1Zisu khai khawm songah lut ai, ti khiah tan ai amah khua ah hleng i. 2Ciafangin a kutke mer thill lo ai urtu pakhat khiah a khuahluan ah it kongin Zisu hnenah kawih i. Zisu in amahte sanghnak khiah hmu fangin, a urtu pa hnenah, “Fapa, ang tu. Na sualhnak khiah na hlat sah zo i.” ti in ti i. 3Ciafangin upadi dan cuktu sazate in amahte thin songin, “He pa in Pathian zauhsuam i.” ti in ruat i 4Zisu in amahte ruathnak khiah ling sah manin, “Zaimanin a pha lo khiah ruat i si? 5‘Na sualhnak na hlat sah zo i.’ ti maw ‘Tho tu lai vak tu.’ ti pong bai sawn pa? 6Ikhalselai mi Fapa in laivumah sualhlathnak huthawm nai i ti khiah ning ling thill thaihnak tuhin (a urtu pa hnenah), Tho tulai na khuahluan khiah lang in inn ah tlung tu.”ti in ti i. 7Cia pa khai tho ai a inn ah tlung i. 8Mibur pui in hmu fangin, ngaihsun ur rauh ai minungte hnenah he bang power pe tu Pathian khiah thangphat i.
Zisu in Matthew ko i (Mark 2:13-17; Luke 5:27-32)
9Ciata in Zisu khai feh fangin, siahkhuai dong hmun zungah Matthew tihnak mi pakhat to khiah hmu ai, “I hlun tu.” ti in ko i. Matthew khai tho ai Zisu hnuahlun i. 10Zisu khiah inn songah rongei in to fangin, siahkhuai dongtute le misual tamngai khiah Zisu le a hnuahlunte thawn tho tlang i. 11Cia khiah Farasite in hmu fangin, “Ziangman in ning saza pa in siahkhuai dongtute le misualte kawmin rongei tlang i?” ti in zawt i. 12Zisu in za fangin, “A cakte in sibawi kul lo i. A urte ian in sibawi kul i. 13Ikhalselai, ‘A hlu tahin ngaihharhnak i daih sawn i.’ tihnak a dikbe khiah zir tuu-ih. Ziangmanti fangin mi dikcangte ko tuhin hleng lo ai misualte sir ruai tuhin hleng ing.” ti in ti i.
Rongul hnak (Mark 2:18-22; Luke 5:13-39)
14Ciafangin John hnuahluntute khiah Zisu hnenah kawi ai, “Ziangmanin Farasite le kinte tu rongul de ai, na hnuahlunte tu rongul lo i?”ti in zawt i. 15Zisu in amahte khiah, “Mohoi puai sim tuhai kohnak mite in mohoitu tlangval khiah anite thawn umteng in lungsia le kap in um thill tur im? Ikhalselai mohoitu tlangval pa khiah amahte hnenin lang sah hnak nia hleng tuh i lai. Ciafangin amahte in rongul in um tuh i. 16Aisu in khai angki hlun khiah pon thar thawn daat lo i. Daat lekhaw a pon thar in angki hlun khiah zik ruai tuhai a zikhnak khiah kau tuh amam i. 17Cen aisu in khai capitti thar khiah palang hlunah khawi lo i. Ziangmanti fangin palang hlun khiah khoi ngaikhaw, capitti khiah zun tuh berh le palang khai hnawm tuh sio i. Ciamanin capitti thar khiah palang thar songah khawi tuh ai, a panih in him tuh i.” ti in rel i.
Jairus fenu niu le Nupui nuu cakruaihnak (Mark 5:21-43; Luke 8:40-56)
18Zisu in he thute khiah amahte cuk teng fangin, mi-uktu pakhat khiah Zisu hnenah kawi ai Zisu khiah bia ai, “I fenu niu khiah thi lio i. Ikhalselai kawi in na kut khiah a vumah dah silai, amah khiah nung tuh lio i.” ti in ngen i. 19Ciafangin Zisu khai tho ai, mi-uk pa khiah a hnuahlunte kawmin hlun i. 20Ciafang in kum hlainih thi suak ai urtu nupui pakhat khiah a hnua in kawi ai a pon par niu khiah khing sah i. 21Ziangmanti fangin cia nuu in a thin songin, “A pon par niu rin khing ngah ing lai i cak tuh lio i.” ti in ruat i. 22Ikhalselai Zisu khai a hnualam her ai cia nuu khiah hmu le, “Farnu, ang tu. Na sanghnak in na cak ruai zo i.” ti in ti i. Ciasawng fangin cia nuu khai cak vut i. 23Zisu khai mi-uk pa inn ah hleng fangin, darkhuang tumtute le minung tamngai kap lianglo khiah hmu fangin, 24Amahte hnenah, “I pial tuu-ih. Fenu niu khiah thi lo i. Mitmu ngawn i.” ti in ti i. Ciafang in amahte in hnihcip i. 25Ikhalselai minungte khiah sumpua ah suak ruai ben fangin, Zisu khai inn songah tlum ai, fenu niu khiah a kut in lang ai fenu niu khai tho i. 26Ciafangin a hming khiah cia pumpalah ah thang i.
Zisu in mitcaw panih cakruai i
27Zisu khai ciata in thawn fangin, mitcaw panih in, “David Fapa, ning kin hio tu.” ti in au kong in hlun i. 28Zisu khai inn songah hleng fangin, mitcawte khai a hnenah kawi ai, Zisu in amahte hnenah, “He khiah bawn ben tuh in i um aw i sim?” ti in zawt i. Amahte in, “Na um i ing, Bawipa.” ti in sawn i. 29Ciafangin Zisu in ciate mit khiah dai sah ai, “Ning sanghnak bangin lo cang tu seh.” ti in ti i. 30Ciafangin cia mit khiah hong lio i. Ciafangin Zisu in, “Aisu khai ling ruai mah ih.”” ti in kham i. 31Ikhalselai anite khai ciata in feh ai, a hming khiah cia ram pumpalah ah thang ruai i.
Pong thill lo pa cakruai i
32Anite khai ciata in suak fangin, Zisu hnenah khuavang naitu pong thil lo mi pakhat khiah kawih i. 33Zisu in cia khuavang khiah hnawt fangin, a pong thill lo pa khai pong i. Ciafangin mi tampui khiah ngaihsun ur rauh ai, “Israel ah he bang hmu awng lo i sing.”ti in ti i. 34 Ikhalselai Farasite in, “Amah in khuavangte khiah khuavang uktu bawipa thu in hnawt i.” ti in ti i.
Zisu in mite ngaihhar i
35Zisu khai khuapui le khuate nau hmuahmuah ah feh ai, amahte sanginn songah thucuk ai, vancung ukhnak kawspal thupha khiah tazahaw kong in mite urhnak hmuahhmuah le a phun caangcaang urte khiah cakruai i. 36Mi zapui khiah hmu fangin, amahte khiah ngaihhar rauh i. Ziangmanti fangin amahte khiah a cawl in bang rauh ai, nuamhmun caang ah piaksio in umtu a khaltu nai lo tuute bang i. 37Ciafangin Zisu in a hnuahlunte hnenah, “Rongkhawm tuh khiah dim napui ai rongkhawm tute khiah tlawm i. 38Ciaman in rongkhawmtu Bawipa hnenah, a rongkhawm tuhin rongkhawmtute hlat tuhin sawngen tuu-ih.”ti in ruai i.