7Ulenaute, (Pathian thukham lingtu Judah mi ningte hnenah ning rel ing) ning nung song hmuah in thukham in ning uk i. 2Ziangmanti fangin nupang pakhat khiah a pa nung song hmuah in a pa thawn umkhat i. Ikhalselai a pa thi lio selai cia nuu khiah a pa thawn nupa dun lo i hang. 3Ciamanin a pa nung lai in cia nuu in pa dang nai selai amah khiah misual i. Ikhalselai a pa thi lio lekhaw cia nuu khiah thukham songin luat manin, pa dang nai rinin misual cang lo i. 4Ciamanin, ulenaute, Khrih pum songin Pathian Thukham hnenah ning thi zo i hang. Ciamanin kin te in Pathian ca in na pha kin per thillhnak tuhin a thi in tholeh tu Zisu hnenah nulepa bang in hoidun tuh i si. 5Ziangmanti fangin Pathian thukham in sualhnak ai daihhnak phun caangcaang khiah suak ruai i. Ciamanin taksa pum dan in nung le singkhaw, sualhnak in kin taksa pum songin na per man in thihhnak thingthai thai ruai i sing. 6Tuntu thawng kin hla awng tu Pathian Thukham songin kin luat zo ai thawng kin tauh hmun hnenah kin thi zo manin thukham hlun bang in per lo in rauhla thinlung thar thawn in per nga sing.
7Ilekhaw kontih in rel nga sing? Pathian Thukham khiah sual i awm? Sual zel hlah. Pathian Thukham um ta hlah selai sualhnak khiah sual i ti in ling tuh lo ing. “Mi thil ir sah mah.” tihnak Thukham um tahlahselai mi thil ir sah ing ti ling tuh lo ing. 8Ikhalselai sualhnak in Pathian Thukham khiah sualhnak hnempuihnak tuhin hmang le i thin songin a pha lo daihhnak phun caang suak ruai i. Ziangmanti fangin Pathian Thukham um tahlahselai sualhnak tu thi zo napui i. 9Ziangmanti fangin Pathian Thukham pua ah i um teng fangin i nung awng i. Ikhalselai Pathian Thukham hleng fangin sualhnak khiah nung leh ai kai khai i thi i. 10Ciamanin nunghnak tuh ai pehnak Pathian Thukham khiah kai ca ah thihhnak cang i. 11Ziangmanti fangin sualhnak in Pathian Thukham khiah sualhnak hnempuihnak tuhin hmang le kaimah khiah i zawl ai Pathian Thukham thawn i rek i. 12Ziangmanti fangin Pathian Thukham khiah a cianghlim i. Cen Pathian thukham khiah a cianghlim le a dikcang le a pha i. 13Ciailekhaw a pha tihnak Pathian Thukham khiah kai ca ah thihhnak i awm? I zel hlah. Ikhalselai sualhnak khiah sualhnak i ti in laar thillhnak tuhin sualhnak in a pha kin tihnak thukham in i thi ruai i. Ciamanin Pathian Thukham in sualhnak khiah sual bik i ti in laar ruai i. 14Ziangmanti fangin Pathian Thukham khiah a cianghlim i. Cen kai tu sualhnak cengfa cang tuh ai zuarhnak minung ing. 15Ziangmanti fangin i bawnhnak khiah zai bawn ing ti in ling lo ing. Ziangmanti fangin i bawn nuamhnak tu bawn lo ai i nuam lohnak sawn tu bawn tekto ing. 16Cen i nuam lohnak bawn leingkhaw, Pathian Thukham khiah a pha i, ti in lungkhim i cang i. 17Ciamanin cia khiah kai ai bawnhnak i lo hang le i songai sualhnak ai bawnhnak i. 18Ziangmanti fangin i songah (cia heh i taksa pum songah) a pha zaikhai um lo i ti ling ing. Ziangmanti fangin a pha bawn tuh tu i nuam napui ai a bawn tuh taktak fangin tu ben lo ing. 19Ziangmanti fangin a pha i bawn nuamhnak tu bawn lo ai a pha lo i bawn nuam lohnak tu bawn tekto ing. 20Cia i nuam lo hnak khiah bawn tekto le ingkhaw, kai ai bawnhnak i lo ai i song ai sualhnak ai bawnhnak i. 21Ciamanin thu pakhat khiah hmu ing: zai i ti fangin a pha bawn i nuam fangin a pha lo khiah i songah um i ti ling ing. 22Ziangmanti fangin i thin ngai ngai in tu Pathian Thukham lakah ang ngai in lung i khim i. 23Ikhalselai i pumpui innkuate lakah dan dang um khiah hmu ing. Cia dan dang in i thin songai dan thawn tawng dun ai, i pumpui innkua te songai umtu sualhnak dan thawng songah thawng i tla ruai i. 24Zaitluk in thin rimsu tuar le zai haihtlak lo mi ing! He thihhnak taksa pumpui songin, aisu in i luat ruai tuh i? 25Pathian naihhla! Kin Bawipa Zisu Khrih songin i luat ruai zo i. Cia i le i thin songin tu Pathian Thukham hnenum ing. Inapui ai i pumpui in tu sualhnak hnenum ing.