<< 2 KAWRINTHIAN 5 >>
5Ziangmanti fangin laivum ai kin hlaam kin inn khiah bal lio lekhaw kut ai sa lohnak vancung ah Pathian hnenin kumzangza inn nai i sing. 2Ziangmanti fangin vancung ai kin inn sil tuh umm in he inn songah thinur kongin um i sing. 3Ziangmanti fangin ciatih ai kin silh fangin kawngkolh in um tuh lo i sing. 4Ziangmanti fangin he hlaam songah kin um teng in rimsu in thinur in um i sing. Ziangmanti fangin nunhnak in a thi thai kin pumpui khiah lemlio fangin kinte khiah kawngkolh in um tuh lo ai cia vancung inn thawn kin silh tuh i. 5Cen he ca ai kin bawntu khiah Pathian i. A Ciang Rauhla khiah a thawlthan ca in kin pe zo i. 6Ciamanin he kin taksa pum inn songah kin um song hmuah in Bawipa thawn umkhat lo i sing ti khiah a ngaingai in ling i sing. 7Ziangmanti fangin mit thawn vak lo ai sanghnak thawn vak i sing. 8Cen kin taksa pumpui songah um tahin Bawipa thawn umkhat tuh khiah a ngaingai in kin hiam sawn i.
9Ciamanin kin taksa pumpui inn songah kin um le um lo in khai Bawipa ang ruai tuh khiah kin zuamhnak i. 10Ziangmanti fangin kin taksa pumpui ai a pha le a phalo perhnak ca in hlawhtham ngah tuhin kin veksenin Khrih thukhan hmun zung hmai ah ding kul tuh i lai sing. 11Ciamanin a kihkul Pathian kin ling manin mite khiah thuso i ing. Pathian in zai bang minung i ing ti kin ling bangin ningte in khai kin ling tuh ve i daih i.
12Ning lakah kinmah veve an leh thio i lo i ing. Ikhalselai kin manin ning hngal thaihnak tuh khuan ning pe i ing. Ciafangin thin songlam sik lo ai a pualam sik ai hngaltute khiah sawn ben tuh i si. 13Kin lungmu kin am i lekhaw Pathian ca ai am i ing. Cen kin lungmu fim lekhaw ningmah ca ai kin fim i. 14Ziangmanti fangin Khrih ithnak in kin ruai bel i. Ziangmanti fangin mi veksen ca in mi pakhat thi ai ciamanin mi veksenin thi sio i ti a ngaingai in ling i ing. 15Khrih khiah mi veksen ca in thi tuar i. Ciamanin a nungte in amahte ca in nung tuh lo ai amahte ca ai tholehtu pa ca in nung tu seh. 16Ciamanin tunai panin aisu khai taksa danin ling lo i hang ing. Khrih khiah taksa danin ling awng rih ing. Ikhalselai tuntu ciatih in ling lo i hang ing. 17Ciamanin Khrih songah a umtu khiah mi piangthar cang zo i hang. A hlun thilte khiah bo zo ai zai hmuahhmuah thar ruai liang i hang. 18Hete hmuahhmuah khiah Zisu Khrih songin amah thawn kin remruai lehtu Pathian ai i. Cia Pathian le minungte remruai lehhnak tuh naper kin pe zo i hang. 19Pathian in laivum mite khiah Khrih songin amah thawn remruai leh ai amahte sualhnak khiah siar sah lo i hang. Cen remlehhnak thu khiah kin hnenah kin ap zo i. 20Ciamanin kinte khiah Pathian nalaangte kin i man kin songin Pathian in ning kun bangin Khrih ca in Pathian thawn remleh tuu-ih ti in ning ngen ing. 21Kinte khiah Zisu Khrih songin Pathian dikcanghnak kin cang thaihnak tuhin kin ca in sual nailo Zisu Khrih khiah sual cang tuhin Pathian in bawn i.
<< 2 KAWRINTHIAN 5 >>