14 Sanghnak thanaute khiah nautat mah ih. Ikhalselai a ruathnak khiah sawi sah mah ih. 2Mi pakhat in zai hmuahhmuiah ei thai in sanghnak nai i. Ikhalselai sang thanau pa in vuan ai pohnak te lek ei i. 3A ei tu in a ei lo tu khiah nautat ma seh. A ei lo tu in a ei te khiah mawhhluk ma seh. Ziangmanti fangin Pathian in amah khiah saang zo i. 4Mi dang hnenum mawhhluk tu nang tu aisu i si? A bawipa hmai ah ding khai ding thai tlu khai tlu thai i. Cia pa khiah ding tuh i. Ziangmanti fangin Pathian in amah khiah ding ruai ben tuh i. 5Mi pakhat in ni khat khiah ni danghnak in a cuang i dah i. A dang pakhat in ni veksen in a bang dun liang in ruat i. Aisu hmuah in amahte ruathnak vumah a kho ngai in sang tu seh. 6Ni a ul tu pa in Bawipa ca in ul i. A ei tu pa in Bawipa ca in ei i. Ziangman ti fangin amah in Pathian khiah an i. Cen a ei lo tu pa in Pathian ca in ei lo i. Ani in khai Pathian an ve i. 7Ziangmanti fangin kinmah ca ian ai nung lo ai kinmah ca ian in thi lo i sing. 8Ziangmanti fangin kin nung lekhaw Bawipa ca in nung i sing. Kin thi lekhaw Bawipa ca in thi i sing. Ciamanin kin nung le kin thi in khai Bawipa minung i sing. 9Ciamanin he ca in, Khrih khiah a nung le a thi te Bawipa canghnak tuhin thi awng ai nung leh i hang. 10Ikhalselai zaimanin na unau khiah mawhhluk i si? Cen zaimanin na unau khiah nautat i si? Ziangmanti fangin Khrih thukhanhnak tauhkheng hmai ah kin veksen in ding tlaang tuh i lai sing. 11Ziangmanti fangin
Bawipa in, “I nung songhmuah in aisu
hmuah in i hmai ah khuk caicin tuh ai
aisu hmuah in Pathian hnenah a kaa in phuang
tuh i.” ti in ngan zo i.
12Ciamanin kin veksen in Pathian hnenah amahte thu ten rel kul tuh i. 13Ciamanin aisu khai mawhhluk awl nga sing. Ikhalselai ulenaute hmai ah sual ruai tuhhnak zaikhai dah tuh lo in tuum nga sing.
14Bawipa Zisu songah zaikhai a rim um lo i ti khiah ling ai sang ngai ngai ing. Ikhalselai a rim ti ai ruat tu pa hnenah zai hmuahhmuah rim liang i. 15Ziangmanti fangin rong manin na unau ur ruai le sikhaw, ithnak thawn vak nawn lo i hang si. A ca ai Khrih thihhnak pa khiah na rong thawn hnawm ruai mah. 16Ciamanin nangmah ca ai a pha tihnak khiah mi dangte in a pha lo i ti in rel ma seh. 17Ziangmanti fangin Pathian ukhnak khiah ei le ding hnak i lo i. Ikhalselai Pathian ukhnak khiah Ciang Rauhla songin dikcanghnak le remhnak le anghnak i. 18Ziangmanti fangin hetih bangin Khrih ca ai naper tute khiah Pathian in saang ai minungte in khai lungkhim sah i. 19Ciamanin remhnak le pakhat le pakhat kho ruaihnak thilte lek khiah siarmawti in hnawh nga sing. 20Rong manin Pathian naper khiah hnawm ruai mah. Zai hmuahhmuah khiah ciang liang i. Ikhalselai ei manin mi dang sual ruai ruai lekhaw ciate khiah a pha lo i. 21 Na ei hnak le na ding hnak le na bawnhnak in na unau khiah sual ruai lekhaw ei le ding le bawn pha lo i. 22Ciamanin na sanghnak khiah Pathian le nangmah lakah nai tu. A naperhnak in amah veve mawhhluk lo te khiah hmuifu i. 23Sang sam deuh ai ei tu pa khiah mawh zo i. Ziangmanti fangin amah in sanghnak thawn in ei lo i. Sanghnak thawn bawn lohnak khiah sualhnak i.