” ti in rel tuh ai a hnuata thudon khiah a hmasahnak in tlai tuh am i.” ti in ti i. 65Pilate in amahte hnenah, “Santari ning pe ing. Feh tu i lai, ning thil tawp in santari kil tuu-ih.” ti in sawn i. 66Ciamanin a nite khai feh ai lungto pui khiah seal khet ai hlan khiah a kho ngai in kil ruai i.