Zisu khiah innhampui i
3Ulenaute, thusang khote bangin thu ning rel thill lo ai thusang kho lo Khrih songah nausen niu bangin thu ning rel kul ing. 2Hnawiti thawn ning cawm ai rong ngaingai thawn ning cawm thil lo ing. Ziangmanti fangin ningte in ei ben lo i si. Cen tunin khai ei ben lai lo i si. 3Ziangmanti fangin ning sanghnak khiah naupang ngio i. Ziangmanti fangin ning lakah iksik dunhnak le hauhnak le pawlkhanhnak um ngio tu ning sanghnak naupang man i lo im? Cen laivum minung nundan in um i lo i sim? 4Ziangmanti fangin pakhat in, “Paul minung ing.” ti i si. A dang pakhat in, “Apollos minung ing.” ti i si. Ciamanin ning sanghnak khiah naupang i lo im? 5Paul tu aisu i? Apollos tu aisu i? Amahte khiah Bawipa in aisu hmuah hnenah pe bangin ning sang ruaitu Pathian nalaangte i lo im? 6Kai in cing ai Apollos in tiburh i. Ikhalselai Pathian in khaang ruai i. 7Ciamanin a cingtu le tiburhtu khiah a thupui i lo ai a khaang ruaitu Pathian ian thupui i. 8Cen a cingtu le tiburhtu khiah hmunkhat i. Aisu hmuah in amah perhnak zahin hlawhtham ngah tuh i. 9Ziangmanti fangin kinte khiah Pathian thahlawh i sing. Ningte khiah Pathian vuandum Pathian inn i si. 10I hnenah i pehnak Pathian ngaihharhnak thawn inn sathiam pa bangin kai in innham khiah pan ai mi dangte in cia innham vumah sa i. Ikhalselai aisu hmuah in cia innham vumah a ralring niu in sa tu seh. 11Ziangmanti fangin Zisu lo a dang innham aisu in khai pan thil lo i. 12Cen aisu in khai he innham vumah sui le ngun le lungvar mankhung le thing le hampa le fangkung thawn sa lekhaw 13Amahte perhnak khiah laarruai tuh i. Ziangmanti fangin khuavaar in laarruai tuh i. Ziangmanti fangin mei thawn laarruai tuhai aisu hmuah ai perhnak khiah mei thawn teh tuh i. 14Cen a sahnak na khiah hnawm hlahlekhaw cia pa in hlawhtham ngah tuh i. 15Cen cia pa perhnak khiah mei in kang lio lekhaw amah khiah sung tuh i. Ikhalselai amah tu mei ai tai ai luat bang in luat tuh i.
Pathian temple i si
16Ningte khiah Pathian temple i si ai ning songah Pathian Ciang Rauhla um i ti ling lo i sim? 17Cia Pathian temple rim ruai in hnawm cantu khiah Pathian in hnawmcan tuh ve i. Ziangmanti fangin Pathian temple khiah a cianghlim i ai ningte khai cia temple i si.
18Aisu in khai amah veve zawl ma seh. Ning lakah he laivum fimhnak lamah amah veve fim vuah lekhaw a fim thillhnak tuhin mivoi cang tu seh. 19Ziangmanti fangin he laivum fimhnak khiah Pathian hmaiah voihnak i. Ziangmanti fangin “Pathian in amahte khiah amahte ngian thawnin pom tuh i.” ti in ngan zo i. 20Cen “Bawipa in amahte ruathnak khiah a lovang i ti ling i.” 21Ciamanin aisu in khai minung lakah tluangkhawng ma seh. Ziangmanti fangin zai hmuahhmuah khiah ningmah ai i. 22Paul le Apollos le Siphas le laivum le nunhnak le thihhnak le he san ai thilte le a hleng tuh lai thilte a veksenin ning mah ai i. 23Cen ningte khiah Khrih ai i si. Cen Khrih khiah Pathian ai i.